Felepae 2

1Haa dɔ gbemba pɛɛ he ne Yeesu Kristo aa pɛa la ta, o nyina gee larawe heyaa bwara, he dɔ Korowii Domadɛɛge ge wɛɛ cha heya, dɛ dɔ nɛnnyin he chal do dɔŋa nɛɛ nɔ, 2amɔ hé ɛ waane dɛɛ ja ásɛ n sie lɛ kohona ka tonɛ. N dɛ nyin kɛŋɔ he bwa dɔ nyopɛo, asɛ he liire ne he dɔŋa nyina ne wobɛlbwa haa lii la bwa won ɛ beŋkpoŋ. 3He bɛlbwa bɛ o gbo sɔn nyina kɛɛ jenu waa koh dɛɛ ɛ wa, kɛ hé pwɛr he te dɛɛ tɛ dɔŋa, dɛ kpɔ ba gwaa he gbagba. 4He bɛ gel he gbo waa hiah heya. Hé gel he dɔŋa ge waa hiah heya. 5Gɛ Yeesu Kristo aa doa la, gɛɛ a chɛ kɛ he do. 6O do gɛ Korowii aa doa, kɛ o ta gelɛ gɛ su o siwi kɛ o ne Korowii ɛ kɛrɛdɛ. 7O kpɔ o Korowii dor la bil, dɛ kpɔ o te kɛ somanji, dɛ do gɛ nɛwɛnyini aa doa. 8Waa baa ɛ nɛwɛnyini la, o pwɛr o te dɛɛ no o Mɛɛ Korowii nyoa wobol, dɛ gel ba kpoo. Dagagre ta kwaraa ba kpoo. 9A waa Korowii tɛo nomonome kɛrɛdɛ ga, dɛ berɛ tɛo sɔn gwaa sɔna tena bwa. 10O sɔnjen la nomanta, nomɛlbwa ɛɛ guŋi o siee dɛ kpɔ duure dɛɛ tɛo. Banɔ la baa lɔ nyundua, ne banɔ la baa lɔ harɛ ta, ne banɔ la baa serewa bwa, ba bwa ɛɛ kpɔ duuree dɛɛ tɛo, 11asɛ nomɛlbwa sɛh kɛŋɔ Yeesu Kristoo nɛra bwa Dɔɔ, asɛ o Mɛɛ Korowii dɔ jirima. 12Anomanta n dandɛɛga, gɛ haa dɛ no n waa dɛɛ teŋɛ a ta gɛ saŋ n faa lɔ he be la, a hiaoh kohona kɛŋɔ maa wola toole he be nɔ, hé ta kpoŋe gɛ. Korowii aa lɛ heyaa nɔ, hé kpɔ duure ne ɔmee dɛɛ teŋɛ toma haa dɛ tomɛ Korowii la ta, 13dɛkalkɛŋɔ Korowii soge he bɛlbwa nɛɛ dɛɛ ɛ toma, dɛ gel he won sɛh dɛ won dɛɛ tomɔ kɛrɛdɛ gɛ aa su o siwi. 14Wobɛlbwa haa dɛ ɛ la, he bɛ waa dɛɛ nagre, dɛ bɛ waa dɛɛ tɔŋle, 15dɛkalkɛŋɔ a wer kɛŋɔ he ɛ Korowii bii nomɛlbwa aa wola he wechɔga dɔe dɛ bol, he tea to, he do kaih. Fini nɛra baa ɛ wechɔg-ɛɛra kɛrɛdɛ baa wola ŋwɛnɛ la ta kpɔ baahnee he do. Gɛ weweela aa dɛ chaah jwaana biro ta la, gɛɛ chɛ kɛ he do ba baah dɛɛ chaah. 16Hé gel Korowii wa aa dɔ mkpa la do he bambile bini kɛrɛdɛ dɛɛ la, ń won hɛgre he waa Yeesu Kristo bala tɔpere la ta kɛŋɔ n ta koɛh ta pɛɛ. 17Dɛ yarada haa dɛ yarada Korowii dɛɛ tomɔ la do kɛŋɔ saraha, asɛ a chɛ kɛ n chal fuge a ta naa, n dɛ nyin gɛ. A ba gɛ naa, n sie ɛɛ lɛo, asɛ he puu mɛ lɛ sie. 18Gɛ tentenee a chɛ kɛŋɔ he ge sie lɛ, asɛ n pu heyaa lɛ sie. 19Dɛ ya Dɔɔ Yeesu sɛoh waa, mɛɛ tomɛ Timoti he bee taraken ó ba na heya, dɛ ba bol he waa n be ásɛ n baah sɔɔh mɛ. 20N ne o gboo dɔ liire beŋkpoŋ he wa. Anomanta, n jemɔ kɛ onee he waa do o bambile bini wɛɛ nyin he ne andɛɛga. 21Dɛ o laa aa, bɛlbwa sese dɛ dawɛ o gbagba wa, waa Yeesu Kristo waa dawɛ. 22He gba jemɛ gɛ o waa aa dɔ kasinteŋ dɛ do wer. N ne o pɛo wɛɛ cha mɛ Amanesoma toma la ta kɛŋɔ bechala ne o mɛɛ. 23Anomanta, dɛ n baa na gɛ baa dɛ ba n chega aa, mɛɛ tomɔ he bee. 24N dɔ hwɛga ya Dɔɔ nɛɛ kɛŋɔ aa bigri bɛlbwa asɛ n gbabir dɔ bɔr dɛ ba he be. 25N liiro kɛŋɔ a hiaoh kɛ n tomɛ ya dɔŋ Epafrodaetɔs he be. N ne onee dɛɛ ɛ toma nɔ, dɛ yo dɛɛ tɛ Korowii. Onee he faa tomɛ n be o ba cha mɛ la. N gee berɔɔ tomɔ he be, 26dɛkalkɛŋɔ, he pɛla lawɔ wɛɛ lii he bwa waa taeh. A dɛ hao kohona kɛŋɔ haa no o weela wa. 27O fa we weela dɛ chɔ fɔgɛ taeh, dɛ fe ɛɛ ba sewa. Kɛ Korowiirii na o sum dɛ sune n ne o bwa nɛ. Dɛ o fe sewaa, n tea bini fe chɔgɔ dɛ ja n wahala ta. 28Ate waa n siwi swɛɛ mɛɛ nyin kɛŋɔ n tomɔ he be ásɛ he nao he sie lɛ, asɛ he waa bɛ men dɛɛ ha kohona. 29Hé kpɔ silɛɛ dɛ lɛo, teŋa he ne o bwa aa dɛ teŋɛ ya Dɔɔ nɛɛ la nomanta. Hɛ́ɛ duu nɛra baa do kɛŋɔ on. 30Yeesu Kristo toma waa o koh dɛ kpɔ o nyu charɛ seo. A ka jɛɛ ken o fee sewɛ. Waa haa wola won cha mɛ a ta, dɛ koh a waa tomɔ n be la taa o fe ɛɛ ba sewa.

will be added

X\