Maatiu 9

1Yeesu jo gbera ta dɛ gale moo la kaa o gbagba bwɛɛ ta. 2Belaa nɛra bane kpɔ weela te bɛl waa kuuga so fɔɔ kalaŋ ta dɛɛ chemo. Yeesu aa na gɛ baa yaradao la, o ŋɔ naate waa kuuga la be ŋɔ, "Sɔɔh bwara. Aa magroo, n bie. N kpɔ he wechɔga kɛɛ." 3Anee Tɔn Jerema bane lii ba nyu bini ŋɔ, "Baa nɔ dɛ ɛ Korowii nɛnhɛla!" 4Yeesu aa jemɛ waa aa lɔ ba nyu bini la, o ŋɔ, "Ɛrɛɛ hɛɛ lii musu waa nɔɔ? 5Maa ŋɔ o be ŋɔ n kpɔ o wechɔga kɛo nɔ, ne kɛŋɔ maa ŋɔ o be ŋɔ ó ir dɛ valɛ, a bini umee kpega ɔ? 6Mɛɛ chagle heyaa kɛŋɔ n Nɛn Bie dɔ kpegri harɛ nɔ ta kɛ n kpɔ nɛra wechɔga kɛ ba." Asɛ o ŋɔ naate waa kuuga la be ŋɔ, "Ir kpɔ he kalaŋ dɛ kaa dem." 7Baa la den ir che dɛ kaa o dem. 8Nɛnlaa la aa na a gɛ waa nɔ la, ɔmee lag ba, ba kpɛɛ Korowii kɛŋɔ waa tɛ nɛwɛnyini ge ŋwɛnɛ ŋɔ ba won ɛ a gɛ waa nɔ la. 9Yeesu aa le bela dɛ valɛ dɛɛ kaa la, o kaa na baa bɛl waa dɛ lɛ lampoo baa yerɔ Maatiu, dɛ o soge o toma ta dɛɛ lɛ lampoo. Anee Yeesu ŋɔ o be ŋɔ, "Ba teŋɛ n nɛ." Asɛ Maatiu ir dɛ teŋɛ o nɛ. 10Yeesu la Maatiu dem dɛ ka so tig ta. Waa dɛ di kwaa la, lampoo lɛɛra baa dɛ bɔ apoo ne wechɔg-ɛɛra pirim baa ja o ne o habɔteŋra la nɛɛ baa di. 11Farisii tena bane aa na gɛ la, ba pɛɛ Yeesu habɔteŋra la ŋɔ, "Ɛrɛ waa he dɔɔ nɔ ne a gɛ nɛra nɔ pɛ dɛɛ di kwaa nɔɔ?" 12Yeesu no waa baa pɛɛra la dɛ chaŋ ba ŋɔ, "Weela tenaa hiah tɛɛga te, bokpega tena laa. 13Hé ka kwaa hweli waa baa chwera bil heyaa ŋɔ, 'He dɛ na he dɔŋa sum aa, anee mɛɛ nyin dɛ gwaa haa kpoo kwaa dɛɛ tɛ mɛ' la. Nɛra baa dɛ lii ba te nɛndɛɛga waa laa n ba. Wechɔg-ɛɛra waa n ba ásɛ ba charɛ ba liire." 14Jɔn waa dɛ sɔ nɛra Korowii nee la habɔteŋra ge baa pɛɛ Yeesu ŋɔ, "Ɛrɛ waa ya ne Farisii tena nɔ te yon dɛɛ vɔwɛ nyoa, asɛ he te habɔteŋra nɔ te aa wola nyoa vɔwɛ kwaraa nɔɔ?" 15Anee Yeesu sɛg ba ŋɔ, "Baa kpɔ hanfale dɛ yerɛ o daamanar ŋɔ bá ba bá lɛ ba sie aa, baa berɔɔ so lɔr aa? Baa lɔree so. Kɛ tɔpere bɛl ɛɛ bao kɛŋɔ baa lawɛ hanfale jaa laanee le ba bini. Gɛ saŋ la te, baa vɔwɛ nyoa. 16"Baa yafale yakwara kpɔe dɛɛ tɔ yabene waa hɛah bɔɔ. A ba gɛ naa, yafale yakwara la ɛɛ kɛɛroo le yabene la ta, asɛ bɔɔ la berɛ do kan kohona. 