Wepila 14

1Belaa n nyiŋi dɛ na Pebie la chega bwejen Saayɔn doa. Asɛ nɛra kagboŋa lafa fifraanaarɛ dɛ banaarɛ baa chwerɛ o ne o Mɛɛ la sɔna ba tili ta la che o be. 2Asɛ n no gbɔgra nyundua kɛŋɔ ne aa pala dɛɛ kpɔ bwea baah la, a berɛ do kɛŋɔ bwaala aa kɔra kohona la. Dɛ o dɛ si kɛŋɔ baa dɛ lɔ janjela la. 3Nɛra la chegɛ Korowii kookara ne hweera kwaa anaarɛ la ne nomonome la be dɛɛ go yelfale bɛl, nomɛlbwa aa wola won hweli yel la, nemenɛ nɛra kagboŋa lafa fifraanaarɛ dɛ banaarɛ Korowii aa lɛɛ ba harɛ nɔ ta nɛra bwa bini la gbo. 4Gɛ nɛra nɔ do kɛŋɔ baala baa wola haah jemɛ, dɛkalkɛŋɔ ba lawɛ ba te dɛ do kaih. Ba dɛ teŋɛ Pebie la nɛɛ bobɛlbwa waa dɛ la. Banee nɛnlogla Korowii aa lɛɛ ba nɛra waa dɛ ba ba lɛɛ la bwa bini, dɛ kpɔ ba tɛ o te ne Pebie la. 5Ba ta nyosone teŋe bwa. Wechɔga bɛlbwa ge toole ba nɛ. 6Belaa n na nyundua torome bɛl waa ira kpɔ nyundua dɛ kpoŋe Amanesoma aa wola tonɛ bwa, dɛ kpɔ dɛɛ la ka bol wobol te bɛlbwa nɛra baa lɔ harɛ nɔ ta bobɛlbwa be. 7O kpɔ takpeg dɛ ŋɔ, "Hɛ́ɛ ɔmɛ Korowii dɛɛ tɛo jirima, dɛkalkɛŋɔ tɔpere la telo kɛŋɔ o bol nomɛlbwa waa dɛ pa bole. Hɛ́ɛ duu Korowii waa ta nyundua ne harɛ, ne mpo ne neerare bwa aa lɔ harɛ ta la." 8Nyundua torome nɛɛte ge iro teŋɛ onɔ la nɛɛ dɛ ŋɔ, "O pagrɔ! O pagrɔ! Babilɔn bwɛjen la waa gela pɛlchɔga ne wedoŋa dɛɛ harɛ nɔ ta bwa nɛra kɛŋɔ sen asɛ ba waa fuh Korowii baah la pagrɔ." 9Tooro te ge iro teŋɛ banɛ la nɛɛ dɛ kpɔ takpeg dɛ ŋɔ, "Dɛ nomɛlbwa sɛoh dɛɛ tomɛ olchɔge la ne o chaa la baa mao la, dɛ gel ba doo nso o tile ta kɛɛ o nɔn ta naa, 10onee dɛ ba Korowii danana nee a nyoa aa kpega kohona kɛŋɔ sen baa wola komɛlbwa a ta pule la nyɔe. Wɛɛ na hɔhɔrɔwa kɛrɛdɛɛ jebɔrɔwe ninlao ta, nyundua toroma ne Pebie la sie, 11asɛ chuu le bela baa dɛ na hɔhɔrɔwa la dɛɛ kaa nyundua saŋ bɛlbwa. Nɛra baa dɛ tomɛ olchɔge la ne kon la baa mao la, ne nɛra baa kpɔ o sɔn do ba nso la, baa hɔhɔrɔwa la taa le bwa, dɛɛ na waa chɔɔ ne jwaana." 12Anɔ dɛ bagle kɛ a chɛ kɛ Korowii nɛra baa teŋɛ o waa ta dɛɛ yarada Yeesu la lawɛ bambile dɛ che kiŋkiŋ. 13N berɔ no taa bɛl nyundua o ŋɔ, "Chwerɛ waa nɔ: Le fini dɛɛ kaa, nɛra baa yarada ya Dɔɔ la dɛ kpɔ ba te tɛo la, dɛ ba sewaa, ba na som." Korowii Domadɛɛge la bolɔ ŋɔ, "Kpelaa, ba onɔ. Ba le ba ba koeh ta. Ba sɔndɛɛge ɛɛ teŋɛ ba nɛɛ kaa." 14Asɛ n nyiŋi dɛ na bampoŋ bɛl, nomɛl so o ta kɛŋɔ nɛn, dɛ pi suugaswɛm koogbɛrɛ, dɛ kpoŋe kerenyɛg. 15Anee nyundua torome bɛl le Korowii Dea bini, dɛ kpɔ takpeg ŋɔ onɔ la waa soge bam ta la be ŋɔ, "Kpɔ he kere la dɛ komɛ. Kwaa koma saŋ telo. Harɛ ta kondikwaa beɔ ne koma." 16Asɛ onɔ la waa soge bam ta la ta o kere la dɛ komɛ kwaa aa lɔ harɛ ta la. 17Nyundua torome bɛl ge le Korowii Dea waa lɔ nyundua la bini, dɛ ge kpoŋe kerenyɛg. 18Bɛl ge waa dɔ nii kpegri le daawiile fuih bɔr dɛ kpɔ takpeg ŋɔ kerenyɛg te la be ŋɔ, "Kpɔ he kerenyɛg la dɛ chaa harɛ ta daa baa kpɔ a nɔna dɛɛ ɛ sen la nɔna. A beɔ!" 19Asɛ o ta o kerenyɛg la harɛ ta dɛ chaa a nɔna, dɛ pa do kon ba yon pa nɔna la do dɛɛ sa a ta a nee le dɛɛ do o bini la. A gɛ kon la chegɔ tɛ Korowii bandia. 20Nɔna baa sa a ta la chegɔ tɛ harɛ nɔ ta nɛra. Bwɛɛ la daharaa ba sa ba nɛ, ba chal palɛ kaa kɛ kwansini lafraanɛ, a luŋri ge tel nagale anɛ.

will be added

X\