Wepila 10

1Anɔ bwa habɔɔ la, n berɔ na nyundua torome bokpega te bɛl, o le nyundua dɛɛ tu. O kpɔ baama tɔ kɛŋɔ yal ken. Bwaala deŋgare bar o nyu, o sie bɔr ɛɛ chaah kɛŋɔ wee, asɛ o nakpale ge do kɛŋɔ nii. 2O dɔ tɔnjega bɛl waa pila do o nɔn ta, dɛ kpɔ o nadig do mpo ta, o nagal ge che baŋ, 3dɛ si kpegri nɛɛ kɛŋɔ nyujente yon dɛɛ si la. Waa sia la, bwaala kɔra anuanɛ la ge sɛoh. 4Bwaala kɔra la aa dɛ bol waa la la, n fe dɛ nyin n chwerɛ, dɛ berɛ no taa bɛl nyundua o ŋɔ, "Gel waa bwaala kɔra anuanɛ la aa bola la do he gbo nyu bini. Gel a chwera!" 5Asɛ n berɛ na nyundua torome la n faa nao o naa bɛl do mpo ta bɛl ge che baŋ la aa tɛr o nɔndig pa nyundua, 6dɛ ŋwɛɛ Korowii waa lole saŋ bɛlbwa dɛ ta nyundua ne harɛ ne kwa aa lɔ a ta bwa, dɛ ta mpo ne kwa aa lɔ o ge ta la, dɛ ŋɔ, "Aa bigri kpa. 7Nyundua torome nuanɛ te la bɛla la hoeh saŋee Korowii wesɔɔhla waa bagle o bonɔɔna baa ɛ o keamere la bwa ɛɛ ba ɛɛ tonɛ." 8N berɛ no taa la waa le nyundua dɛ bol waa n be la. O ŋɔ, "La ka lɛ tɔn la waa pila dɛ do nyundua torome la o naa bɛl aa lɔ mpo ta, bɛl che baŋ la nɔn ta." 9N la o be dɛ ŋɔ ó kpɔ tɔnjega la tɛ mɛ. O ŋɔ, "Lɛ dɛ chwe. Wɛɛ do somee kɛŋɔ tooh ken he nyoa bini, dɛ berɛ do kpeli he tea bini o ɛɛ haŋŋ ken." 10Asɛ n lɛ tɔnjega la le o nɔn ta, dɛ kpɔ chwe, o do som n nyoa bini kɛŋɔ tooh ken. Maa lilo la, o berɔ do kpeli n tea bini o ɛɛ mɛ haŋŋ ken. 11Anee ba ŋɔ n be ŋɔ, "A chɛ kɛŋɔ he bagle waa aa dɛ ba nɛndamanta baa lɔ harɛre bwa ta ne wobol bwa soosiwi ne koranar ɛɛ kerekere la ja."

will be added

X\