1 N berɔ na wejena ane Korowii doa, a do kan dɛ bagle waane. A ɛ nyokpoa taeh. N na nyundua toroma banuanɛ ba kpoŋe hɔhɔrɔwa bele anuanɛ. Anee hɔhɔrɔwa aa ka mun ba ɛ, dɛkalkɛŋɔ anee dɛɛ ba ɛɛ mɔɔ Korowii baah sɔɔh. 2 N na bobɛl o do kɛŋɔ nejen aa chɔa dɛ do gereŋ asɛ nii do o ta. Asɛ nɛra baa pɔ olchɔge la ne kon la baa mao la nɛɛ dɛ vɛh o namba waa chega tɛ o sɔn la kpoŋe Korowii janjelare dɛ che nee la jwɛh, 3 dɛɛ go Korowii bonɔɔ Mosis ne Pebie la yel ŋɔ, "Oo, Nemenɛ Korowii, haa ɛ komɛlbwa Dɔɔ, he we-ɛɛla kan ga. Harɛ nɔ bwa Kooro, he ŋwɛnɛre togrɔ dɛ ɛ kasinteŋ. 4 Oo, N Naa Korowii, umee lole waa wola hen ɔmɔɔ? Umee wola hen sɔnee tɛɔ? He gboo do kaih ka tonɛ. Harɛ ta nɛn te bɛlbwa ɛɛ ba guŋi he siee dɛ tomɛ, dɛkalkɛŋɔ waa haa ɛa la togrɔ nomɛlbwa jemɛ." 5 Anɔ habɔɔ la, n berɔ na Korowii Dea waa lɔ nyundua la baa pilu cheg. Tɛnte Dea baa baŋro wɛɛ bagle kɛŋɔ Korowii lɔ o nɛra bini laanee. 6 Asɛ nyundua toroma banuanɛ baa kpoŋe hɔhɔrɔwa bele anuanɛ la le Korowii Dea la bini. Ba laala baa doa la wer dɛɛ nyɛgle. Ba kpɔ suugaswɛm krisore vɔrɔwe ba bambili. 7 Asɛ hweera kwaa anaarɛ la bɛl kpɔ suugaswɛm loga anuanɛ tɛɛ ba. Korowii waa lole saŋ te bɛlbwa la bwaawee su a bwa. 8 Korowii jirima ne o kpegri gelɔ chuu su o Dea la bini, nomɛlbwa aa wola won jo bela atane kɛŋɔ hɔhɔrɔwa bele anuanɛ nyundua toroma banuanɛ la aa kpoŋa la aa ɛa tonɛ mɔɔ.
