Wepila 16

1N berɔ no takpeg bɛl o le Korowii Dea la bini dɛ ŋɔ nyundua toroma banuanɛ la be ŋɔ, "Hé kaa dɛ ka fuge Korowii bwaawee la aa lɔ loga anuanɛ bini la ta harɛ." 2Nyundua torome waa tɔ sie la kaalɔ dɛ ka fuge o kwaa ta harɛ. Asɛ ŋwɛrchɔga aa dɛ we kohona lee nɛra baa dɔ olchɔge la nso dɛɛ tomɛ kon la baa mao la nɛ. 3Asɛ nɛɛte ge ka fuge o kwaa do mpo ta. Asɛ mpo nee chɔg dɛ do kɛŋɔ lale chal, asɛ kwaa aa lɔ mpo ta bwa serewe. 4Asɛ tooro te ge le dɛ ka fuge o kwaa do moo bɛlbwa ne neerare bwa ta, a begre chal. 5Asɛ n no nyundua torome la waa chɔ neerare nyoa la kɛ waa ŋɔa, "Hen haa lole saŋ la bwa dɛ ba le fini dɛ do kaih dɛ ka tonɛ la, he waa haa bola dɛ pa nɛra bolchɔge la togrɔ, 6dɛkalkɛŋɔ ba fa gelɔ he nɛra ne he keamere chal fuge. Anomanta he tɛɛ ba chal ba nyɔ. Gɛɛ ba chɛ." 7Asɛ n no taa bɛl daawiile fuih bɔr, o ŋɔ, "Nemenɛ Korowii haa ɛ komɛlbwa Dɔɔ la, he waa haa ɛa dɛ tɛr ba deŋne la togrɔ dɛ ɛ kasinteŋ." 8Nyundua torome naarɛ te la ge leɔ, dɛ ka fuge o kwaa ta wee ta, asɛ a tɛo kpegri wɛɛ nyaa kɛŋɔ nii ken, 9dɛɛ nyaa nɛra, dɛkalkɛŋɔ o nyɛgre taeh, asɛ baa bol Korowii waa dɔ kpegri hɔhɔrɔwa la nɛɛ nɛnhɛlwa. Ba ta ba liire charɛ dɛ le ba wechɔga ta. Ba ta on jirima tɛɛ. 10Onɔ la waa teŋa nue la ge leɔ dɛ ka fuge o kwaa ta olchɔge la kookara ta, asɛ bɔr bir nɛra waa dɛ di kora ba nɛɛ la bwa nɛ, baa menɛ nyoa bonyɛga nomanta, 11dɛɛ chɛgre Korowii ba bonyɛga ne ŋwɛra aa lɔ ba nɛɛ la wa. Ba ta liire charɛ dɛ le ba tonchɔga ta. 12Nyundua torome waa teŋa numɛl ge leɔ dɛ ka fuge o kwaa ta nejen baa dɛ yerɔ Yufretis la ta, asɛ o bwa hweeh dɛ chɔ ŋwɛnɛ tɛ koranar baa le wee leebɔr dɛɛ ba la. 13N berɔ na kwaa aa dɛ ir nɛra nɛɛ atoro a do kɛŋɔ sapone ken, bɛl le kontuugi damanta la nyoa, anɛ aa kaa la ge le olchɔge la ne keamechɔge la nyoa bini. 14Bɔnsam kwaa, asɛ a won dɛɛ ɛ nyokpowa. A leɔ dɛɛ la harɛ nɔ ta koranar bwa be, dɛ́ ka lawɛ ba bwa cheme bá yo Nemenɛ Korowii laa o tɔpejen la ta. 15Hɛ́ɛ no. Mɛɛ pigri heyaa kɛŋɔ ŋwɛɛ ken. Naate waa wola dom chɔ dɛ do o laala dɛ so dɛɛ kpa la na som. N balaa, waa muŋgbalee valɛ nɛra nao asɛ sihiih kpoo. 16Kwaa aa dɛ ir nɛra nɛɛ la lawɛ koranar bwa cheme bobɛl Hibru tena aa dɛ yerɛ bela Amagɛdɔn la. 17Asɛ nyundua torome waa teŋa nuanɛ la ge fuge o kwaa do peu ta. N no takpeg bɛl le kookara la te la be Korowii Dea bela, o ŋɔ, "A tonɔ." 18Asɛ bwaala ɛɛ nyɛgle pelɔpelɔ bobɛlbwa, dɛɛ jigri, dɛɛ kɔgre, asɛ harɛ jigri kohona. Korowii aa ta nɛwɛnyini bwa, harɛ ta gɛ jigre bwa. O jigra la ɔma. 19Bwɛjen la pegri atoro, asɛ harɛ nɔ ta bwɛɛre bwa pagre. Korowii lii Babilɔnjen la wechɔga wa, dɛ gel o nyɔ o danana nee a nyoa aa kpega kohona kɛŋɔ seŋkpega la. 20Ekwie aa lɔ neerare baahna ne bwejena nyogrɔ, ba nyin a bɔr kahonɛ. 21Tombwejena le nyundua dɛ do tɔgre kɛŋɔ paanoo men bɔgtɔ del dɛ ba lee nɛra nɛɛ dɛ a ɔma. Asɛ nɛra koh a waa dɛ chɛgre Korowii.

will be added

X\