Wepila 8

1Pebie la aa swe kwaa baa kpɔa marɛ tɔn la nuanɛ te la, Korowii doa bwa ɛo ken surumm dɛ bigri tama. 2Asɛ n na baa kpɔ bɛle anuanɛ tɛ nyundua toroma banuanɛ ba yon dɛɛ che Korowii sie la. 3Nyundua torome bɛl balɔ dɛ kpoŋe suugaswɛm kon baa kpɔa dɛɛ fuh daawiile a sɔɔh aa soma la, dɛ ka che bela baa fuah dɛɛ tɛ Korowii la. Ba kpɔ daawiile a sɔɔh aa soma la kohona tɛo ó kpɔ ja Korowii nɛra wesoŋa la ta dɛ fuah daawiile fuih bɔr baa kpɔ suugaswɛm ɛo o che kookara la sie la. 4Daawiile la chuu le nyundua torome la nɔn ta dɛ ka koo Korowii nɛra wesoŋa ta dɛ kaa nyundua Korowii be. 5Asɛ nyundua torome la kpɔ kon la baa kpɔa dɛɛ fuh daawiile a sɔɔh aa soma la, dɛ buh daawiile fuih bɔr nii la ane dɛ kpɔ ta harɛ. Asɛ bwaala jigri dɛɛ kɔgre, dɛɛ nyɛgle bobɛlbwa pelɔpelɔ ken, asɛ harɛ gee jigri. 6Nyundua toroma banuanɛ la baa kpoŋe bɛle anuanɛ la kpɔ ba te dɛɛ ba a hoeh. 7Nyundua torome waa tɔ sie la hoɔh. Waa hoah la, tombwea ne nii koo chal ta dɛ le nyundua kɛŋɔ baa kpɔa ta harɛ. Ba bɔne harɛ bini bɔre atoro naa, anɔ la aa fuah la ɛɛ tel bɔr beŋkpoŋii, a ka bɔre anɛ. Ba bɔne daa ne kpɔga bini bɔre atoro naa, anɔ la aa fuah la ɛɛ tel bɔr beŋkpoŋii, a ka anɛ. 8Asɛ nyundua torome waa teŋa nɛɛ la hoh o bɛla. Waa hoah la, komɛl do kɛŋɔ bwekpegi damanta baa vigru ken, o le nyundua dɛɛ fuh, dɛ ba le mpo ta, asɛ o nee berɛ chal. Ba bɔne mpo bini bɔre atoro naa, anɔ la aa berɛ chal la ɛɛ tel bɔr beŋkpoŋii, 9asɛ o bini kwaa serewe, stiimaere aa lɔ o ta la chɔg. 10Nyundua torome waa teŋa tooro la ge hoɔh. Waa hoah la, asɛ weweejen le nyundua dɛ ba le harɛ, o bwa ɛɛ hɔ kɛŋɔ kapɛla ken. Waa baa le la, o le moo ne nenabɔɔne ta. Dɛ he bɔne moo ne nenabɔɔne bwa bini bɔre atoro naa, anɔ la waa le a ta la ɛɛ tel bɔr beŋkpoŋii. 11Wewee la sɔne Koŋkpel. Nee waa le a ta la berɔ do kpeli, asɛ nɛra nyɔa dɛ serewe pirim, dɛkalkɛ nee la kpeli. 12Nyundua torome waa teŋa naarɛ la ge hoɔh. Waa hoah la, wee ne korobie ne weweela bwa ɛo kɛŋɔ baa lɔa, a pera biri. Dɛ ba bɔne a bɛlbwa kpegri bini bɔre atoro naa, a bɛlbwa bɔr beŋkpoŋ aa won chaah kpa. Webaŋa ne jwaana gba, gɛɛ a do. Ba bɔne a bini atotoro naa, wee aa lɔ bɔr beŋkpoŋ ta webaŋa. Korobie ne weweela ge gɛɛ jwaana. 13N berɛ nyiŋi dɛ na kee bɛl waa dɛ gah nyundua dɛ kpɔ takpeg dɛɛ si, "Waa dɛ ba! Waa dɛ ba! Waa ɛɛ pu nɛra baa lɔ harɛ taa. Dɛ nyundua toroma batoro la baa kaa dɛ́ hoh ba bɛle la hoɔh waa, waa ɛɛ pu harɛ ta tenaa."

will be added

X\