Room 2

1He naate haa dɛ pwah he dɔŋ, he ta wobɛlbwa dɔe dɛ́ bol dɛ́ lɛ he te kpa. Henee ume noo, haa dɛ pwah he dɔŋ dɛ berɛ dɛɛ ɛ o wechɔga waa dɛ ɛ la dɔŋa la, dɛ he gbagbaa hɛɛ pa bolchɔge la. 2Nɛn ɛ wechɔga nɔ dɔŋa aa, Korowii dɛ pao bolchɔge. O te, a ŋwɛnɛ taa wɛɛ pa nɛwɛnyini bolchɔge. 3Kɛ he te, waa haa dɛ pwah nɛra a waa la, anee he gee ɛ. He dɛ lii kɛŋɔ Korowii aa he te waa bola ba dɛ pa bole kɛɛ? 4Waa nɔ bwaa Korowii ta tea dɛɛ ɛ heya, dɛɛ tɛ heyaa sisɔna dɛɛ lawɛ bambile nɔ bwa ásɛ he charɛ he liire dɛ le he wechɔga ta. Kɛ haa o wedɛɛga nɔ bu, dɛɛ nyiŋa pɛɛ. 5He deŋne kpegri. Haa gelɛ he tea bini ɛɛ chɔg he wechɔga wa. He gelɔ Korowii bwaawee ɛɛ do kan he nɛɛ tɔpere bɛlbwa. Awola waa ba pa bole kasinteŋ ne la, o baah nɛɛ di he nɛɛ taeh. 6Gɛ nomɛlbwa we-ɛɛla aa doa la, anee wɛɛ ba nyiŋa dɛ bol o waa dɛ pa bole. 7Nɛra baa dɛ nyin jirima Korowii be, dɛɛ nyin kɛ Korowii kpɛɛ ba, dɛɛ nyin mkpa aa wola jaga dɔe, dɛ koh a waa dɛ lawɛ bambile dɛɛ ɛ wedɛɛga saŋ bɛlbwa la, Korowii ɛɛ tɛɛ baa mkpa aa wola jaga dɔe bwa. 8Nɛra baa dɛ ɛ ba tetoowa, baa wola Korowii waa aa ɛ kasinteŋ ta teŋɛ, dɛɛ ɛ wechɔga la, Korowii bwaawee ɛɛ ir ba nɛɛ taeh. 9Nɛra baa dɛ ɛ wechɔga la, ba bwara ɛɛ nyɛgoo taeh, aa noo baa taeh. Juda tenaa dɛ tɔ sie na bonyɛga a noo ba, nɛra baa wola Juda tena ɛɛ la ge jao. 10Asɛ nɛra baa dɛ ɛ wedɛɛga la, Korowii ɛɛ geloo ba dɔ jirima, dɛ kpɛɛ ba, dɛ tɛɛ ba bambisɔɔhna. Juda tenaa dɛ tɔ sie na anɔ bwa, nɛra baa wola Juda tena ɛɛ la ge jao. 11Korowii aa nomɛlbwa waa nyin gwaa bɛl. 12Nɛra baa wola Mmara Korowii aa kpɔa tɛ Mosis la jemɛ dɛɛ ɛ wechɔga la, baa sewɔɔ. Kɛ Mosis Mmara la ta laa Korowii ɛɛ ba nyiŋa dɛ bol ba waa dɛ pa bole. Banɔ la baa jemɛ Mmara la la, Mmara la taa Korowii ɛɛ ba nyiŋa dɛ bol ba waa dɛ pa bole. 13Maa dɛ bol nɔ, Mmara nɔ noe laa gela nɛn ɛɛ ɛ nɛndɛɛge o wa ɛɛ su Korowii siwi. Mmara la ta teŋaa gela nɛn ɛɛ ɛ nɛndɛɛge o wa ɛɛ su Korowii siwi. 14Nɛra baa wola Juda tena ɛɛ la, baa Mosis Mmara la jemɛ. Kɛ saŋ bɛlbwa ba gbagba aa kpɔ ba nyu bini nfɛrɛ dɛ ɛ gɛ Mmara la aa dɛ bagle la, dɛ ba nyu bini nfɛrɛ la ɛ mmara tɛɛ ba. Kɛ a fe lole kɛŋɔ baa Mosis Mmara la jemɛ te. 15Ba we-ɛɛla chaglɔ kɛŋɔ waa Mosis Mmara la aa dɛ bagle la lɔ ba bambile bini. Ba liire gba dɛ di danseɛ gɛ waa nɔ ta, dɛkalkɛŋɔ a tel ane ta naa, ba gbagba liire yon ɛɛ ba kɛŋɔ ba ɛ wechɔga, ane ge ta ba gbagba liire yon ɛɛ ba kɛŋɔ ba ɛ wedɛɛga. 