Room 1

1Men Pɔɔl maa ɛ Yeesu Kristo bonɔɔ la, men chwerɛ tɔn nɔ. Korowiirii lee mɛ dɛ gel n ɛ Yeesu torome, dɛ kpɔ o Amanesoma tɛ mɛ ŋɔ mɛ́ɛ bol nɛra be. 2A gɛ Amanesoma nɔ waa o che o keamere waa lee ba nɛɛ dɛ bagɛ nɛwɛnyini nyoa a saŋ la la. A waa ba chwerɛ Korowii Tɔn bini la. 3Korowii Bie Yeesu Kristo waa ɛ ya Dɔɔ la, o waa Amanesoma la ɛɛ bagle. O nɛwɛnyini ɛɛ be pera la, Kooro Devid deaa o le, 4asɛ o Korowii ɛɛ ge be pera la, Korowii chegɛ o seo ta ira la ta dɛ bagle kpegri ne kɛŋɔ o Korowii Biee on. 5O nɛɛ Korowii che dɛ sune n nɛ, dɛ cha mɛ, dɛ gel mɛɛ ɛ Yeesu toma dɛɛ bagle nɛwɛnyini te bwa o waa ásɛ ba yaradaa dɛɛ ɛa, ásɛ o dɔ sɔn. 6He Room tena ge ja a gɛ nɛra nɔ Korowii aa lee ba ŋɔ bá ba ɛ Yeesu Kristo nɛra nɔ nɛ. 7He Room tena Korowii aa dɛ nyin heyaa dɛ le heyaa ŋɔ hé ba ɛ o nɛra la, he bwaa mɛɛ chwerɛ tɔn nɔ. Ń Naa Korowii ne ya Dɔɔ Yeesu Kristo bwa na he sum dɛ cha heya, dɛ tɛ heyaa bosɔɔhna. 8Mɛɛ tɔ sie che Yeesu Kristo nɛɛ dɛ jam N Naa Korowii he waa kɛŋɔ haa yarada Yeesu Kristo waa nɔ kohona, asɛ nɛra bwa ɛɛ bol he waa nɔ. 9Korowii maa dɛ tomɔ n bambile bwa ne, dɛɛ bol o Bie la Amanesoma waa la, o jemɔ kɛ saŋ bɛlbwaa n soŋo dɛɛ tɛ heya. Onee n danseɛ te. 10N dɛ soŋo kɛŋɔ dɛ o sɛoh waa, ń fe won ba na heyaa taraken te. 11N sie chegɛ chiŋ mɛɛ nyin kɛ n na heyaa dɛ cha heyaa waane Korowii Domadɛɛge la aa tɛ mɛ ne, ásɛ he do kpegri he teŋa haa dɛ teŋɛ Yeesu nɛɛ la ta. 12Ya bwaa dɛɛ ba dɔŋa chae. Gɛ maa yarada Yeesu Kristo la, aa do heyaa gbembaa, asɛ gɛ he ge aa yaradao la do n ge gbemba. 13Yabalawa, n dɛ nyin kɛ he jemɛ kɛŋɔ saŋ bɛlbwaa n fe ɛɛ nyin kɛ n ba he be, asɛ waa yon dɛɛ tɔ mɛ ŋwɛnɛ. N dɛ nyin n dɔ he bane dɛ tɛ Yeesu Kristo kɛŋɔ maa dɔ bane le nɛra ba ge aa wola Juda tena ɛɛ bini la. 14A chɛ kɛ n bol Yeesu Amanesoma la nɛra bwa be, nɛra baa kaa sie ne banɔ la baa ka mun, nɛra ba sie aa pila ne banɔ la ba sie aa wola pile bwa be. 15Anomanta n siwi swɛɛrɔ mɛɛ nyin kɛ n bol Yeesu Amanesoma la he Room tena ge be. 16Sihiih aa men kpo Yeesu Amanesoma nɔ bola ta. A taa Korowii che dɛɛ bagle o kpegri, dɛɛ lɛ nɛra bwa baa yarada o waa la. Juda tenaa ó tɔ sie lɛ, nɛra baa wola Juda tena ɛɛ ge jao. 17Yeesu Amanesoma laanee dɛɛ bagle gɛ Korowii aa dɛ nyin kɛŋɔ nɛwɛnyini do ásɛ ya waa su o siwi. Le waa la mumpar ka tel a jaga bwa, o waa yaradae waa gboo a bwa. Korowii Tɔn baglɔ kɛŋɔ, "Naate o wa aa togra dɛ su Korowii siwi la, wɛɛ yaradao dɛ dɔ o nyu." 18Korowii baah di nɛra ba wechɔga aa tɔ o kasinteŋ waa la ŋwɛnɛ asɛ a sɔɔh ba la nɛ. O baah dɛ di ba wechɔga la ta kɛrɛdɛ. 