Room 11

1N dɛ bɔɔ heyaa ŋɔ: Korowii vɛh o nɛra Israel tena kɛɛ? Akai! N gbabir nɔ, Israel tee men. N ɛ Abraham naa dɛ le Benjamen dea. 2Korowii ta nɛra o faa lee ba cheg wubwa ba ɛ o nɛra la vɛɛh. Kɛ he jemɛ gɛ Korowii Tɔn aa bol Korowii keame Elaeja waa ŋɔ o chɔg Israel tena tɛ Korowii laɔ? 3O bolɔ ŋɔ, "N Naa Korowii, ba kpoo he keamere dɛ hugri bela baa kpoo kwaa dɛɛ tɛɛ bwa. N gboo kaa, dɛ ba dɛ nyin n gba kpoe." 4Ɛrɛɛ Korowii chaŋe Elaeja ɔ? O chaŋo ŋɔ, "N ta dɔ nɛra kagboŋa banuanɛ bane ba do le dɛ ɛ n nɛra baa wola vog Baal guŋe bwa." 5Gɛɛ a do taraken. Nɛra tama bane ta lole Korowii aa na ba sum dɛ lee ba ba ɛ o nɛra. 6Ba we-ɛɛla ta laa a che o lee ba. Ba sumii o na dɛ lee ba ba ɛ o nɛra. Dɛ ba we-ɛɛla taa a fe che o lee ba ba ɛ o nɛra aa, dɛ suna baa ŋɔa Korowii dɛ sune nɛwɛnyini nɛɛ dɛɛ cha ba la ta mun dɔe. 7Ɛrɛɛ yaa ba ŋɔe yɔ? Gɛ Israel tena aa dɛ nyin kɛ ba waa su Korowii siwi la, ba ta gɛ dɔe. Nɛra tama Korowii aa lee ba ba ɛ o nɛra la, ba waa su o siwi. Ba kar taŋ deŋne Korowii be. 8Anee ba chwerɛ Korowii Tɔn bini ŋɔ, "Korowii saa ba liire, dɛ tɛɛ ba sie aa wola kasinteŋ laanee na, ne deŋna aa wola kasinteŋ laanee no, dɛ kpoŋe ba le fini tɔpere nɔ" la. 9Ya nabaa Devid bolɔ ŋɔ, "Korowii, gɛ saŋ baa dɛɛ di kwaa dɛɛ lɛ ba sie la, gel siswɛm pig ba. Gel waa ba sie aa dɛ lɛ a ta la ɛ kon baa lɔ naa o ta dɛɛ chogli, dɛ ɛ bel dɛɛ lag ba, asɛ ba wa ɛɛ gure ba nɛ. 10Gel ba sie tɔɔge ba bɛ kasinteŋ la dɛɛ na, asɛ dɛɛ na wahala saŋ bɛlbwa." 11Mɛɛ bɔɔ webeŋkpoŋii ja: Israel tena aa lɔ naa dɛ chole la, ba denɔ chole baa wola won ir kpa aa? Akai! Baa iruu, kɛ ba wechɔga la taa a che Korowii lɛɛ waa lɛ nɛwɛnyini la maa nɛra baa wola Israel tena ɛɛ ásɛ Israel tena na ba bwara wee ba. 12Israel tena wechɔga baa ɛa la ba wedɛɛga ne ba tɛ nɛwɛnyini, asɛ ba chola baa chola dɛ paŋɛ kwaa Korowii be la ge ba wedɛɛga tenten ne dɛ ba tɛ nɛra baa wola Israel tena ɛɛ. Israel tena chola la kwaraa aa ba wedɛɛga ne ba tɛ nɛwɛnyini nɔ, dɛ ba bwa lɛ Korowii wa aa, ɛrɛɛ aa ba doe yɔ? 13He nɛra haa wola Israel tena ɛɛ la, he bee mɛɛ bol waa nɔ: Korowii aa lee mɛ ŋɔ ń ɛ Yeesu torome he be nɔ, mɛɛ maŋkura n toma nɔɔ. 14Bɛl lole n bwɛɛ tena na gɛ naa, aa we ba nɛɛ, asɛ a che a ta ba bane lɛ Yeesu waa nɔ. 15Aa chegɛ Israel tena ne Korowii baah chɔga ta asɛ nɛwɛnyini kabora ne Korowii baah kwaa nɔ, dɛ Korowii berɔ lɛ Israel tena dɛ kpɔ ba ɛ o bii aa, bɔkwa nee aa ba balaɔ? Aa ba silɛɛ nee kohona, kɛŋɔ lala bwa aa ir seo ta. 16Dɛ kon pera wer dɛ chɛ Korowii aa, dɛ o kar la bwa ge wer. Dɛ daa lune wer dɛ chɛ Korowii aa, dɛ o ne o kpala bwaa. 17Moo laa pala dɛɛ kaa nyundua la aa? Israel tena do kɛ kobaah ɔleve da. Ba teŋe o kpala ane ta, dɛ kpɔ hen haa wola Israel te ɛɛ dɛ do kɛ kpɔg baah ɔleve daa kpale, dɛ ba vɔrɔwe marɛ kobaah kon la bɛl bug ta, asɛ hɛɛ nyɔ o nedɛɛga dɛ di, dɛ dɛg. 18Anomanta bɛ kena dɛɛ kpagri daa kpala la baa kɛa ta la nɛ. He mbarafo mun ɔ? Daa kpale laa hen kɛɛ? Hen gela daa la lune do le kɛɛ an gela he do le nɔ? 19He te ɛɛ ŋɔɔ he waa ba kɛ daa la kpala la ta asɛ dɛ vɔrɔwe marɛ. 20He ŋɔ gɛ naa, kpelaa he ŋɔ. Baa wola Yeesu waa la yaradae waa ba teŋ ba ta. He ge aa yarada Yeesu waa la, a waa he ta che la. Anomanta bɛ mbarafo dɛɛ ɛ. Pwɛr he te dɛɛ nyiŋi kɛrɛdɛ. 