1 Dɛ kenii a do aa, dɛ ɛrɛ gwaalaa ya Juda tena gwaa he nɛra haa wola Juda tena ɛɛ yɔ? Dɛ bɔkwa tɔnɔɔ lɔ ya penteŋa ta nɔ? 2 Ya Juda tena na som taeh dɛ gwaa nɛra baa kaa la ŋwɛnɛ bɛlbwa ta. Anɔ la aa tɔ sie laanee kɛŋɔ yanee Korowii tɔ sie kpɔ o waa bagle. 3 Amɔ dɛ ya bini bane ta Korowii yaradae yaa, wɛɛ koh a waa asɛ o waa aa yaradaa dɔa? 4 Akai! Dɛ nɛwɛnyini bwa ɛ nyosonteŋna kwara naa, Korowii te wa ɛɛ dɔ kasinteŋii saŋ bɛlbwa. Anee Korowii Tɔn la bol la. O bagle Korowii waa ŋɔ, "He wobol ɛɛ bagloo kɛŋɔ he dɔ kasinteŋ. Hɛɛ dɛɛ di bole he waa taa." 5 Nɛwɛnyini te ɛɛ ŋɔɔ, "Dɛ a chegɛ ya wechɔga ta asɛ nɛra na kɛŋɔ Korowii ɛ nɛndɛɛge aa, amɔ ya ta wedɛɛga ɛɛ kɛɛ? Dɛ Korowii tɛr ya deŋne aa, dɛ o waa tograa?" Nɛwɛnyini liiree nɔ! 6 Kɛ gɛ laa a do. Dɛ Korowii waa ta tograa, ɛrɛɛ wɛɛ ba ɛɛ dɛ te won bol nɛwɛnyini waa dɛ pa bole ɔ? 7 Nomɛl gee pɛɛroo ŋɔ, "Aah dɛ a chegɛ n nyosone ta asɛ nɛra na kɛŋɔ Korowii dɔ kasinteŋ, o dɔ sɔn aa, dɛ n nyosone la ɛ wechɔga ja aa?" 8 Amɔ yáa ɛ wechɔga ásɛ wedɛɛga le a ta kɛɛ? Nɛra bane chɔg n sɔn, ba haŋɛ n nyoa ŋɔ n dɛ ŋɔ a gɛ waa nɔ ɛɛ ta wechɔga ɛɛ. Korowii ɛɛ tɛr ba deŋnee, dɛ a ŋwɛnɛ ta gee. 9 Taraken nɔ, ŋwɛnɛ besoo taa ya Juda tena gwaa he nɛra haa wola Juda tena ɛɛ yɔ? Ya ta heyaa gwaalɛ. N fa baglɔ kɛŋɔ ya Juda tena ne he nɛra haa wola Juda tena ɛɛ la, ya bwa ɛ wechɔg-ɛɛra. 10 Anee Korowii Tɔn la ŋɔ la. O baglɔ ŋɔ, "Nomɛlbwa toole dɛ ɛ nɛndɛɛge o wa ɛɛ su Korowii siwi. Nɛmbeŋkpoŋ kwaraa toole. 11 Nomɛlbwa toole dɛ jemɛ wa, nomɛlbwa toole dɛɛ nyin Korowii bɔr dɛ́ tomɔ. 12 Ba bwa berɛ habɔɔ kpo Korowii, dɛ bwa berɛ nɛnsale. Ba bɛlbwa aa wedɛɛga ɛ. Nɛmbeŋkpoŋ kwaraa toole. 13 Ba nyoa wobol doŋo, a sɔɔh. Nyosone gboo ba bwa. Gɛ domkpule domɛ nɛn dɛ o kpoo bug ta la, gɛɛ a gɛ nɛra nɔ ge kpɔ ba nyoa wobol dɛɛ chɔg nɛra. 14 Wobochɔga gboo su ba nyoo. 15 Ba gbaŋre nɛŋkpoa waa ta. 16 Bobɛlbwa baa dɛ la la, waa gboo baa chɔg, dɛɛ ɛ nɛra hɔhɔrɔwa. 