Room 12

1Anomanta yabalawa, n dɛ soŋe heya. Hé nyiŋi Korowii suna waa sune ya nɛɛ la dɛ kpɔ he te tɛo. Gɛ baa kpɔ kondɛɛga aa chɛ Korowii dɛɛ su o siwi dɛ kpo dɛ ɛ saraha tɛo dɛɛ tomɔ la, hé ge kpɔ he te kɛŋɔ gɛ saraha la, dɛ laa doŋa bɛlbwa kpɔ he nɛɛ dɛɛ tomɔ he bokpega ne. Gɛɛ a chɛ kɛ hɛɛ tomɛ Korowii. 2He bɛ nɛra baa dɔ harɛ nɔ ta liire la da kpɔ. Hé gel Korowii tɛ heyaa liifala dɛ berɛ heyaa asɛ he won jemɛ waa waa dɛ nyin, dɛ jemɛ waa aa wera o be dɛɛ too o tea, ne waa aa togra. 3N chegɛ suna Korowii aa sune n nɛɛ dɛ kpɔ o toma do n nɔn ta nɔ ta dɛɛ ja heyaa kɛ gɛ bɛlbwa haa doa la, gel ba nae gɛ. Bɛ́lbwa pwɛr o te dɛ won jemɛ waa Korowii aa tɛo yarada ŋɔ ó kpɔ ɛ. 4Ya bwadabii ɛ kombeŋkpoŋ, dɛ dɔ nyu, ne nɔɔra, ne nakpale, ne amesoore bwa. A bwa ge ne a tomaree. 5Gɛɛ ya gba do. Ya warɔ te, kɛ ya ne Yeesu Kristo aa pɛa nɔ, ya bwa ɛ beŋkpoŋ, ya bɛlbwa ge lole tɛ ya dɔŋa. 6Kpegri Korowii aa cha ya bwa ya dɔ kokogrɔ. A chɛ kɛ ya bɛlbwa kpɔ kpegri Korowii aa sune o nɛɛ dɛ tɛo la ɛ toma. Dɛ Korowii Waa bola kpegri o kpɔ tɛɛ naa, a chɛ kɛ hɛɛ bola gɛ del he yarada aa doa. 7Dɛ he dɔŋa toma kpegri Korowii tɛɛ naa, a chɛ kɛ hɛɛ ɛ gɛ. Dɛ waa bagla kpegri gee o tɛɛ naa, a chɛ kɛ hɛɛ bagle. 8Dɛ nɛra gbemba doe kpegri Korowii tɛɛ naa, a chɛ kɛ hɛɛ ɛ gɛ. Dɛ dɔŋa kwaa kɛɛ kpegri o tɛɛ naa, a chɛ kɛ hɛɛ ɛa bambile bwa ne. Dɛ waa sie tɔe kpegri o tɛɛ naa, a chɛ kɛ hɛɛ ɛa tea bwa ne. Dɛ wedɛɛga ɛɛ kpegri o tɛɛ naa, a chɛ kɛ hɛɛ ɛa tepoŋ ne. 9Hɛ́ɛ nyin dɔŋa bambile bwa ne. Hé hah wechɔga te bɛlbwa, dɛ lawɛ wedɛɛga te bɛlbwa bini kpoŋe kiŋkiŋ. 10Hé lawɛ dɔŋa kɛ nyabii, dɛɛ tɛ dɔŋa duure gwaa gɛ haa dɛ lii he te gbagba. 11Hé laa bɔhwaah kpɔ he waa bini, dɛ do gbemba dɛɛ tomɛ ya Dɔɔ Yeesu Kristo. 12Haa dɔ hwɛga nomanta, hé gel he sie lɛ. Wobɛlbwa pu heya aa, hé lawɛ bambile. Hé swɛɛ siwi dɛɛ soŋe Korowii saŋ bɛlbwa. 13Hɛ́ɛ tɛ he dɔŋa asɔre tena ba soga bini aa kpega tɛɛ ba he kwaa haa dɔa la ane. He bɛ hɔɔhra dɛɛ doŋi he deremi. 14Hé soŋe wedɛɛga Korowii be dɛɛ tɛ nɛra baa chegɛ he nɛ. Hé soŋe andɛɛga dɛɛ tɛɛ ba, he bɛ wechɔga soŋe dɛɛ tɛɛ ba. 15Nɛra lɔ silɛɛ bini naa, hé puu ba he ne ba lɛ sie. Ba dɛ wi ge aa, hé ne baa wi. 16Hé ne he dɔŋa so sodɛɛga. He bɛ jenu dɛɛ ɛ, he bɛ he te pere dɛɛ le nyaara ne nɛŋgwɛgra bini. He bɛ he te wejerema kohona dɛɛ lii. 17He bɛ wechɔga kpɔ dɛɛ bɔ wechɔga kem. Hɛ́ɛ ɛ waa aa wera nomɛlbwa be. 18Dɛ aa magroo waa, hɛɛ wonoo waa, hé takapɔ asɛ wechɔga bɛlbwa bɛ he ne nomɛlbwa baah do. 19Yabala, nɛra ɛ heyaa wechɔga aa, he bɛ ane ɛ dɛɛ bɔ kem. Hé kpɔ tɛ Korowii. O baah dɛ di ba nɛɛ taeh. On dɛ bɔ ba kem, dɛkalkɛŋɔ ba chwerɛ Korowii Tɔn bini ŋɔ, "Korowii bolɔ ŋɔ, 'Mɛɛ tɔ a pegee, mɛɛ bɔ ba a kemee.' " 20He bɛ waa kem dɛɛ bɔ. Hɛ́ɛ ɛ gɛ Korowii Tɔn aa ŋɔa hɛ́ɛ ɛ la. "He dɔm chɔ lɔr aa, tɛo kondikwaa ó di. O ta nee dɔe dɛ́ nyɔ aa, tɛo ane. He ɛ ken aa, sihiih dɛ ba o kpoe o baŋa gole." 21He bɛ gel liichɔga lɛ he lem. Hé kpɔ wedɛɛga dɛɛ tɔ wechɔga ŋwɛnɛ.

will be added

X\