Wepila 6

1Maa dɛ nyiŋi la, n na Pebie la aa swe kwaa baa kpɔa marɛ tɔn la kera anuanɛ la bini sitɔ kon la. Asɛ n no hweera kwaa anaarɛ la bɛl taa kɛŋɔ bwaala aa dɛ kɔgre la. O ŋɔ, "Ba!" 2N nao kɛŋɔ jaagɔpoŋ bɛl aa lea, nɛn so o ta dɛ kpoŋe to. Ba kpɔ koogbɛrɛ tɛo, asɛ o dɔ kpegri dɛ le kaa dɛ́ ka yo laa dɛ pɔ o dɔma nɛ. 3Asɛ Pebie la swe kwaa baa kpɔa marɛ tɔn la nɛɛte la. Waa sweo la, n noɔ kɛ hweera kon la waa jaa nɛɛ la aa ŋɔa, "Ba!" 4Belaa jaagɔ bɛl ge le, o bwa swɛɛrɔ peihpeihpeih ken. Dɛ ba tɛ naate waa soge o ta la kpegri ŋɔ ó chɔg beŋkpoŋri ɛɛ harɛ bwa ta, ásɛ nɛra kpoo dɔŋa. Tokobijen bɛlee ba tɛo o kpɔ kaa. 5Pebie la swe kwaa baa kpɔa marɛ tɔn la tooro te la, asɛ n no kɛ hweera kwaa tooro te aa ŋɔa, "Ba!" N nyiŋo, dɛ jaagɔbiŋi bɛl ge leɔ. Nɛn waa soge o ta la kpoŋe kon baa kpɔa dɛɛ kari kwaa tɔgre la bɛl. 6N no taa bɛl hweera kwaa anaarɛ la baah ta kɛŋɔ, "Tɔpebir kembɔree bá kpɔ yawɛ mea lakaja del anɛ la, asɛ anɔ la a yog aa wola kpege ge, tɔpebir kembɔree dɛɛ yawɛ lakaja dela anumɛl. Kɛ noo ne sen te, gel a chɔga." 7Belaa Pebie la swe kwaa baa kpɔa marɛ tɔn la naarɛ te la. Waa sweo la, n noɔ kɛŋɔ hweera kwaa naarɛ te aa ŋɔa, "Ba!" 8Asɛ n nyiŋi dɛ jaagɔkɔl bɛl leɔ, asɛ nɛn so o ta baa yerɔ Seo. Bɛl ge le teŋɛ o nɛ, o ge sɔne Lala Bwɛɛ. Ba tɛɛ ba kpegri bá kpɔ laa ne lɔr ne weela ne kpɔg bini ola kpoo harɛ nɔ ta nɛra. He bɔne harɛ nɔ ta nɛra bwa bini bɔre anaarɛ naa, banɔ la baa tɛɛ ba kpegri ba kpo la ɛɛ tel bɔre anaarɛ la bini beŋkpoŋ nɛraa. 9Asɛ Pebie la swe kwaa baa kpɔa marɛ tɔn la nue te la. Waa sweo la, n nyiŋi Korowii Dea bela baa dɛ ɛ saraha dɛɛ tɛ Korowii la harɛ bɔr, dɛ na lala baa koh Korowii Waa la waa ne chega baa chega tɛo waa dɛ kpoo ba la. 10Ba kpɔ takpeg ŋɔ, "Nemenɛ Korowii haa do kaih dɛ dɔ kasinteŋ, saŋ besoo hɛɛ ba nɛra baa lɔ harɛ ta nɔ waa bola dɛ pa bole dɛ bɔ ba ya kpoora nɔ kem ɔ?" 11Dɛ ba tɛ bɛlbwa yapoŋ ó tɔ, dɛ ŋɔ báa onɛ tama ka tel kɛŋɔ ba bala Korowii bonɔɔna ne toli baa dɛ ba ba ge kpoora kɛŋɔ ban la nyoa aa chiga. 12N berɔ na Pebie la swe kwaa baa kpɔa marɛ tɔn la numɛl te la. Waa sweo la, harɛ jigro kohona, asɛ wee bir kɛŋɔ birisie ken, asɛ korobie swɛɛ kɛŋɔ chal. 13Weweela chugro lee harɛ kɛŋɔ peujen yon ta, daa nɔnhuuhne yon lee harɛ la. 14Asɛ Korowii doa nyogre n siwi ta kɛŋɔ baa gugri kalaŋ la. Bwejaŋa ne ekwie ge chugri le a buge ta kaa. 15Harɛ koranar ne nɛnjena, soojare nomonome, dɔɔhna, bokpega tena, ne nɛn te bɛlbwa, banɔ la baa ɛ yoma, ne banɔ la baa wola yoma ɛɛ bwa chwa ka sɔh bwe bɔɔne ne bwetala aa lɔ bwejena ta logre, 16dɛɛ ŋɔ bwejena la ne bwetala la be ŋɔ, "Hé chogli tɔ ya nɛ, asɛ naate waa soge kookara la ta la bɛ yaa na, asɛ he le yaa Pebie la bandia ta, 17dɛkalkɛŋɔ ba tɔpejen la telo, nɛra ɛɛ ba ba danana nee nyɔe. Anomanta umee dɛ won le a nyoa ɔ?"

will be added

X\