Wepila 9

1Nyundua torome waa teŋa nue la hoh o bɛla, asɛ n na wewee bɛl le harɛ. Korowii tɛo Bɔnsam bɔluŋ la safoa. 2Asɛ o laa bɔluŋ la pili. Waa pilu la, chuu leɔ pulll kɛŋɔ nijena chuu aa dɛ le la, asɛ wee bir, bɔr bwa ɛ jwumaa ken. 3Asɛ tontombɛre le chuu la bini dɛ ba harɛ ta. Korowii tɛa kpegri a doma ɛɛ we kɛŋɔ nɔm ken, 4dɛ ŋɔ a be ŋɔ a bɛ harɛ nɔ ta kpɔga kɛɛ papooni kɛɛ daa bɛlbwa chɔg, kɛ á dorome nɛra baa wola Korowii nso la dɔe ba tili ta la. 5O ta an kpegri tɛɛ a dom ba dɛ kpoo ba, kɛ á dom ba dɛ wee ba gɛ nɔm aa dɛ we la, dɛ ka tel korobie anue. 6Asɛ gɛ saŋ baa nyin kɛ seo ba kpoo ba, baa dɔ, asɛ seo chwa le ba be. 7Tontombɛre la le jagre baa kpɔa dɛɛ la ka yo laa. A dɔ kwaane a nyuune ta aa le suugaswɛm koogbɛrɛre, asɛ a sie bɔr le nɛn. 8A dɔ nyumpona kɛŋɔ haah, a nyena le nyujente nyena ken. 9Kwaa tɔ a bambili kɛŋɔ laa batakaare bune aa dɛ bɔle bambile la, asɛ a kena ɛɛ gbɔgre kɛŋɔ jagre aa wara dɛ tɛgre kwaa nɛra yon vɔwɛ pɛl a ta dɛ so a bini la dɛ chwa dɛɛ kaa laa la. 10A dɔ dini kɛŋɔ nɔm ken dɛɛ domɛ. A dini taa a dɔ kpegri dɛ́ domɛ nɛn dɛ weo korobie anue la. 11A dɔ a kooro. O ɛ Bɔnsam torome waa dɛ nyiŋi Bɔnsam Bɔluŋ la ta. Hibru tena dɛ yerɔ Abadɔn, Grik tena gee yerɔ Apooleɔn. O sɔn la munii "Nɛn waa dɛ chɔg kwa." 12Wekpega aa tɔ sie la tonɔ, dɛ ta ka a bele anɛ habɔɔ a ta ɛɛ ba bala. 13Nyundua torome waa jaa numɛl la hoh o bɛla, asɛ n no taa bɛl le daawiile fuih bɔr baa kpɔ suugaswɛm ɛo o che Korowii sie dɛ dɔ loŋkoni anaarɛ la ta. Loŋkoni anaarɛ la bwa taa taa la le. 14O ŋɔ nyundua torome waa jaa numɛl dɛ dɔ bɛla la be ŋɔ, "Pur Bɔnsam toroma banaarɛ la baa vɔg ba mojen Yufretis nyoa la ta." 15Asɛ ba pur Bɔnsam toroma banaarɛ la Korowii faa vɔg ba dɛɛ kpa awola tɔpere la la. O do dɔŋhwere la ne tɔpere la ne korobie la ne bena la baa kpɔ pur ba bá kpoo nɛra. Ba bɔne harɛ ta nɛra bini bɔre atoro naa, banɔ la baa dɛ ba kpoora la ɛɛ tel bɔr beŋkpoŋ nɛraa. 16Ba baglɔ kɛŋɔ Bɔnsam toroma la dɔ soojare kagboŋa bele kagboŋ ge bele lafraanɛ dɛ so jagre ta. 17N na jagre la kɛ deera ken, a dɔɔranar so a ta, dɛ do laa batakaare bune aa dɛ bɔle bambile la, asɛ a swɛɛ kɛŋɔ chal, ane do kɛŋɔ burum asɛ ane ge swɛɛ kɛŋɔ solmen. Asɛ jagre la nyuune do kɛŋɔ nyujentena nyuune. Asɛ nii ne chuu ne jebɔrɔwe ninlao ɛɛ le a nyoo. 18Ba bɔne harɛ bini nɛra bwa bini bɔre atoro naa, banɔ la nii ne chuu ne jebɔrɔwe ninlao aa dɛ le jagre la nyoo la aa kpoora la ɛɛ tel bɔr beŋkpoŋii. 19Jagre la kpegri lɔ a nyoo ne a dini bwa ta. A dini la do kɛŋɔ harɛkwa, dɛ dɔ nyuune dɛɛ choge. 20A gɛ waa nɔ kwaraa ta la, nɛra baa kaa baa wola sewɛ a gɛ waa la ta la ta ba liire charɛ dɛ le ba tonchɔga ta, dɛ taa tomɛ Bɔnsam toroma ne voga. Suugaswɛm ne suugapoŋa ne bwea ne daa baa kpɔa ɛ voga la aa na, aa waa no, aa won ir valɛ ge, kɛ ba dɛ toma. 21Ba ta ba liire charɛ ba nɛŋkpoa ne sɔm we-ɛɛla ne jwamane ne ŋwɛɛ ta.

will be added

X\