17 Waa aa gela nɛn bambile ɛɛ sɔɔhno la te, baa an jemɛ. 18 Baa Korowii ge ɔmɛ." 19 Ya jemɔ kɛŋɔ waa Mmara la aa dɛ bagle la, nɛra baa dɛ teŋɛ Mmara la ta laanee Mmara la ɛɛ bagle, asɛ nomɛlbwa bɛ won dɔ wobɛlbwa dɛ bol Korowii sie, ásɛ o won bol nomɛlbwa waa dɛ pa bole. 20 Maa dɛ ŋɔ nɔ, Mmara ta teŋa aa won gel nomɛlbwa we-ɛɛla su Korowii siwi bwa. Mmara la toma bwaa kɛŋɔ ó gel nɛwɛnyini jemɛ kɛŋɔ ya ɛ wechɔga. 21 Korowii gelɔ ya jemɛ ŋwɛnɛ la ta aa chega ya wa ɛɛ su o siwi. Mmara ta teŋa ta laa a che. Mosis Mmara la ne Korowii keamere tɔne di danseɛ gɛ ŋwɛnɛ nɔ ta. 22 Yeesu Kristo yaradae taa a che nɛra wa ɛɛ su Korowii siwi. Nomɛlbwa waa dɛ yarada Yeesu waa la, o waa dɛ su Korowii siwi, dɛkalkɛŋɔ nɛwɛnyini bwa beŋkpoŋ Korowii be. 23 Nɛwɛnyini bwa ɛ wechɔga, ya bɛlbwa ta gɛ Korowii fe aa dɛ nyin o maŋkura yaa la chɛɛ. 24 Yeesu Kristo yawɛ yaa o chal ne. A waa ya wa ɛɛ su Korowii siwi. O nɛn sum nae kohona waa o ɛ gɛ tɛ yaa pɛɛpɛɛ la. 25 Korowiirii le Yeesu Kristo ŋɔ ó ba fuge o chal ta dɛ soŋe ya wechɔga ásɛ o bandia le nɛra baa yarada Yeesu Kristo seo waa la nɛ. Korowiirii fa saahna ɛ gɛ dɛ bagle kɛ o waa togrɔ, dɛkalkɛŋɔ a saŋ la, nɛra aa dɛ ɛ wechɔga la, o laa sie kpɔ ba be. A fe chɛ kɛ o tɛr nɛwɛnyini deŋne, kɛ o lawɛ bambile. 26 Taraken waa gela Yeesu Kristo koh ya wechɔga waa dɛ sewɛ nɔ, o baglɔ kɛŋɔ o waa togrɔ. Nomɛlbwa waa dɛ yarada Yeesu dɛ kpɔ o te tɛo la, Korowii gelɔ o ɛ nɛndɛɛge o wa ɛɛ su o siwi. 27 Aa do gɛ nɔ, ya dɔ ŋwɛnɛ kɛŋɔ ya ta nyoa aa? Ya ta ŋwɛnɛ dɔe. Ɛrɛ taa a che yaa wola won ta nyoa nɔɔ? Mmara ta teŋa ta laa a che. Yeesu Kristo yaradae laanee tɔ gɛ waa nɔ bwa ŋwɛnɛ, 28 dɛkalkɛŋɔ ya sɛoh kɛŋɔ Yeesu Kristo yaradae taa a che Korowii gel nɛn ɛ nɛndɛɛge o wa ɛɛ su o siwi. Mmara ta teŋa aa gelɛ nɛn ɛɛ ɛ nɛndɛɛge o wa ɛɛ su Korowii siwi bwa. 29 Juda tena gbo laa Korowii che tɛ. Nɛra baa wola Juda tena ɛɛ la, ba bwa waa o do le. 30 Korowii beŋkpoŋ gboo lole. Yeesu Kristo yaradae taa aa ba chega o gel Juda tena ɛ nɛndɛɛga ba waa su o siwi. O yaradae taa aa ba chega o gel nɛra baa wola Juda tena ɛɛ ge ɛ nɛndɛɛga ba waa su o siwi. 31 Aa do gɛ nɔ, dɛ ya dɛ yarada Yeesu aa, dɛ ya tɔ Mmara la ŋwɛnɛ kɛɛ? Akai! Yeesu yaradae nɔ te kwaraa dɛɛ ba gela ya won teŋɛ Mmara la ta.
