Wepila 18

1A habɔɔ la, n na nyundua torome bɛl o le nyundua dɛɛ tu. O dɔ kpegri kɛrɛdɛ. O jirima nomanta harɛ bwa chaahnɔ. 2O nyɛgɔ kohona ŋɔ, "O pagrɔ oo, o pagrɔ! Babilɔnjen la pagrɔ, dɛ berɛ kwaa aa dɛ ir nɛra nɛɛ ne Bɔnsam kwaa te bɛlbwa ne jumbisale baa haah la dobɔr, 3dɛkalkɛŋɔ o gelɔ harɛ ta nɛra bwa wedoŋa ne ba pɛlchɔga dɛɛ ba kɛŋɔ sen, asɛ ba waa fuh Korowii baah. Harɛ nɔ ta koranar ne o bɔ jwamane. O kondɔɔh kwaa nyina kohona nomanta, harɛ nɔ ta bonadiire chegɛ o nɛɛ dɛ dɛg." 4N berɔ no taa bɛl o le nyundua dɛ ŋɔ, "N nɛra, hé le o be. Maa nyin kɛ he ne o pɛ dɛɛ ɛ wechɔga, dɛ pɛ na wahala maa dɛ ba gela o na la. 5O wechɔga daŋɔ tel Korowii doa. Korowii kpaŋro bil. 6O chɔgra, hé ɛo gɛ o faa ɛa la. Hé bɔɔ o tonchɔga la kem kera anɛ. Sen la o yon ɛ tɛ nɛra ba nyɔ dɛɛ dɛɛ la, hé ge ɛ ane tɛo a do kpegri gwaa gɛ kera anɛ ó ge nyɔ. 7Gɛ o faa kpɔ o te ɛ nɛnjen dɛɛ di o nyu ga la, hé gel o na hɔhɔrɔwa dɛ di suna ge kɛrɛdɛ. O dɛ lii o nyu bini ŋɔ onee haŋkooro, o jaa ta sewɛ, o tea bini aa chɔg bwa. 8Anomanta tɔpebeŋkpoŋii wahala ne weela ne tebinichɔg ne lɔr ɛɛ ba o kpoe, asɛ nii fuuh, dɛkalkɛŋɔ N Naa Korowii waa dɛ ba o waa bola dɛ pa bole laanee dɔ kpegri bwa." 9Harɛ nɔ ta koranar ba ne waa dɛ bɔ jwamane dɛɛ di ba bwara la, baa ba na o chuu kɛ o dɛ fuh la, baa wiu dɛɛ dooge lɔŋɔre. 10Baa che bojaŋee, dɛkalkɛŋɔ baa ɔmɛ o hɔhɔrɔwa waa dɛ na laanee dɛɛ ŋɔ, "Akwe! Akwe! Bwɛjen Babilɔn la o tena faa dɛ di kpegri ga la, waa puu kerabeŋkpoŋ o pagre." 11Asɛ harɛ nɔ ta bonadiire ɛɛ wiu dɛɛ dooge lɔŋɔre, dɛkalkɛŋɔ nɛn toole dɛ́ yawɛ ba kwaa kpa. 12Nɛn toole dɛ́ yawɛ ba suugaswɛm, suugapoŋa, ne bwedɛɛga a yog aa kpega, ne yadɛɛga bwa soosiwi, ne dasɔɔhsoma a yog aa kpega bwa soosiwi, ne kwaa baa kpɔ bala nyena dɛ ɛ, ne kwaa baa kpɔ dadɛɛga a yog aa kpega dɛ sɛh, ne anɔ la baa kpɔ ayaawa ne bune dɛ logɛ, ne anɔ la baa kpɔ bwedɛɛga ane soosiwi dɛ ɛ la, 13ne konsɔɔhsoma bwa soosiwi, anɔ la baa dɛ fuh, ne anɔ la baa dɛ fɔgle, ne sen, ne noo, ne mendɛɛga, ne mea, ne nae, ne peera, ne jagre, ne kwaa ba yon