16Waa nɔ bwaa dɛɛ ba ɛɛ awola Korowii aa dɛ ba nɛra wechɔga baa ɛa dɛɛ sɔh la ne bochaah lee asɛ Yeesu Kristo pa bole la ta. Gɛɛ me Amanesoma la ɛɛ bagle. 17Asɛ he naate haa dɛ yerɛ he te Juda te, dɛ kpɔ he sie dawɛ Mosis Mmara la ta dɛ kpɔ Korowii dɛɛ ta nyoa la ge sɛh? 18He jemɛ gɛ Korowii aa dɛ nyin kɛ hɛɛ ɛ, dɛ jemɛ Mmara la, dɛ jemɛ waa aa wera bwa. 19Kɛ he dɛ yerɛ he te nɛn waa jemɛ waa dɛɛ bagle nɛra baa wola wobɛlbwa jemɔɔ? Kɛ he ŋɔ henee ɛ nii dɛɛ chaah nɛra baa lɔ biro ta laɔ? 20Wejema bwa ne Korowii wobɛlbwa lɔ Mmara la bini, anomanta he kpɔ he te kɛ wejereme dɛɛ bagle gɛna ne bamuge wa. 21Haa dɛ bagle he dɔŋa waa nɔ, ɛrɛɛ haa wola won bagle he te gbagba ɔ? Haa dɛ ŋɔ nɛra be ŋɔ ba bɛ dɛɛ ŋwɛ asɛ dɛ te dɛɛ ŋwɛ nɔ sɛh? 22He tenten nɔ, he ŋɔ nɛra bɛ ba bala haahna ne ba bala jaranar dɛɛ nyin. He gbagba, haa gɛ ɛa? He ŋɔ he kii voga, heyaa gee bera dɛɛ ŋwɛ kwaa a deene bini. 23Heyaa kpɔ Mmara la dɛɛ ta nyoa, heyaa gee wola a ta teŋɛ, asɛ nɛra koh he we-ɛɛla waa dɛɛ ɛ Korowii nɛnhɛla. 24Korowii Tɔn baglɔ ŋɔ, "He Juda tenaa gela nɛra baa wola Juda tena ɛɛ la siwi sa Korowii la." 25He dɛ teŋɛ Mmara la ta naa, dɛ he pena teŋa nɔ dɔ mun. Kɛ dɛ haa Mmara la ta teŋaa, ate he fe gel he pena teŋa bɔ. 26Nɛra baa wola Juda tena ɛɛ baa wola ba pena teŋe la, ba dɛ teŋɛ Mmara la ta naa, haa jemɛ kɛŋɔ Korowii ɛɛ lɛɛ baa kɛŋɔ nɛra baa teŋe ba pena aa? 27He Juda tena te jemɛ Mmara nɔ dɛɛ teŋe he pena, kɛ he bane aa Mmara la ta teŋɛ. Asɛ nɛra baa wola Juda tena ɛɛ la ge, baa ba pena teŋe, kɛ ba bini bane dɛ teŋɛ Mmara la ta. Ba we-ɛɛla ɛɛ geloo Korowii pa heyaa bolchɔge. 28Nɛn waa ɛ Juda te, wobɛlbwa aa wola toole dɛɛ bagle kɛ o ɛ Juda te dɛ ja o pen teŋa gbo ta la, Juda te tenten laa on. Penteŋa dɔ mun. 29Waa aa dɛ bagle kɛŋɔ nɛn ɛ Juda te tenten la, bambile binii a do. Korowii Domadɛɛge laanee dɛɛ ba toma ɛɛ he bambile bini ásɛ he won ɛ Juda te tenten. Mmara bɛlbwa aa gɛ bambile nɔ tɛ. Nɛn Korowii Domadɛɛge la aa chao asɛ o bambile bini waa ɛɛ bagle kɛŋɔ o ɛ Korowii nɛn la, nɛwɛnyini laa dɛɛ ba o kpɛɛra, Korowiirii dɛɛ ba o kpɛɛra.

will be added

X\