Wepila 4

1Anɔ bwa habɔɔ la, n nao kɛŋɔ doonyoa bɛl pilo ta Korowii bwɛɛ la ta, dɛ no taa bɛl n faa noo kɛŋɔ bɛla la. Taa la ŋɔ n be ŋɔ, "Teeh ba bonɔ ń bagle waa aa dɛ ba ɛɛ anɔ nɔ habɔɔ." 2Bug la ta Korowii Domadɛɛge la den ir n nɛ, asɛ n na kɛŋɔ kookara bɛl chegɛ nyundua, nomɛl so o ta. 3Naate waa soge o ta la dɛ nyɛgle al-al kɛŋɔ bwedɛɛga answɛɛma aa dɛ nyɛgle. Dɛ bwaala deŋgare bɛl bar o kookara la, dɛ do kɛŋɔ bwe-lwɛɛne ane aa dɛ nyɛgle. 4N na kookane fifraanɛ dɛ anaarɛ a bar o kookara la cheme. Nomonome fifraanɛ dɛ banaarɛ do laalapoŋa dɛ pi suugaswɛm koogbɛrɛre dɛ so a ta. 5Dɛ kookara la waa lɔ baah ta la bɔr dɛ gbɔgre kɛŋɔ bwaala aa dɛ nyɛgle dɛɛ jigri dɛɛ kɔgre la. Kandere anuanɛ ge chegɛ kookara la sie dɛɛ hɔ. Korowii Domare anuanɛ laanee. 6Kookara la sie la ɛo kɛ nejen aa chɔa dɛ do gereŋ la. Hweera kwaa anaarɛ ane chegɔ bar kookara la, bɛlbwa chegɛ o bampera beŋkpoŋ ta. A dɔ sibie a siini bobɛlbwa ne a habɔɔne bobɛlbwa. 7Hweera kwaa nɔ bɛl do kɛŋɔ nyujente, bɛl do kɛŋɔ nabal, bɛl sie bɔr do kɛŋɔ nɛn, bɛl ge do kɛŋɔ kee raa pagri o kena dɛɛ ir la ken. 8Bɛlbwa dɔ kena anumɛl, dɛ dɔ sibie a bwara bobɛlbwa ne a kena lɔgre gba. A lɔ o be chɔɔ ne jwaana dɛɛ kpɛɛro aa wola gel bwa, dɛɛ ŋɔ, "Nemenɛ Korowii haa ɛ komɛlbwa Dɔɔ dɛ do le saŋ la dɛ ba le fini, dɛɛ ba le doe saŋ bɛlbwa la, he do kaih noo, he do kaih kɛrɛdɛ." 9Saŋ bɛlbwa hweera kwaa anaarɛ la aa kpɔ jam dɛɛ tɛ naate waa soge kookara la ta dɛ do le saŋ bɛlbwa la, dɛɛ duuru, dɛɛ tɛo jirima la, 10dɛ nomonome fifraanɛ dɛ banaarɛ la laa ba koogbɛrɛre pili bil kookara la sie dɛ guŋi naate waa soge kookara la ta dɛ do le saŋ bɛlbwa la, dɛɛ duuru ŋɔ, 11"N Naa Korowii haa dɔ komɛlbwa la, he chɛ kɛŋɔ nɛra bwa tɛɛ jirima dɛ duuri, dɛ sɛh kɛŋɔ hen dɔ kpegri bwa, dɛkalkɛŋɔ henee ta komɛlbwa, he tetoora taa a che a do le."

will be added

X\