vɔwɛ pɛl jagre dɛ so a bini aa tɛgra la. Ba yog nɛra ge kɛŋɔ kondɛɛra ken. 14Bonadiire la ɛɛ bol bwɛjen Babilɔn la waa ŋɔ, "Kwaa a pɛla aa dɔe la le he nɔn ta. He kondikondɛɛga ne kondɛɛga fuoh. Haa an na kpa bwa." 15Banɔ la ba faa yog a gɛ kwaa dɛ dɔ suuga a ta la ɛɛ che bojaŋee, dɛkalkɛŋɔ ba dɛ ɔme hɔhɔrɔwa aa puu la, dɛɛ wiu dɛɛ dooge lɔŋɔre, 16dɛɛ wi ŋɔ, "Akwe! Akwe! Waa pu bwɛjen la o nɛra faa dɛ do laaladɛɛga a sie aa swɛɛra dɛ do gimegime ne answɛɛma peihpeih, dɛɛ do baŋa kwaa ne deŋna kwaa ne nɔnloga baa kpɔ suugaswɛm ne bwedɛɛga bwa soosiwi ɛa la, 17dɛkalkɛŋɔ o kwaa waa dɔa ga la bwa fuoh dɔŋhwere beŋkpoŋ." Asɛ nɛra baa dɛ kah stiimaere, ne nɛra baa jo a bini dɛɛ la bobɛla, ne nɛra baa dɛ ɛ toma a bini, ne nɛra baa dɛ ɛ toma bwa soosiwi mpo ta che bojaŋ, 18dɛ na gɛ waa dɛ fuh chuu ɛɛ le la, dɛ kpɔ takpeg ŋɔ, "Jo bɛ le! Bwɛjen nɔ dɔŋ toole wɛɛ fuh gɛ la." 19Ba loo kuu, ba ɛ teera ta ba nyuune ta, dɛɛ wiu dɛɛ dooge lɔŋɔre, dɛɛ ŋɔ, "Akwe! Akwe! Waa pu bwɛjen kondɔɔh aa su o bwa dɛ gel nɛra baa dɔ stiimaere do mpo ta berɛ dɔɔhna la. O paŋɛ komɛlbwa dɔŋhwere beŋkpoŋ. 20Korowii doa tena ne Korowii nɛra, ne Yeesu toroma, ne Korowii keamere, hé gel he sie lɛ a wa, dɛkalkɛŋɔ Korowii tɛr o deŋne wechɔga waa kpɔa ɛ heyaa la wa." 21Belaa nyundua torome bokpega te bɛl gɔɔ bwe bɛl waa do kan kɛŋɔ nambwejen, dɛ kpɔ ta mpo ta, dɛ ŋɔ, "Kenii baa ba bwɛjen Babilɔn la kpɔe dɛ ta kpegri nɛɛ baa wola on na kpa bwa la. 22Baa nɛra baa dɛ lɔ janjela, ne banɔ la baa dɛ hoh kaleperi ne bɛle ne komɛlbwaa na he bini kpa. Gɛɛ baa wola nɛra baa dɛ sɛh kwa, ne nɛra baa dɛ sɔh kwa, ne banɔ la baa jemɛ toma bwa soosiwi he binii na kpa. Baa nambwe ge sii no bela kpa. 23Kandea bɛlbwa aa belaa chaah kpa. Baa hanfala ne ba jaranar taa no bela bwa. He bonadiire ɛ nɛnjena ba dɔŋa aa wola toole harɛ nɔ ta bobɛlbwa. He wono berɛ harɛ nɔ ta nɛra bwa liire ba nyogre kɛŋɔ baa kpɔ tɛgchɔga dɛɛ berɛ nɛn liire la. 24Korowii keamere, ne o nɛra, ne nɛra baa kpoo ba harɛ nɔ ta bwa la ba chalee bá na bwɛɛ la ta la."

will be added

X\