Room 13

1A chɛ kɛ nomɛlbwa siwi su o harɛ nomonome dɛɛ teŋɛ ba mmara ge ta, dɛkalkɛŋɔ Korowii ta ŋwɛnɛ tɛɛ yaa, nomonome aa lee do. Korowiirii cheg ba. 2Nomɛlbwa waa vɛh o harɛ nomonome mmara ta teŋa la, dɛ waa Korowii aa chegaa o vɛh. Wɛɛ di bolchɔgee. 3Nɛra baa dɛ ɛ wedɛɛga la, baa nomonome ɔmɛ. Wechɔg-ɛɛraa dɛɛ ɔm ba. Haa nyin kɛ hɛɛ ɔmɛ nomonome sie chega aa, amɔ dɛɛ ɛ wedɛɛga. He dɛ ɛ wedɛɛga aa, baa kpɛɛree, 4dɛkalkɛŋɔ Korowii bonɔɔnaa ban. He kɛrɛdɛ waa baa ɛ ba toma la. Dɛ he dɛ ɛ wechɔga te naa, dɛɛ ɔmɛ nomonome, dɛkalkɛŋɔ pɛɛpɛɛ laa ba dɔ kpegri baa kpoŋa la. Korowiirii tɛɛ ba kpegri ásɛ ba tɛr wechɔg-ɛɛra deŋne dɛɛ tɛo. 5Anomanta hé gel he siwi ɛɛ su he nomonome. Korowii bala waa dɛ ba bala dɛ ba tɛr he deŋne la gbo waa laa a chɛ kɛ he siwi ɛɛ su ba. Dɛ he siwi aa ban su aa, dɛ he gbabir liire aa gel he bambile sɔɔhne. 6A waa a do wer kɛŋɔ hɛɛ bɔ lampoo ge la, dɛkalkɛŋɔ nomonome baa do lampoo lɛɛ mmara nɔ la, Korowii tomaa baa ɛ gɛ la. 7Anomanta komɛlbwa aa chɛ kɛ he tɛ nɛn la, tɛo. Dɛ he nyu lampoo yaa, bɔ. Dɛ he kondɔɔh bɛlbwa ge lampoo yaa, bɔ. Dɛ duuree a chɛ kɛ he tɛ nɛn aa, tɛo, dɛ jirimaa a chɛ kɛ he tɛ nɛn aa, tɛo. 8He bɛ kem di wobɛlbwa ta a chɔ le kpa heyaa ka ja dɔŋa nyina ta. A gboo ɛ kem aa chɛ kɛ he di. Nomɛlbwa waa wona dɛɛ nyin o dɔŋ la, o tonɛ Korowii mmara la bwa. 9Korowii mmara aa chagla kɛŋɔ, "Bɛ jwamane bɔ, bɛ nɛn kpo, bɛ ŋwɛ, bɛ gel he sie begre he dɔŋ kon la," a ne anɔ la aa kaa la bwa lɔ a gɛ mmara beŋkpoŋ nɔ waa dɛ bagle kɛ, "Nyin he dɔŋ kɛ he gbagba" nɔ ta. 10Nɛn haa dɛ nyinu la, haa on wechɔgaa ɛ bwa. Naate waa dɛ nyin o dɔŋ la, dɛ o dɛ teŋɛ Korowii mmara la bwa ta. 11Hɛ́ɛ nyin dɔŋa, dɛkalkɛŋɔ he jemɔ kɛŋɔ tɔpere la telo. He jemɔ kɛŋɔ a telo kɛŋɔ dɛ chɔe he chɔ a, he ir! Ya lɛɛ tɔpere la joɔ tonɛ taraken dɛ gwaa gɛ saŋ yaa kpɔ ya te tɛ Yeesu dɛ pa mun dɛɛ teŋɛ o nɛɛ la. 12Tɔpere waa kaa bɔr chaah la aa kanɛ kpa. Tɔɔ perɔ tonɛ. Hé gel ya gel waa aa ɛ biro bini waa ɛɛ, dɛ kpɔ bochaah laala do dɛ won yo biro bini wa. 13Hé gel ya lawɛ ya te kɛrɛdɛ, dɛ do kɛ nɛra bɔr aa chaah ba nɛ, dɛ warɛ dɛ valɛ dɛɛ do gbɔga ne sennyɔdɛɛ waa toole kpa, hahnyin ne banyin ne wedoŋa toole kpa, nagrenyin ne bɔweela toole kpa. 14Hé kpɔ ya Dɔɔ Yeesu Kristo waa ɛ dɔmkwa dɛ laa sie kpɔ he nɛwɛnyini mar wechɔga aa suu nɔ tetoowaa ta.

will be added

X\