Wepila 1

1Waa nɔ aa lɔ tɔn nɔ bini nɔ, Korowiirii kpɔa bagle Yeesu Kristo ásɛ o kpɔ bagle o bonɔɔna ne toli bá won jemɛ wa aa dɛ ba ɛɛ taraken. Yeesu Kristo gelɔ nyundua torome bɛl ba o bonɔɔ Jɔn be dɛ ba baglo a wa. 2Jɔn bagle waa waa naa bwa. Korowii waa ne Yeesu Kristo webagla ne waa waa naa dɛ no bwaa o chwerɛ. 3Naate waa kure tɔn nɔ waa dɛ bagle wa aa dɛ ba chiga nɛra no la na som. Banɔ la ge baa no waa baa kure la dɛ ɛ waa waa bagla la, ba gba na som. Tɔpere waa kaa ásɛ waa nɔ bwa chig la aa kanɛ kpa. 4Men Jɔnee chwerɛ waa nɔ dɛɛ tɛ asɔrere bele anuanɛ aa lɔ Eesia harɛ ta la. Korowii waa lole saŋ la dɛ ba le fini, dɛɛ ba le doe saŋ bɛlbwa la, o ne o Domare anuanɛ aa lɔ o kookara mun la, 5ne Yeesu Kristo waa ɛ kasinteŋ te dɛ che tɛ Korowii, dɛ sewɛ, dɛ tɔ nɛra bwa sie ir seo ta, dɛ ɛ koranar baa lɔ harɛ nɔ ta bwa nomoa la, ó cha heya, dɛ tɛ heyaa bosɔɔhna. Hɛ́ɛ tɛ naate waa dɛ nyin yaa, dɛ sewɛ, dɛ kpɔ o chal lɛ yaa, a le yaa wechɔga ta la sɔn. 6O gelɔ ya bwa ɛ o Kora ta nɛra, dɛ ɛ Sɔfore dɛɛ tomɛ o Mɛɛ Korowii. Anomanta hé tɛo sɔn. Onee dɔ kpegri saŋ bɛlbwa dɛɛ la. Aamen. 7Hɛ́ɛ no! Wɛɛ bao. Baamare taa o che dɛɛ ba bala. Nomɛlbwa ɛɛ na o balaa. Nɛra ba faa yagɔ dɛ kpoo la, ba gba ɛɛ nao. Harɛ nɔ ta nɛra bwa ɛɛ nao, dɛ koh o bala waa dɛ ba la waa dɛ wi. Aa ba gɛɛ. Aamen. 8Nemenɛ Korowii waa ɛ komɛlbwa Dɔɔ dɛ do le saŋ la dɛ ba le fini, dɛɛ ba le doe saŋ bɛlbwa la, o ŋɔ, "Menee komɛlbwa Mumpar ne a Jaga." 9Menee Jɔn maa ɛ he dɔŋ, dɛ koh pɛɛ ya bwa ne Yeesu Kristo aa pɛa la waa dɛɛ na wahala, dɛɛ tomɛ Korowii o Kora ta, dɛɛ lawɛ bambile wobɛlbwa ta la. N lɔ ekwi harɛ baa dɛ yerɔ Patmɔs la ta, bela baa koah kɛŋɔ n bol Korowii Waa dɛ ɛ Yeesu danseɛ dɛ lag mɛ ka ta la. 10Awola bɛl ya Dɔɔ Tɔpere ta, Korowii Domadɛɛge ir n nɛ, n no takpeg bɛl n habɔɔ kɛŋɔ bɛla aa dɛ si ken. 11O ŋɔ n be ŋɔ, "Waa nɔ haa dɛ ba nae nɔ, chwera do tɔn bini, dɛ kpɔ ka tɛ asɔrere anuanɛ aa lɔ Ɛfesos, Smɛɛna, Pɛɛgamɔm, Tiatra, Saades, Feladɛlfea ne Laodisia la." 12Belaa n ke nyiŋi kɛ mɛɛ na naate waa bol waa n be laanee, asɛ dɛ na suugaswɛm daa anuanɛ baa kpɔ kandere dɛɛ chɔŋɛ a ta, 13dɛ na komɛl kɛŋɔ nɛn ken, o do batakaarejaŋ o tel o napaala ta, dɛ vɔwɛ suugaswɛm kriso o bambile ta, dɛ do suugaswɛm daa baa kpɔ kandere dɛɛ chɔŋɛ a ta la baah ta. 14O nyumpona too kpelkpel kɛŋɔ yabi, o sibie gee nyɛgle kɛŋɔ ninlao ken. 15O nakpale ge swɛɛrɔ kɛŋɔ baa kpɔ yaawa do nii ta wɛɛ nyɛgle la. Asɛ o taa ge do kɛŋɔ chuubu aa dɛ si la. 16O kpoŋe weweela anuanɛ o nɔndig ta, asɛ tokobijen sie anɛ te waa nyɛga ɛɛ le o nyoa. O sie bɔr ge dɛ nyɛgle kɛŋɔ wee aa dɛ lɔ kpegri nɛɛ la. 17Maa nao la, n cholo chɔ o sie kɛŋɔ serewe ken. O kpɔ o nɔndig dawɛ n nɛ, dɛ ŋɔ, "Bɛ ɔmɛ. Menee komɛlbwa Sitɔɔ ne a Muŋkaa bwa. 18Men lole saŋ bɛlbwa la. N fa sewɔ, kɛ taraken n iro, maa wola sewɛ saŋ bɛlbwa kpa, dɛ dɔ seo ne Lala Bwɛɛ safoone. 19"Chwerɛ waa haa naa nɔ, ne anɔ la aa lole taraken, ne anɔ la aa dɛ ba bala anɔ nɔ habɔɔ. 20Weweela anuanɛ haa naa a do n nɔndig ta la, ne suugaswɛm daa anuanɛ baa kpɔ kandere dɛɛ chɔŋɛ a ta la, n dɛ bagle a mun dɛ tɛɛ. Weweela anuanɛ la ɛ nyundua toroma baa chega tɛ asɔrere bele anuanɛ aa lɔ bwɛɛre anuanɛ la ta la. Daa anuanɛ baa kpɔ kandere dɛɛ chɔŋɛ a ta la gee asɔrere anuanɛ la."

will be added

X\