Wepila 11

1Ba kpɔ daa bɛl baa kpɔa dɛɛ magɛ kwaa o do kɛŋɔ daŋgbala tɛ mɛ, dɛ ŋɔ n be ŋɔ, "Korowii ŋɔ hé ir kpɔ daa nɔ ka magɛ Korowii Dea ne bela baa dɛ fuh kwaa dɛɛ tɛo la, dɛ kure nɛra baa dɛ tomɔ o bini la. 2Bɛ bela waa ja Dea la ta ba tel bela mɔɔ dɛɛ jo Dea la tenten bini la te magɛ. Teŋe bela ta, dɛkalkɛŋɔ Korowii kpɔ bela tɛ nɛra baa wola on tomɛ, ásɛ ba tigri o bwɛdɛɛge la ta korobie fifraanaarɛ dɛ anɛ. 3O danseɛ tena banɛ lole, dɛ tɔ lwe yale. Wɛɛ tɛɛ ba kpegrii ba bagle o waa la tɔpera kagboŋ lafraanɛ fifraanumɛl." 4Gɛ nɛra banɛ nɔɔ Ɔleve daa anɛ la ne kwaa anɛ baa kpɔ kandere dɛɛ chɔŋɛ a ta a che harɛ bwa Dɔɔ la sie la che tɛ la. 5Dɛ ba dɔm bɛlbwa ŋɔ o ɛɛ ba wechɔga aa, nii ɛɛ le Korowii danseɛ tena la nyooree dɛ kpo naate. A gɛ seo nɔɔ nomɛlbwa waa ŋɔ o ɛɛ ba wechɔga la ɛɛ ba sewa. 6Ba dɔ kpegri dɛ́ lawɛ bwaala o gel nɛɛ gɛ saŋ baa dɛ bol Korowii Waa la bwa, dɛ berɛ won gel nee berɛ chal. Ba dɔ kpegri kɛ ba kpɔ harɛchɔg waa bɛlbwa ta harɛ nɔ ta saŋ bɛlbwa baa dɛ nyin. 7Dɛ danseɛ tena la bol waa la tonaa, komɛl ɛɛ le Bɔnsam Bɔluŋ la taa dɛ ba yoo ba, dɛ pɔ ba nɛɛ dɛ kpoo ba, 8asɛ ba lala chɔ bwɛjen la ba faa kpo ba Dɔɔ dagagre ta la fɔgbaah. Baa wonoo dɛɛ yerɛ bela Sodom, dɛ berɛ won dɛɛ yerɛ bela Ijipt. 9Wobol te bɛlbwa nɛra baa lɔ harɛ nɔ ta bobɛlbwa ɛɛ nyiŋi ba lala laanee tɔpera atoro ne fah, baa wola sɛh ba hug ba. 10Nɛra baa lɔ harɛ nɔ ta ɛɛ koh ba seo la waa ba sie lɛ ba baah sɔɔh ba. Baa chemoo dɛ lɛ sie, dɛ kɛ dɔŋa kwa, dɛkalkɛŋɔ a gɛ Korowii toroma banɛ la fa kpɔ wahala ta ba nɛɛ taeh. 11Asɛ tɔpera atoro ne fah habɔɔ la, hweera ɛɛ le Korowii bee dɛ jo ba nɛɛ ba dɔ mkpa dɛ ir, asɛ ɔmee lawɛ nɛra baa chega dɛɛ nyiŋ ba la taeh. 12Bela la, gɛ baala banɛ la ɛɛ no takpeg bɛl nyundua o ŋɔ ba be ŋɔ, "Hé ir ba bonɔ!" Asɛ ba ir, bam bɛl kpɔ ba kaa nyundua asɛ ba dɔma che dɛɛ nyiŋ ba haah ken. 13Bug la ta harɛ ɛɛ jigruu kohona, asɛ bwɛjen la deene chogli. Dɛ ba bɔne bwɛɛ la bini bɔre fi aa, deene aa chogli la ɛɛ tel bɔr beŋkpoŋ deenee, nɛra kagboŋa banuanɛ serewe, asɛ ɔmee lawɛ banɔ la baa kaa la, baa kpɛɛ Korowii waa lɔ nyundua la. 14Wekpega aa teŋa nɛɛ la balɔ dɛ kaa. A ka tooro tena aa ba bala taraken. 15Nyundua torome waa teŋa nuanɛ la hoh o bɛla. Waa hoah la, asɛ n no takpega kohona nyundua a ŋɔ, "Harɛ nɔ ta kora bwa berɛ N Naa Korowii ne o Kristo waa tomɔ la kora. Wɛɛ di koraa saŋ bɛlbwa." 16Asɛ nomonome fifraanɛ dɛ banaarɛ baa soge ba kookane ta Korowii sie la ir, dɛ guŋi dɛ kpɔ sie pi harɛ dɛɛ jaamo, 17dɛɛ ŋɔ, "Nemenɛ Korowii haa ɛ komɛlbwa Dɔɔ dɛ do le dɛ le saŋ la bwa ba le fini, ya dɛ jaame kɛŋɔ haa kpɔ he kpegri dɛɛ di kora komɛlbwa nɛɛ nɔ. 18Nɛra baa lɔ harɛ ta baah diu, kɛ tɔpere baa nyɔ he danana nee la ge telo. He bole pae tɔpere telo, hɛɛ ba dɛ ba bol nɛra baa serewa la waa dɛ pa bole, dɛ bɔ he bonɔɔna baa ɛ he keamere ne he nɛra ne banɔ la baa dɛ ɔmɛ la kem, ba bini nɛnjena ne nɛmpɛɛne bwa, dɛ chɔg banɔ la baa dɛ chɔg harɛ la." 19Asɛ Korowii Dea waa lɔ nyundua la pili, ba na daka la waa dɛ bagle kɛ Korowii ne o nɛra fɔwɛ fɔo la. Bwaala ɛɛ nyɛgle pelɔpelɔ ken, dɛɛ kɔgre, harɛ ɛɛ jigri, tombwea ɛɛ lee kohona.

will be added

X\