Wepila 7

1Anɔ habɔɔ la, n na nyundua toroma banaarɛ baa chegɛ harɛ nyoo peu lee bɔra anaarɛ dɛ lawɛ peu, asɛ a bɛ harɛ ne mpo ne daa bɛlbwa ta ta. 2Asɛ n berɛ na nyundua torome bɛl o le wee leebɔr dɛɛ ba, dɛ kpoŋe kon Korowii gbagba aa kpɔa dɛɛ do o kwaa nso la. O kpɔ takpeg ŋɔ nyundua toroma banaarɛ la baa tɛɛ ba kpegri kɛŋɔ bá chɔg harɛ ne mpo la be ŋɔ, 3"Hé gel harɛ ne mpo ne daa la chɔga ka tel kɛŋɔ yaa do Korowii nso o bonɔɔna ne toli tili ta tonɛ mɔɔ." 4Ba bagle nɛra baa do ba nso la nyoa n be. Ba lɔ kagboŋa lafa fifraanaarɛ dɛ banaarɛ. Israel deene fi dɛ anɛ la taa ba le. 5Banɔ la baa do ba nso Juda dea la lɔ kagboŋa fi dɛ banɛ. Asɛ banɔ la waa doa le Rubin dea la ge lɔ nɛra kagboŋa fi dɛ banɛ. O do Gad dea nɛra ge kagboŋa fi dɛ banɛ nso, 6dɛ do Aasa dea nɛra kagboŋa fi dɛ banɛ. Gɛɛ o do Naftale dea ge nɛra kagboŋa fi dɛ banɛ, dɛ berɛ do Manasɛ dea nɛra kagboŋa fi dɛ banɛ. 7O do Semeɔn dea nɛra kagboŋa fi dɛ banɛ, dɛ do Lewi dea nɛra kagboŋa fi dɛ banɛ, dɛ do Isaaka dea nɛra kagboŋa fi dɛ banɛ. 8O do Sebulɔn dea nɛra kagboŋa fi dɛ banɛ, dɛ do Josef dea nɛra kagboŋa fi dɛ banɛ, asɛ Benjamen dea ge, o do nɛra kagboŋa fi dɛ banɛ nso. 9Anɔ la habɔɔ la, n nyiŋo dɛ na nɛnlaa nomɛlbwa aa wola won kur ba bela. Ba le wobol te bɛlbwa nɛra baa lɔ harɛ nɔ ta bobɛlbwa ta. Ba bwa do yapoŋa, dɛ kpoŋe bambie daa a papooni do a ta, dɛ che kookara la ne Pebie la sie, 10dɛ kpɔ takpeg dɛɛ ŋɔ, "N Naa Korowii waa soge kookara ta la ne Pebie laanee lɛ yaa oo." 11Asɛ nyundua toroma la che dɛ bar nomonome la ne hweera kwaa anaarɛ la ne kookara la, dɛ guŋi dɛ kpɔ sie pi harɛ dɛ jam Korowii, 12dɛɛ ŋɔ, "Aamen! Korowii chɛ kpɛɛra ne jirima ne jam ne duure. Onee dɔ wejema ne kpegri ne bokpega saŋ bɛlbwa. Aamen!" 13Asɛ nomonome la bɛl pɛɛ mɛ ŋɔ, "Nɛra nɔ baa do yapoŋa nɔ, umewaa yɔ? Leperaa ba leɔ?" 14Anee n ŋɔ, "N Dɔɔ, maa jemɛ. He ken jem ba." Asɛ o ŋɔ, "Banee ba faa lɔ wahala tenten la bini dɛ won le a nyoa la. Ba chɛgɛ ba yale Pebie la chal la ta, a le dɛ to. 15Anomanta ba lɔ Korowii kookara la sie dɛɛ tomɔ chɔɔ ne jwaana kɛŋɔ o dea Sɔfore, asɛ o gbagba waa soge kookara la ta la ɛɛ tɔ ba nɛ. 16Lɔr ne nyɔgre aa ban kpo kpa bwa. Wee aa ba nɛɛ lɔ cheihcheih, bɔr ge aa ba nɛɛ wɔrɔbe bambam, 17dɛkalkɛŋɔ Pebie la waa lɔ kookara la baah ta la dɛ ba ba Petegre ɛɛ, dɛɛ nyiŋi ba nɛ. Wɛɛ teg baa kaa nee aa dɛ tɛ mkpa aa wola jaga dɔe ta, asɛ Korowii fee ba sinii bwa ta."

will be added

X\