Room 14

1Dɛ Kristo te bɛl lole, o yarada aa wola kanɛ wɛɛ nyin o jo he bini naa, hé lɛo do he bini. He bɛ o we-ɛɛla aa korɛ he kwaa ta la dɛɛ tɔŋle. 2Bɛl yarada gelɔ o won komɛlbwa dii, asɛ naate o yarada aa wola kanɛ la, o gee di papooni ne taŋna gbo, waa ol di. 3Naate waa dɛ di komɛlbwa la, a ta chɛɛ kɛŋɔ wɛɛ lii naate waa wola ol di la nɛndoŋ. Naate waa wola ol di la, o bɛ naate waa dɛ di komɛlbwa wechɔg-ɛɛ dɛɛ lii, dɛkalkɛŋɔ Korowii lɛo dɛ ɛo o bie. 4Henee umeo he won pwah nomɛl bonɔɔ nɔ? O dɔɔ gbagbaa dɔ ŋwɛnɛ kɛŋɔ o won bagle kɛ o bonɔɔ dɛ ɛ waa kɛɛ waa waa ɛ. Waa ɛ ya Dɔɔ Yeesu Kristo bonɔɔ la nomanta, wɛɛ ɛ waa, dɛkalkɛŋɔ wɛɛ wonoo chao o ɛ wa. 5Nomɛl ɛɛ dɛɛ liiruu kɛŋɔ tɔpere bɛl ɛ onjen gwaa bɛl, asɛ bɛl gee lii kɛŋɔ tɔpere bwa kɛrɛdɛ. A chɛ kɛ bɛlbwa jemɛ anɔ la aa wera kɛŋɔ o ɛ ne anɔ la aa wola were o nyu bini. 6Nomɛlbwa waa dɛ lii kɛŋɔ tɔpere bɛl ɛ onjen dɛ gwaa bɛl la, o dɛ tɛ Korowii duure, a waa wɛɛ ɛ gɛ. Nomɛlbwa waa dɛ di komɛlbwa la, o dɛ tɛ Korowii duure, a waa wɛɛ ɛ gɛ, dɛkalkɛŋɔ o dɛ jam Korowii kondikwaa la wa. Nomɛlbwa waa dɛ ki kondikwaa ane soo dii la, o ge dɛ tɛ Korowii duure, a waa wɛɛ ɛ gɛ. O gba dɛ jam Korowii. 7Ya bini bɛlbwa toole dɛ so le dɛ tɛ o gbo, bɛlbwa ge toole o seo ɛ o gbo wa. 8Yaa lɔ mkpa ta nɔ, dɛ ya Dɔɔ Yeesu waa ya do le. Dɛ ya baa sewɛ ge aa, dɛ onee ya sewɛ tɛ. Anomanta, ya lɔ mkpa ta noo, sewaa ya sewoo, ya Dɔɔ Yeesuu dɔ yaa. 9Yeesu Kristo seo waa sewa dɛ ir la, o ɛ gɛ dɛ́ ɛ weera ne lala bwa dɔɔ. 10Aah dɛ bɔkwaa gela he nɛra haa wola ol di ɛɛ pwah he bala baa dɛ di komɛlbwa nɔɔ? He banɔ la haa dɛ di komɛlbwa ge la, bɔkwaa gela hɛɛ lii he bala baa wola ol di nɛndoŋa nɔɔ? Ya bwa ɛɛ che Korowii siee, asɛ o bol ya waa dɛ pa bole. 11Korowii Tɔn baglɔ kɛŋɔ, "N Naa Korowii bolɔ ŋɔ, 'N ŋwɛɛrɔ kɛŋɔ nɛra bwa ɛɛ guŋ mɛ harɛɛ, asɛ nomɛlbwa di kasinteŋ kɛŋɔ Korowiirii men.' " 12Anomanta la nɔ, ya bɛlbwa ɛɛ bagle o toma waa ɛa Korowii siee. 13Aa do gɛ nɔ, yá gel dɔŋa pwaeh la. Waa aa chɛ kɛ yaa ɛ laanee kɛŋɔ ya ɛ ya liire kɛŋɔ waa aa gel ya dɔŋa lɔ naa dɛ chole kɛɛ ba ɛ wechɔga la, yaa gel a ɛɛ. 14Pɛɛ n ne n Dɔɔ Yeesu aa pɛa nɔ gelɔ n jemɛ kaih kɛŋɔ kondikwaa bɛlbwa toole dɛ ɛ kondikondoŋa. Kɛ dɛ nomɛl lii o nyu bini kɛŋɔ kondikwaa ane ɛ kondikondoŋa aa, dɛ a ɛ doŋa dɛ tɛo. 15Dɛ he koh he kondikwaa waa dɛ gel he dɔŋ ɛ wechɔga o tea bini chɔg aa, dɛ he dɛ nyinu waa? O waa Yeesu Kristo koh dɛ sewɛ, anomanta bɛ gel he kondikwaa haa dɛ di la chɔgo. 16Bɛ gel nɛra dɔ ŋwɛnɛ dɛ yerɛ waa haa dɛ liira wedɛɛga la wedoŋa. 17Kondikwaa yaa dɛ di ne anɔ la yaa dɛ ki la ta wejena bɛlbwa ɛɛ Korowii Kora waa bini. Waa aa ɛ wehiah laanee kɛŋɔ gɛ yaa ɛ ya waa su Korowii siwi, ne waa aa dɛ ba deŋnesɔɔhna ne ya ne ya dɔŋa baah ta, ne silɛɛ aa le Korowii Domadɛɛge be. 18Nɛn a gɛ waa nɔ aa hiaoh Yeesu Kristo toma bini la, Korowii sie dɛ lɛ o nɛ, asɛ o wa ɛɛ su nɛwɛnyini ge siwi. 19Anomanta la, a chɛ kɛ ya gel ya siwi swɛɛ waa aa dɛ ba deŋnesɔɔhna ne, ne waa aa dɛ ba gela ya dɔŋa che kiŋkiŋ ta. 20Bɛ kondikwaa waa koh dɛ chɔg waa Korowii aa ɛa. Ya won kondikwaa bɛlbwa dii, kɛ aa were kɛŋɔ ya di kondikwaa aa dɛ ba nɛn ne wechɔga ta laŋa. 21Waa aa togra kɛ hɛɛ ɛ laanee kɛŋɔ ol dii ne sen nyɔe, ne wobɛlbwa aa dɛ ba wona gel he dɔŋ lɔ naa chole la, a chɛ kɛ he laa he te kpɔ a ta. 22Gɛ he liire aa dɛ ɛɛ kondikwaa dii be pera la, kpoŋe a bini gɛ ásɛ a do he ne Korowii gbo baah ta. Nomɛlbwa waa dɛ ɛ wobɛlbwa dɛ jemɛ kɛŋɔ a ŋwɛnɛ taa wɛɛ ɛa, aa wola o liire bini aahna-aahna ɛ la, o na som! 23Kɛ dɛ o dɛ di komɛl dɛɛ ɛ aahna-aahna kɛŋɔ o ɛ kondoŋ kɛɛ o ta kondoŋ ɛɛ yaa, Korowii ɛɛ pao bolchɔgee kɛŋɔ waa dɛ diu, dɛkalkɛŋɔ o waa waa dɛ ɛ la, waa an ɛ yarada ne. Wobɛlbwa ge nɛn aa dɛ ɛ waa wola an ɛ yarada ne, o liire aa wola on kɛrɛdɛ do a ta la, a ɛ wechɔga.

will be added

X\