19Korowii wobɛlbwa nɛwɛnyini aa wona jemɛ la, o gelɔ ba naa chasee ken. O gbagbaa pili a bini bag ba. 20Dɛ le gɛ saŋ Korowii aa ta harɛ la, o bwara waa nɛwɛnyini aa wola wone dɛɛ na siwi ne, kɛŋɔ o kpegri aa wola jaga dɔe ne o dor bwa, o gelɔ nɛwɛnyini na a bwa. Nɛwɛnyini wono che Korowii kwaa waa taa ta dɛ na o kpegri ne gɛ waa doa. Anomanta nɛwɛnyini aa won ŋɔ baa jemɛ kɛ Korowii lole. 21Nɛwɛnyini jemɔ kɛŋɔ Korowii lole, kɛ baa on duu gɛ aa chɛ kɛ baa duuru. Baa jam kpɔe dɛɛ tɛo. Nɛwɛnyini wechɔga gelɔ ba wili, ba ta liire dɔe kpa. 22Ba dɛ yerɛ ba te wejerema, kɛ gɛna gee ban. 23Korowii te aa sewɛ bwa. Kɛ ba vɛh o toma, dɛɛ tomɛ kwaa ba gbagba aa kwaara a do kɛŋɔ nɛwɛnyini, kɛɛ jumbii, kɛɛ konaatena, kɛɛ kontuuga la. 24Anomanta Korowii ta ba waa tɛɛ ba, asɛ baa ɛ wedoŋa ba bambile aa lawa, dɛɛ chɔ baala ne haahna aa wola Korowii ŋwɛnɛ ta ɛɛ. 25Ba gel Korowii kasinteŋ la toma dɛɛ tomɛ kwaa aa wola kasinteŋ dɔe. Kwaa Korowii aa taa la, anee baa tomɛ, dɛ gel Korowii gbagba. On chɛ kɛ yaa duuru saŋ bɛlbwa. Aamen. 26Ba ken ɛɛ nomanta, Korowii ta ba waa tɛɛ ba, asɛ baa ɛ ba pɛla waa aa ɛ sihiih kohona. Ba haahna kwaraa ne baala aa chɔ kpa, ba ne ba dɔŋa haahnaa dɛɛ chɔ baa ne haah. 27Gɛɛ ba baala ge ne haahna aa wola chɔ kpa, dɛ berɛ dɛɛ pɛlɛ ba bandɔŋa nɛɛ kɛŋɔ haahna ken. Ba ne ba dɔŋa baalaa dɛɛ chɔ baa ne haah. Ba wechɔga baa dɛ ɛ la nomanta, ba dɛ dɔ a kembɔr aa chɔg ba nɛndaa. 28Baa wola sɛɛh kɛŋɔ bá jemɛ Korowii waa nomanta, o ta ba waa tɛɛ ba, asɛ ba liire bwa ɛ anchɔga, asɛ baa ɛ waa aa wola chɛɛ kɛ baa ɛ. 29Harɛ bini wechɔga nɔ bwaa baa ɛ: mur, sibegra, meesɔɔh, bɔweela, nɛŋkpoa, nagra, dɔŋa negra, dɔŋa haeh, ne nɛra ŋwala. 30Baa dɔŋa wedɛɛga bol, ba hah Korowii, ba siwi aa nɛn tɔgɛ, ba jenu, ba mbarafo. Saŋ bɛlbwaa baa nyin ŋwɛnɛfala dɛ́ ɛ wechɔga. Ba siwi aa ba mɛɛnanar ne ba nyare su. 31Ba nya nfɛrɛ, ba waa ta kasinteŋ dɔe, ba chal toole dɔŋa nɛ, ba tea aa nɛn nɛɛ domɛ. 32Ba jemɔ kɛŋɔ Korowii ŋɔ nɛra baa dɛ ɛ ken la, ba chɛ kpoe, kɛ dɛ ge ta na dɛɛ ɛa, dɛ garɛ dɛɛ kpɛɛ nɛra baa dɛ ɛa la.

will be added

X\