Room 15

1Ya nɛra ya yarada aa kana la, a chɛ kɛ yaa lawɛ bambile banɔ la ba yarada aa wola kanɛ la nɛɛ dɛɛ cha ba. A ta chɛɛ kɛ yaa ɛ ya gbo tetoowa. 2A chɛ kɛ ya bɛlbwa ɛɛ ɛ waa aa wera dɛɛ tɛ ya dɔŋa ásɛ a cha ba asɛ ba won che kiŋkiŋ. 3Yeesu Kristo aa lɔ harɛ ta la, dɛ o tetoowaa laa wɛɛ ɛ. Korowii Tɔn bolɔ ŋɔ, "Korowii, chɛga baa chɛgɛ la, anee ba kpɔ tɛ mɛ." 4Wobɛlbwa ba faa chwera la, dɛ yanee ba chwera tɛ kɛŋɔ yá hweli waa le a ta. A gɛ waa nɔɔ dɛɛ ja yaa bambile dɔe ta, dɛɛ do yaa gbemba, ásɛ a che a ta ya dɔ hwɛga. 5Korowii waa dɛ tɛ nɛn bambile dɛɛ do gbemba la, on dɛ tɛ heyaa nyopɛo teŋa haa dɛ teŋɛ Yeesu Kristo nɛɛ la ta, 6ásɛ he pɛ dɛ kpɔ nyopɛo kpɛɛ ya Dɔɔ Yeesu Kristo Mɛɛ Korowii. 7Anomanta la nɔ, hé lɛ nɛra dɛɛ ja he nɛɛ gɛ Yeesu Kristo aa lɛ heyaa la, ásɛ nɛra na dɛ tɛ Korowii jirima, 8dɛkalkɛŋɔ Yeesu Kristo wono ɛ toma Israel tena bini asɛ dɛ chagle kɛ Korowii waa dɔ kasinteŋ. Anee Korowii ɛ dɛ chugri o nyobaga waa bagɛ Israel tena naanar la, 9ásɛ a che a ta nɛra baa wola Israel tena ɛɛ la ge kpɛɛ Korowii kɛŋɔ waa dɛ sune nɛra nɛɛ kohona. Ba chwerɛ Korowii Tɔn bobɛl kɛŋɔ, "Anomanta mɛɛ yerɛ he sɔn nɛra baa wola Israel tena ɛɛ baahnee, dɛ go yela kpɛɛre." 10dɛ berɛ chagle bobɛl ge ŋɔ, "He nɛra haa wola Israel tena ɛɛ, hé pu Israel tena hɛgre," 11dɛ berɛ chwerɛ ŋɔ, "Nɛra haa wola Israel tena ɛɛ, hé bwa jam N Naa Korowii, dɛ go yela kpɛɛro." 12Asɛ Aesaya ge bol ja, dɛ ŋɔ, "Jese naa bɛl ɛɛ bao. On dɛ ir dɛ di kora nɛra baa wola Israel tena ɛɛ nɛ. O nɛɛ baa ba hwɛga dɔe." 13Korowii waa gela ya dɔ hwɛga Yeesu nɛɛ la, ó tɛ heyaa silɛɛ ne bansɔɔhna he yarada haa dɛ yarada Korowii la ta, asɛ Kórowii Domadɛɛge ge cha heyaa asɛ he won dɛɛ hwɛgɛ Yeesu nɛɛ kohona. 14Yabalawa, n gbabir jemɔ kɛrɛdɛ kɛŋɔ he dɛ ɛ wedɛɛga taeh. He jemɛ waa kohona, dɛ won dɔŋa waa bagla ge. 15He nyiŋo na naa, n tɔn nɔ maa chwerɔ nɔ, n di heyaa kasinteŋ waane ta dɛɛ lii heya. Korowii aa sune n nɛɛ dɛ kpɔ o toma nɔ do n nɔn ta ŋɔ mɛ́ɛ bagle nɛra baa wola Israel tena ɛɛ la, a waa n won di heyaa kasinteŋ gɛ la. Maa dɛ bol Yeesu Amanesoma la dɛɛ bagle he nɛra haa wola Israel tena ɛɛ la, n kpɔ n te ɛ kɛŋɔ Sɔfo waa lɛ nɛra kwaa ɛ saraha dɛɛ tɛɛ ba Korowii Dea bini la. N dɛ nyin he no a waa dɛ yaradaa ásɛ Korowii Domadɛɛge won laa he doŋa kpɔ he nɛɛ asɛ he ɛ Korowii nɛra. Belaa ń won kpɔ heyaa tɛ Korowii kɛŋɔ baa ɛ saraha