Felepae 1

1Men Pɔɔl ne Timoti yaa ɛ Yeesu Kristo bonɔɔna la, yanee chwerɛ tɔn nɔ dɛɛ tɛ Korowii nɛra he ne Yeesu Kristo aa pea he do Felepae la, ne he nomonome ne nɛra baa chɔ tomare nyoa la bwa. 2Ń Naa Korowii ne ya Dɔɔ Yeesu Kristo cha heya, dɛ tɛ heyaa bosɔɔhna. 3Saŋ bɛlbwa maa lii he waa la, n dɛ jam N Naa Korowii he wa, 4dɛ yon kpɔ silɛɛ dɛ soŋo dɛɛ tɛ he bwa, 5pɛɛ ya ne he bwa aa pɛa dɛɛ cha dɔŋa Amanesoma toma la ta le mumpar ba le fini la nomanta. 6N dɔ hwɛga kɛŋɔ gɛ Korowii aa pa mun dɛɛ ɛ o tondɛɛga he bambile bini la, wɛɛ ja a taa ka tel awola Yeesu Kristo aa ba la. 7A ŋwɛnɛ taa n dɔ he hwɛga gɛ la, dɛkalkɛ he bwa waa lɔ n bambile ta. Baa do mɛ dea la, ne yoi maa yoa lɛ Amanesoma la cheg dɛ bol kasinteŋ aa lɔ a ta dɛɛ bagle nɛra la, n ne he bwa nɛɛ Korowii sune dɛ cha yaa a ta. 8Korowii jemɔ kɛŋɔ he pɛla lag mɛ taeh, nɛnnyin Yeesu Kristo aa kpɔa do n bambile ta la nomanta. 9N dɛ soŋe Korowii kɛŋɔ o gel he dɔ nɛnnyin kɛrɛdɛ dɛɛ ja, dɛ berɛ dɔ wejema ne nfɛrɛ dɛ ja a ta, 10ásɛ dɛ won jemɛ waa aa wera kohona. Anee dɛ gel he won do kaih, nomɛlbwa aa wola he wechɔga dɔe ba dɛ bol ka tel awola Yeesu Kristo aa ba la. 11N dɛ soŋo kɛ he che Yeesu Kristo kpegri la ta dɛ won dɛɛ ɛ wedɛɛga kɛrɛdɛ, ásɛ nɛra ɛɛ tɛ Korowii sɔn ne jirima. 12Yabala, n dɛ nyin kɛ he jemɛ kɛŋɔ wedɛɛga le waa aa chig n nɛɛ la ta, dɛ gel Amanesoma la won kaa sie. 13Bonɔ koojen soojare baa dɛ daah o dem, ne nɛra baa lɔ bonɔ bwa jemɔ kɛŋɔ maa ɛ Yeesu Kristo bonɔɔ waa ba do mɛ dea. 14Asɛ n dea chɔe la berɛ gel yabala galga gee yarada ya Dɔɔ Yeesu kohona, dɛ dɔ bambile dɛɛ bagle Korowii Waa la kɛrɛdɛ, baa wola ɔmɛ. 15Kasinteŋ, bɔweela ne dɔŋa meera waa nɛra bane ɛɛ bol Amanesoma la, asɛ bane gee bola bambile bwa ne. 16Ba te la, nɛnnyin waa baa ɛa, dɛkalkɛ ba jemɔ kɛŋɔ Korowiirii kpɔ toma nɔ tɛ mɛ ŋɔ ń yo lɛ Amanesoma la cheg. 17Banɔ la ge, ba gbagba sɔn nyina waa baa bol Yeesu Kristo wa, ba tepoŋ ne laa. Ba dɛ lii kɛŋɔ ba ɛ gɛ naa, baa wonoo gel n tea bini chɔg dɛ ja n dea chɔe nɔ ta. 18Kɛ pɛɛpɛɛ. Dɛ liichɔga nee baa bola o, dɛ tepoŋ nee baa bola o, Yeesu Kristo waa baa bol la, n baah sɔɔh mɛ. Aa sɔɔh mɛɛ dɛɛ la, 19dɛkalkɛŋɔ n jemɔ kɛ Korowii ɛɛ lɛɛ mɛɛ le waa aa chig n nɛɛ nɔ ta, he Korowii soŋa ne Yeesu Kristo Domadɛɛge la alaworomɛ. 20Waa maa dɛ nyin n siwi swɛɛ a ta laanee kɛŋɔ n bɛ n toma ba ɛ kahonɛ sihiih ba kpo mɛ, asɛ n won dɔ bambile kɛrɛdɛ taraken kɛŋɔ n faa dɔ bambile la, asɛ Yeesu Kristo won dɔ jirima n we-ɛɛla bini. Dɛ ba gelɔ n so le noo, ba kpo mɛ noo, Yéesu Kristo dɔ jirima a bwa bini. 21N soga nɔ maa soga nɔ, Yeesu Kristo waa n so. Dɛ n sewɔ ge aa, anee dɔ tɔnɔ tɛ mɛ kwara. 22Kɛ dɛ n ta soge le naa, mɛɛ ba wonoo ɛ toma a won dɔ tɔnɔ kɛrɛdɛ. Anomanta, maa jemɛ onɔ la bwa waa wera n be ń kpɔ. 23N chiŋchaŋo. N dɛ nyin kɛ n sewɛ dɛ ka so Yeesu Kristo be. A bɔ kohona kɛ maa soge bonɔ. 24Kɛ he nomanta, a hiaoh kohona kɛ n do bonɔ dɛ́ won cha heya. 25Anomanta, n jemɔ kɛŋɔ mɛɛ so he bee dɛ won cha he bwa he kpeg Yeesu Kristo waa la ta, dɛ dɔ silɛɛ he yarada ta, 26asɛ dɛ n baa so he be ja aa, he won dɔ bɔr kɛrɛdɛ dɛɛ jaagi n wa, dɛɛ kpɛɛ Yeesu Kristo. 27Waa aa hiaah laanee kɛŋɔ hé gel he we-ɛɛla bwa do wer gɛ aa chɛ kɛ nɛra baa no Yeesu Kristo Amanesoma la waa aa doa, asɛ dɛ n baa ba he be noo, n ta ba wone ba noo, ń no he waa kɛŋɔ he bwa liire ɛ beŋkpoŋ, he che kiŋkiŋ, he nyoa pɛ, he che tɛ Amanesoma la haa yaradaa la, a won la sie, 28dɛ berɛ dɔ bambile haa wola he dɔma ɔmɛ tamaa bɛlbwa bwa. He bambile dɔe la taa bá che jemɛ kɛŋɔ Korowii gbagba ɛɛ lɛ heyaa dɛ chɔg ba. 29Korowii gelɔ he won yarada Yeesu Kristo, dɛ berɛ won koh o waa na hɔhɔrɔwa. Wejenaa o ɛ tɛ heyaa he won koh o waa na hɔhɔrɔwa la. 30He gba dɛ yo gɛ tenten he faa na mɛ mɛɛ yo la. Gɛ yoi laanee hɛɛ no kɛ n ta dɛ yo la.

will be added

X\