21Israel tena kwaraa baa ɛ daa la tenten pera la, Korowii kɛ ba ta. He tenee dɛ ɛ deŋnekpeg, waa wola heyaa kɛ ta aa? 22He nyiŋo na naa, dɛ he jemɔ kɛŋɔ Korowii tea som, kɛ o waa ge kpegri taeh. Nɛra ba deŋne aa kpega baa wola o ŋwɛnɛ ta teŋɛ la, o dɛ nyiŋ ba sinyɛga ne. Kɛ dɛ hɛɛ dɛɛ teŋɛ o ŋwɛnɛ taa te naa, wɛɛ ta tea tɛ he te. Kɛ dɛ he ta o ŋwɛnɛ ta teŋaa, wɛɛ kɛ he gee ta. 23Dɛ Israel tena berɔ yarada Yeesu waa la te naa, Korowii ɛɛ berɔɔ lɛɛ ba do ba bug ta, dɛkalkɛŋɔ aa kpege o be. 24Korowii laa gela ba teŋe he nɛra haa do kɛ kpɔg baah ɔleve daa kpala dɛ ba vɔrɔwe marɛ kobaah ɔleve daa kpul ta nɔ naa, ba fe aa an gɛ ɛ wubwa. Aah dɛ Korowii won he nɛra haa do kɛ kpɔg baah ɔleve daa kpala kwara kɛɛ dɛ vɔrɔwe marɛ kobaah kwaa kwaraa ta a magre aa, Israel tena baa do kɛ kobaah ɔleve daa kpala waa kɛa ta la, ɛrɛ waa o berɔ kpɔ ba vɔrɔwe marɛ ba bug ta aa wola magre ɔ? 25Yabalawa, wesɔɔhla anee mɛɛ nyin kɛ he jemɛ, ásɛ dɛ jemɛ kɛŋɔ wobɛlbwa laa he den jemɛ. Anee kɛŋɔ Israel tena nɔ bane deŋnekpeg baa dɛ ɛ nɔ, ken laa aa ba kae. Nɛra baa wola Israel tena ɛɛ Korowii ɛɛ nyin kɛ o lɛɛ ba la, ba tel gɛ del waa dɛ nyin la aa, Israel tena ɛɛ gel ba deŋnekpeg nɔɔ. 26Anomanta, Korowii ɛɛ lɛ Israel tena bwaa dɛ ɛ o bii, kɛŋɔ Korowii Tɔn aa bagla la. O baglɔ ŋɔ, "Nɛwɛnyini Lɛɛ la ɛɛ le Saayɔnee ba, dɛ ba le Israel tena waa aa gela baa wola Korowii waa ta teŋɛ bwa la ta. 27Fɔo n ne baa fɔwɛ laanee kɛŋɔ mɛɛ lee baa ba wechɔga ta." 28Israel tena aa vɛh Yeesu Amanesoma la nomanta, ba berɛ Korowii dɔma, asɛ a le wedɛɛga tɛ heya. Kɛ baa ɛ nɛra Korowii aa chal ba la nomanta, o ta dɛ nyin ba taeh. Nyoa waa bagɛ ba naanar la, a waa o taa nyin ba la. 29Korowii te dɔɔ ŋɔ o nɛnee nɛn, dɛ ŋɔ wɛɛ ɛo wedɛɛgaa yaa, waa nsana le. 30Gɛ he nɛra haa wola Israel tena ɛɛ faa wola Korowii waa ta teŋɛ asɛ o koh kɛ Israel tena vɛh o waa ta teŋa asɛ dɛ sune he nɛɛ la, 31gɛ tentenee Israel tena aa vɛh Korowii waa ta teŋa la, wɛɛ koh suna waa sune he nɛɛ la waa dɛ sune ba ge nɛ. 32Nɛwɛnyini bwa taŋ deŋne Korowii be, asɛ o koh a waa dɛ pa nɛra bwa bolchɔge. Ŋwɛnɛ bɛlbwa toole yá che o ta dɛ le a gɛ bolchɔge nɔ ta. A ɛ gɛ ásɛ Korowii na ya bwa sum. 33Ei! Korowii liire ne o wejema kan te! Umee dɛ won jemɛ Korowii waa mun ɔ? Umee dɛ won jemɛ o waa bini bwa nɔ? 34Anee Korowii Tɔn bagle la. O bolɔ ŋɔ, "Umee jemɛ Korowii nyu bini nɔ? Umee dɛ won baglo waɔ? 35Ume komɛlee Korowii kemɛ ka a ɛ kɛŋɔ Korowii di o kem dɛ ba bɔɔ wɔ?" 36O ta nomɛlbwa kem dii, dɛkalkɛŋɔ on ta kon te bɛlbwa. O nɛɛ komɛlbwa che dɛ do le, o waa gee a do le. O chɛ jirima saŋ bɛlbwa wee. Aamen.

will be added

X\