Wepila 21

1Belaa n na nyundufale ne harɛfale bɛl. Dɛ nyundua ne harɛ la a faa lole la te nyogrɔ, asɛ mpo ge nyogre. 2N berɔ na Korowii bwɛɛ Jerusalam onfale o le Korowii be dɛɛ ba harɛ. Korowii kwaaro kɛrɛdɛ kɛŋɔ hanfale yon kpɔ o te dɛɛ ba o jaa be la. 3Asɛ n no takpeg bɛl o le kookara la ta, dɛ ŋɔ "Hɛ́ɛ no! Taraken Korowii dobɔree nɛwɛnyini bini. O ne banee dɛ so, ba ɛ o nɛra asɛ o ge ɛ ba Korowii, ba ne o so. 4Wɛɛ fee ba sinii bwaa ta baa wola wi kpa. Seo aa lee do kpa. Lokua ne wii ne bwadabii wee aa lee do kpa, dɛkalkɛŋɔ webena la bwa toole kpa." 5Anee naate waa soge kookara la ta la ŋɔ, "Taraken n gelɔ wobɛlbwa berɛ anfala." Dɛ berɛ ŋɔ, "Chwerɛ gɛ waa nɔ, dɛkalkɛŋɔ n wobol nɔ ɛ kpela, negra toole a ta." 6Asɛ dɛ ŋɔ, "A tonɔ! Menee komɛlbwa Sitɔɔ ne a Muŋkaa, menee wobɛlbwa Mumpar ne a Jaga. Dɛ nomɛlbwa dɛ wi nyɔgre aa, mɛɛ geloo o la bela mkpa nee aa bula dɛɛ le dɛ ka nyɔ ane pɛɛpɛɛ. 7Naate waa wona yo le la ɛɛ dɔ kwaa nɔ bwaa. Mɛɛ ɛ o Korowiirii, asɛ o ge ɛ n bie. 8Kɛ ɔmeera ne nɛra baa wola men yarada, ne nɛra baa dɛ ɛ waa maa kia, ne nɛra baa dɛ kpoo nɛra, ne nɛra baa dɛ bɔ jwamane, ne nɛra baa dɛ ɛ bebeewa, ne vogtoroma ne nyosonteŋna bwa bɔree nii ne jebɔrɔwe aa yɛɛra chɔ kɛŋɔ moo dɛɛ fuh la ta. Anee seo nɛɛtena la." 9Belaa nyundua toroma banuanɛ la ba faa kpoŋe loga hɔhɔrɔwa bele anuanɛ aa ka mun la aa su a bwa la bɛl ba, dɛ ba ŋɔ n be ŋɔ, "Ba ń bagle Pebie la hanfale la." 10Anee Korowii Domadɛɛge ir n nɛ, asɛ nyundua torome la kpɔ mɛ kaa bwejen bɛl doa. O kpego kɛrɛdɛ. Belaa o bag mɛ Korowii bwɛɛ Jerusalam la kɛ waa le Korowii be nyundua dɛɛ ba harɛ. 11Dɛ Korowii jirima gelɔ o bwa ɛɛ nyɛgle kɛŋɔ bwedɛɛge baa dɛ yerɔ jaspa o do wer kohona dɛ do gereŋ la. 12Danjwɛjen bɛl waa kpega kohona baro cheme. O doonyoone lɔ fi dɛ anɛ, asɛ nyundua toroma fi dɛ banɛ ge cheche a ta. Ba chwerɛ Israel deene fi dɛ anɛ la sɔna dawɛ doonyoone la ta. 13O doonyoone la, atoro lɔ wee leebɔr pera, atoro do wee kaŋle nyundua bɔr, atoro do wee cholibɔr pera, asɛ atoro ge do wee kaŋle harɛ bɔr ge. 14Bwea baa ma danjwɛɛ la chɔŋɛ a ta la lɔ fi dɛ anɛ, asɛ Pebie la toroma fi dɛ banɛ la ge sɔna dawɛ bwea la ta. 15Nyundua torome waa bol waa n be la kpoŋe suugaswɛm daa baa dɛ magɛ o ne kwa, dɛɛ ba bwɛɛ la ne o doonyoone ne danjwɛɛ la maga. 16Bwɛɛ la ɛ fɔɔsokwɛɛ. O pagri ne o jaŋre bwa kɛrɛdɛ. O kpɔ daa la dɛ magɛ bwɛɛ la, o jaŋre lɔ kwansini kagboŋ lafraanue. O pagri ne o jaŋre ne o nyundua kpega bwa beŋkpoŋ. 17O magɛ danjwɛɛ la. O kpega del ge lɔ nagale fifraanuanɛ dɛ anɛ. Gɛ nɛwɛnyini aa dɛ magɛ kwaa la, gɛɛ o maga. 18Bwɛɛ la danjwɛɛ la, bwedɛɛga baa yera jaspa la gboo ba kpɔ mao. Asɛ bwɛɛ la tenten ge, suugaswɛm tenten aa do gereŋ kɛŋɔ digii ba kpɔ mao. 19Bwea fi dɛ anɛ baa ma danjwɛɛ la chɔŋɛ a ta la ɛ bwedɛɛga bwa soosiwi a yog aa kpega. A gelɔ o do wer. Bwelogle la sɔne jaspa, nɛɛte la ge sɔne safaya, asɛ tooro te la ge sɔne agat. Onɔ la waa teŋa naarɛ la ge sɔne ɛmerald. 20Onɔ la waa teŋa nue la sɔne ɔnigs, numɛl te la sɔne kanɛɛleɔn, nuanɛ te la ge sɔne kwats, nuatoro te la ge bɛrel, nuanaarɛ topas, asɛ onɔ la waa teŋa fi la sɔne chalsedone, fi dɛ beŋkpoŋ te la ge sɔne tɛɛkois, asɛ fi dɛ anɛ te la ge ametes. 21Doonyoone fi dɛ anɛ la ge la, bwedɛɛga baa dɛ yera pɛɛlre laanee ba kpɔ kwaa a bwa gbera, bɛlbwa di ombir. Bwɛɛ la fɔgbaah ge ɛ suugaswɛm tenten dɛ do gereŋ kɛŋɔ digi ken. 22Korowii Dea baa cheme o bini dɛɛ tomɔ toole bela. Nemenɛ Korowii waa ɛ komɛlbwa Dɔɔ la ne Pebie laanee chega tɛ dea la. 23A ta hiaih kɛŋɔ wee ne korobie chaah bela. Korowii jirima dɛ chaah bela, asɛ Pebie la ge ɛ kandea bela. 24Harɛ nɔ ta nɛra ɛɛ ba valɛ o bochaah la taa, asɛ koranar baa lɔ harɛ nɔ ta ge kpɔ ba jirima baa dɔa la ba jo o ta. 25O doonyoone yao che, aa wola tɔ saŋ bɛlbwa, dɛkalkɛŋɔ bɔr aa bela jo. 26Harɛ nɔ ta nɛra ɛɛ kpɔ ba jirima baa dɔa ne ba kondɛɛga bwaa jo bela. 27Kɛ komɛlbwa doŋa te bɛlbwa aa lɔ o nɛɛ la aa won jo bela, gɛɛ nomɛlbwa ge waa dɛ ɛ sihihwaa dɛɛ teŋe nyosone la bɛlbwa ge aa wola won jo bela. Nɛra baa chwerɛ ba sɔna do Pebie Mkpa Tɔn la bini la, banee dɛ won jo bela.

will be added

X\