1 N na wejena ane aa ɛ nyokpoa dɛɛ bagle waane Korowii doa. Haah bɛl kpɔ wee tɔ, dɛ kpɔ korobie ge do o nakpale lɔgre, dɛ gugri weweela fi dɛ anɛ pi o nyu, kɛŋɔ koogbɛrɛ ken. 2 Haah la tea beɔ, loltea lɔɔ wɛɛ ba lola dɛɛ dooge lɔŋɔre. 3 Nyokpowaa ane ge aa dɛ bagle waane berɔ ɛ nyundua bela ja. Kontuugi damanta bɛl waa le lɛŋɔ leɔ. O swɛɛrɔ dɛ dɔ nyuune anuanɛ dɛ nyeglare fi. Asɛ koogbɛrɛ pi o nyuune la bɛlbwa ta. 4 Asɛ o kpɔ o din gbaa weweela ta harɛ. Dɛ he bɔne a bini bɔre atoro naa, a bini beŋkpoŋii o gbaa. O baa che haah la waa dɛ ba lola la sie dɛɛ nyin kɛŋɔ dɛ o lolaa, ó kpɔ o bie la lile. 5 Haah la lolɛ bibaa waa dɛ ba kpegri kpɔe dɛɛ nyiŋi harɛ nɔ ta nɛra bwa nɛɛ a ŋwɛnɛ ta. Waa lolɔ la, ba lao kee kaa Korowii be o do o kookara la bɔr. 6 Asɛ haah la ge chwa jo pua waa ɛ hɛŋle gbo harɛ, bela Korowii aa ɛ bɔr tɛo ŋɔ bá nyiŋu tɔpera kagboŋ lafraanɛ fifraanumɛl bwa la. 7 Asɛ laa chole Korowii doa. Maekel waa ɛ nyundua toroma la bwa nomoa la ne o dɔm kaa pu kontuugi damanta la ne o ge bala ba yo, 8 asɛ Maekel ne o dɔm pɔ ba nɛ. Belaa ba ta bɔr dɔe dɛ so Korowii doa kpa, 9 asɛ Korowii kpɔ kontuugi damanta waa ɛ harɛkon la yaa jemɛ o waa mumpar bwa, baa yerɔ Baradeɛre Te ne Bɔnsam, wɛɛ negre nɛra bwa baa nyogre la, ne o bala bwa ta harɛ. 10 N berɔ no takpeg bɛl Korowii doa o ŋɔ, "Taraken N Naa Korowii lɛɛ waa dɛ ba dɛ ba lɛ nɛra la telo. O kpegri ne o kora dii saŋ telo. Taraken o Kristo waa tomɔ ó ba lɛ yaa la lɛ kpegri dɛɛ di, dɛkalkɛŋɔ naate waa chɔg yabala dɛɛ tɛ Korowii saŋ bɛlbwa la, Korowii kpɔɔ ta. 11 Ba chegɛ Pebie la chal la ne Korowii Waa baa bola la ta dɛ pɔ o nɛ. Ba ta gelɛ ba mkpa waa swɛɛ ba siwi, ba sɛh seo kwara. 12 Anomanta Korowii doa tena, hé gel he sie lɛ. He banɔ la haa lɔ harɛ ta ne mpo ta ge la, hé bwɛɛlɛ, dɛkalkɛŋɔ Baradeɛre Te la tuo ba he be. O baah diu kɛrɛdɛ, O jemɔ kɛ o tɔpere aa kanɛ kpa." 13 Korowii aa kpɔ kontuugi damanta la ta harɛ la, o iro dɛɛ ti haah la waa lolɛ bibaa la. 14 Anee ba tɛ haah la kee kena anɛ o kpɔ dɛ ir kaa pua waa ɛ hɛŋle gbo harɛ, bela baa ɛa tɛo dɛ́ nyiŋu bene atoro ne fah la, asɛ kontuugi damanta la bɛ won ɛo wobɛlbwa. 15 Kontuugi damanta la aa ti haah la la, o pili o nyoa dɛ uge nee a ɛ kɛŋɔ nepale dɛ́ fee palɛ haah la kaa. 16 Kɛ harɛ cha haah la, dɛ pere, dɛ kpɔ nee la bwa nyɔ. 17 Asɛ kontuugi damanta la baah di haah la nɛɛ kohona, o kpɔ ka tɔ haah la naanar baa kaa dɛɛ no Korowii Waa dɛɛ teŋɛ Yeesu danseɛ waa baa dɛ di la ta la nɛ, dɛ ka che mpo nyoa.