17Gɛɛ baa wola senfala kpɔe dɛɛ do loŋbena aa kɔɔhna bini dɛɛ tɔ a nyoa. Gɛ laa, dɛ sen la baa peraa, aa do kpegrii dɛ pere loŋa la a chɔg, asɛ sen la fuge. Loŋfale binii baa do senfala ásɛ a bwa won do wer." 18Yeesu taa dɛ bol waa nɔ la, cheremi dea nomoa bɛl baa guŋi o sie dɛ ŋɔ, "N bie sewɔ taraken. Kɛ ba kpɔ nɔn dawɛ o nɛ ásɛ o berɛ ir." 19Anee Yeesu ne o habɔteŋra la bwa ir teŋɛ o nɛ. 20Belaa haah bɛl chal aa fugo bene fi dɛ anɛ ba kpɔ Yeesu habɔɔ dɛ ka lege o batakaare nyoa. 21Dɛ o tɔ sie lii o nyu bini kɛŋɔ dɛ o lege Yeesu batakaare nyoa gbo kwaraa naa, wɛɛ gbaŋroo. 22Yeesu ke nyiŋi dɛ na haah la, asɛ dɛ ŋɔ, "Tolo, sɔɔh bwara. He yarada haa yarada mɛ la gelɔ he gbaŋre." Gɛ waa nɔ taa haah la gbaŋre. 23Belaa Yeesu jo cheremi dea nomoa la dem. Waa na gɛ hɛhɛla la ne nɛra baa dɛ ɛ lwe la aa dɛ do gbɔga la, 24o ŋɔ ba be ŋɔ, "Hé bwa le dem bonɔ! Bie la ta sewɛ, domii o chɔ." Waa ŋɔ gɛ la, ba mamɔ. 25Baa doŋi nɛra la bwa le dem bela tonɛ la, Yeesu jo dea bela tolo la aa chɔa la dɛ lawɛ o nɔn, asɛ tolo la ir dɛ dɔ bokpega. 26Gɛ waa nɔ perɛ baah bela bwɛɛre la kɛrɛdɛ bwa ta. 27Yeesu aa le bela dɛɛ kaa la, nyoŋa banɛ bane no o gbɔga dɛ ir teŋɛ o nɛɛ dɛɛ yerɔ dɛɛ ŋɔ, "Devid Naa, na ya sum!" 28Yeesu aa kaa jo dem la, nyoŋa la joɔ puu, anee o pɛɛ ba ŋɔ, "He dɛ yarada mɛ kɛŋɔ mɛɛ wonoo chah heya aa?" Anee ba ŋɔ, "Ɔɔh, ya Dɔɔ." 29Anee Yeesu kpɔ nɔn lege ba sie dɛ ŋɔ, "Gɛ haa dɛ yarada la, a ɛ gɛ tɛ heya." 30Asɛ ba bwa berɛ dɛɛ na. Anee Yeesu kah ba sibegra ne ŋɔ, "He bɛ waa nɔ taa bagle nomɛlbwa." 31Kɛ ba garɔ le dɛ ka gel waa la perɛ baah bela bwɛɛre la bwa ta. 32Nɛra la aa le dem bela dɛɛ kaa la, nɛra bane ge berɔ kpɔ baa bɛl kwaa aa ir o nɛɛ o bol waa kahonɛ ba Yeesu be. 33Yeesu aa doŋi kwaa la le o nɛɛ la, baa la den dɛɛ bol wa, asɛ nomɛlbwa waa lɔ bela la nyoa kpo. Ba ŋɔ, "Ya ta waa nɔ dɔŋa nae Israel harɛ nɔ ta bwa!" 34Anee Farisii tena la te ŋɔ, "Kwaa aa dɛ ir nɛra nɛɛ bwa nomoaa tɛo kpegri o won kwaa doŋa nɛra nɛɛ la." 35Yeesu gaage bwɛjena ne anjegre bwa ta dɛ bol Korowii Kora Amanesoma bag ba ba cheremi deene, dɛ chah nɛra baa we weela te bɛlbwa soosiwi. 36Waa na nɛnlaa la gɛ la, ba waa do o sum, dɛkalkɛ ba ɛ nɛra ba bwara aa dɛ nyɛg baa wola lɛɛ dɔe kɛ peera aa wola tegre dɔe ken. 37Anee o kpɔ nɛra la magɛ konduula dɛ ŋɔ o habɔteŋra la be ŋɔ, "Koo kondikwaa la kan, kɛ tom-ɛɛra la lɔ tamaa ken dɛɛ ba a koma. 38Anomanta hé soŋe Koo Te ásɛ o kpɔ tom-ɛɛla bane ba ja bá ka ɛ a toma."

will be added

X\