1 Yabala, Korowii fe lɛ Israel tena aa, a fe som n be noo! N soŋe Korowii dɛɛ tɛɛ ba ga. 2 Kasinteŋ, n wono bol ba waa kɛŋɔ ba Korowii toma swɛɛ ba siwi te, kɛ baa on tomɛ a ŋwɛnɛ ta. 3 Baa gɛ Korowii aa ɛa dɛɛ lɛ nɛra kɛ nɛndɛɛga ba wa ɛɛ su o siwi jemɛ, anomanta ba gbagba ŋwɛnɛɛ baa kpɔ, dɛ vɛh Korowii ŋwɛnɛ waa chegɛ o ta dɛ gel nɛra wa ɛɛ su o siwi la ta teŋa. 4 Yeesu Kristo bala la teŋe Mosis Mmara ta teŋa ta kɛŋɔ a taa nɛn che Korowii lɛo kɛ nɛndɛɛge o waa su o siwi la. Taraken nomɛlbwa waa yarada Yeesu Kristo waa la, Korowii ɛɛ lɛo kɛ nɛndɛɛgee asɛ o waa su o siwi. 5 Kenii Mosis bol nɛra baa dɛ nyin ba che Mmara ta teŋa ta ásɛ ba waa su Korowii siwi la wa. O ŋɔ, "Nomɛlbwa waa dɛ teŋe waa aa lɔ Mmara la bwa ta la, wɛɛ dɔ mkpaa le Mmara la ta teŋa ta." 6 Kenii Korowii Tɔn bagle nɛra baa che yarada ta asɛ ba waa su o siwi ge wa: "Bɛ he nyu bini lii ŋɔ, 'Umee dɛ la nyundua, kɛɛ dɛ tu bɔluŋ bini dɛ́ ka nyinu ba nɔ?' " Yeesu Kristo ta do kɛ hé kpɔɔ tu harɛ, kɛɛ hé nyinu lala bini ba. 8 Waa Korowii Tɔn aa dɛ bol laanee kɛŋɔ, "Korowii waa la pu heyaa tonɛ. A lɔ he nyoo ne he bambili ta kwara." Yeesu Kristo yaradae waa yaa dɛ bol he be laanee Korowii waa nɔ. 9 Dɛ he nɛn kpɔ nyoa ŋɔ komɛlbwa Dɔɔree Yeesu, dɛ yarada he bambile bini kɛŋɔ Korowii iru seo ta naa, Korowii ɛɛ lɛɛ, 10 dɛkalkɛŋɔ Yeesu Kristo waa la yaradae bambile bwa ne taa a che Korowii ɛɛ lɛ nɛwɛnyini kɛ nɛndɛɛga ba wa ɛɛ su o siwi, asɛ a bola nyoa ne dɔŋa be taa a che Korowii lɛ yaa. 11 Korowii Tɔn baglɔ ŋɔ, "Nomɛlbwa waa yaradao la, sihiih aa o kpoe ba." 12 Israel tena ne nɛra baa wola Israel tena ɛɛ la, ba bwa kɛrɛdɛ Korowii be. Komɛlbwa Dɔɔree Korowii. Nomɛlbwa waa wia dɛɛ yerɔ la, o dɛ chao kohona. 13 Anee Korowii Tɔn bol la, "Nomɛlbwa waa wi yerɛ ya Dɔɔ la, wɛɛ lɛo." 14 Aah dɛ nɛn ta on yaradae dɛ kpɔ o te tɛo waa, ɛrɛɛ wɛɛ ba ɛɛ dɛ won yerɛ o sɔn ó lɛo wɔ? Dɛ nɛn ta o waa noɛ yaa, ɛrɛɛ wɛɛ ba ɛɛ dɛ won yaradao dɛ kpɔ o te tɛo wɔ? Dɛ nɛn ta o waa la bolɛ nɛn be naa, ɛrɛɛ wɛɛ ba ɛɛ dɛ noɔ? 15 Dɛ Korowii ta nɛn tomaa, ɛrɛɛ wɛɛ ba ɛɛ dɛ bol o waa laɔ? Anee kɛŋɔ Korowii Tɔn aa ŋɔa la. O bolɔ ŋɔ, "Nɛra baa kpoŋe amanesoma dɛɛ valɛ la, he no ba bala waa aa, he bambile dɛ sɔɔhne taeh!" 16 Amanesoma la balɔ, kɛ Israel tena bwa laa sɛh a ta teŋa. Korowii keame Aesaya gbagba fa bolɔ ŋɔ, "N Naa Korowii, umee yarada waa yaa bol ba be laɔ?" 17 He nyiŋo na naa, Yeesu Kristo waa la noe taa a che nɛra ɛɛ yaradaa, asɛ a bola ge taa a che nɛra ɛɛ noa. 18 Mɛɛ bɔɔ heyaa webeŋkpoŋii: Kpelaa kɛŋɔ ba ta noɛ yaa? Ba noɔ, dɛkalkɛŋɔ Korowii Tɔn bolɔ ŋɔ, "Ba waa baa dɛ bol la la harɛ ta bobɛlbwa nɛra aa lole, a tel harɛ jaga bwa." 19 N berɔ dɛɛ bɔɔ ja: Israel tena fa ta noɛ yaa? Mosis tɔ sie chwerɛ waa Korowii aa bola, dɛ ŋɔ, "Mɛɛ geloo he dɔ bɔweela nɛra baa wola ban kure dɛɛ ja n nɛra nɛɛ la nɛ, dɛ gel harɛ o nɛra aa gɛna ɛ heyaa he bwaawee ir." 20 Korowii keame Aesaya te kwaraa chwerɛ Korowii wobol ane a gwaa gɛ. O chwerɔ ŋɔ, "Nɛra ba faa wola n bɔr gaage la, ban na mɛ. Nɛra ba faa wola n waa bɔɔ la, banee n kpɔ n te chagle." 21 Kenii o bagle gɛ Korowii aa bol Israel tena ge wa: "Saŋ bɛlbwaa n pagri n nɔɔra kɛŋɔ ń lɛ n nɛra. Kɛ baa men yarada. Ba deŋne kpegri, baa waa ge no."