dɛɛ tɛo la, asɛ he waa su o siwi o lɛ heya. 17N ne Yeesu Kristo aa pɛa nomanta, n won n te maŋkurae toma maa ɛa dɛɛ tɛ Korowii nɔ ta. 18Waa Yeesu Kristo aa chegɛ n nɛɛ dɛ ɛ he nɛra haa wola Israel tena ɛɛ bini la, maa lii kɛŋɔ mɛɛ won bol anfala ane ja a ta. A gbo waa n jemɛ. Anee kɛŋɔ taraken haa yarada Korowii waa nɔ. Waa Yeesu aa cha mɛ mɛɛ bol dɛɛ bagle heya, ne waa waa cha mɛ mɛɛ ɛ, 19ne wekpega ne nyokpowaa Korowii Domadɛɛge la kpegri aa gela mɛɛ ɛ la bwa gelɔ he yarada Korowii waa nɔ. Taraken nɔ, le Jerusalam ka le Ilirikumwa le bwa, n bol Yeesu Kristo Amanesoma nɔ bela. 20N ɛ n liire wubwa kɛŋɔ mɛɛ bol Yeesu Amanesoma nɔɔ. Kɛ harɛre baa bol o waa a ta la, a ta laa mɛɛ bola. A waa laa aa, dɛ nomɛl toma waa pa a mun cheg la taa n kpɔ dɛɛ choŋi la. 21Ba chwerɛ Korowii Tɔn bini ŋɔ, "Nɛra nomɛlbwa aa wola o waa bolɛ ba be ka la, baa no o waa, dɛ jemɔ." 22Anɔ waa maa wola bɔr dɔe dɛ ba he be kera aŋwɛnɛ bwa la. 23Kɛ taraken nɔ maa tonɛ n toma bonɔ nɔ, asɛ n sie che chiŋ bene aŋwɛnɛ nɔ bwa kɛŋɔ ń ba na heyaa nɔ, 24n dɛ nyin kɛŋɔ n ba dɛ kaa Speen harɛ ta naa, ń na heya. N jemɔ kɛŋɔ n baa so he be tɔpera anɛ, dɛ le bela dɛɛ kaa Speen harɛ ta naa, hɛɛ cha mɛɛ. 25Taraken nɔ, kwaane nee mɛɛ ba ń ba kaa Jerusalam dɛ ka tɛ Korowii nɛra baa lɔ bela la. 26Ba bala baa lɔ Makidoonia harɛ ne Akaaya harɛ tata koŋkwaare ane ŋɔ ń kpɔ ka tɛ Jerusalam Korowii nɛra ba soga bini aa kpega tɛɛ ba la. 27Ba sie lɛo kɛŋɔ baa ta kwaa la la. Kasinteŋ, baa won jam Jerusalam Korowii nɛra la ka tonɛ, dɛkalkɛŋɔ gɛ Korowii aa cha Israel tena asɛ nɛra baa wola Israel tena ɛɛ di ba tɔnɔ la, gɛɛ a chɛ kɛ dɛ nɛra baa wola Israel tena ɛɛ la ge dɔ harɛ bonɔ kwaa aa, Israel tena ge di ba tɔnɔ. 28Dɛ n kpɔ ba suuga bwa ka do ba nɔn ta tonaa, mɛɛ ba kaa Speen harɛ taa. Kɛ mɛɛ che he bee. 29N jemɔ kɛŋɔ dɛ n ba he be naa, Yeesu Kristo ɛɛ cha mɛɛ kɛrɛdɛ ásɛ n ge ba cha heyaa kohona. 30Yabalawa, n kpɔ ya Dɔɔ Yeesu Kristo ne nyina Korowii Domadɛɛge la aa gela yaa nyin dɔŋa la dɛɛ soŋe heyaa kɛŋɔ he cha mɛ dɛ swɛɛ siwi soŋe Korowii tɛ mɛ. 31Hé soŋe Korowii tɛ mɛ ásɛ o kpɔ nɔn tɔ n nɛɛ Judia harɛ tena baa wola Yeesu yarada la bini, ásɛ waa maa dɛ la ka ɛ Jerusalam Korowii nɛra bini la, bá sie lɛ a ta, 32asɛ dɛ Korowii sɛoh waa, ń ba he be silɛɛ ne, dɛ ba onɛ tama. 33Korowii waa dɛ tɛ yaa deŋnesɔɔhna la, ó cha he bwa. Aamen.

will be added

X\