Maatiu 5

1Yeesu aa na nɛnlaa la la, anee o teeh bwejen bɛl dɛ ka so, asɛ o habɔteŋra la baro cheme, 2asɛ wɛɛ bag ba waa dɛɛ ŋɔ, 3"Nɛra baa kpɔ ba te dawɛ Korowii nɛɛ kɛ nyaara la, ba na som, dɛkalkɛ banee dɛɛ ba nyundua koobii ɛɛ. 4Nɛra baa dɛ wi taraken la, ba na som, dɛkalkɛ Korowii ɛɛ larawe ba bwaraa. 5Nɛra baa dɛ pwɛr ba te la, ba na som, dɛkalkɛ Korowii nyobaga la, banee o bagɛ tɛ. 6Nɛra ba sie aa begre waa aa togra dɛɛ su Korowii siwi la, ba na som, dɛkalkɛ Korowii ɛɛ cha baa a ta kɛrɛdɛ bá dɔa ba tetoora. 7Nɛra baa dɛ na nɛra sum la, ba na som, dɛkalkɛ Korowii gee na ba sumii. 8Nɛra ba tea bini aa toa la, ba na som, dɛkalkɛ banee dɛɛ ba Korowii nae. 9Nɛra baa dɛ larawe waa dɛɛ sɔɔh waa nyoa la, ba na som, dɛkalkɛ Korowii ɛɛ yer ba o biirii. 10Nɛra baa dɛ ɛ waa aa dɛ su Korowii siwi, nɛra koh a waa dɛɛ ɛɛ ba hɔhɔrɔwa la, ba na som, dɛkalkɛ banee dɛɛ ba nyundua koobii ɛɛ. 11"Dɛ nɛra koh teŋa haa teŋɛ n nɛɛ nɔ waa dɛɛ chɛgre heya, dɛɛ ɛ heyaa hɔhɔrɔwa, dɛɛ teŋe nyosone, dɛ bol musu waa bɛlbwa dɛɛ dawɛ he nɛ aa, he na som. 12Hé gel he sie lɛ kohona, dɛkalkɛ he kembɔr kan taeh Korowii be. Gɛɛ ba kpɔ ɛ Korowii keamere baa tɔ sie la. 13"He do kɛŋɔ yar aa dɛ kwaa dɔr nɛwɛnyina bwa bini. Dɛ yar aa somɛ kpa a, ɛrɛɛ baa ba a ɛɛ á do som jaɔ? A ta wejema dɔe bá ɛ kpa. Fugaa a den chɛ kɛŋɔ he fuga ta dɛ tigri a ta. 14He do kɛŋɔ nii waa dɛ chaah bɔr nɛwɛnyina bwa bini. Bwɛjen waa dawɛ deŋgare doa la aa won sɔh. 15Nomɛlbwa aa kandea choŋi dɛ kpɔ kon dɛɛ pi o ta. Kɛ ba dɛ choŋu dɛ kpɔ chɔŋɛ kon ta ásɛ o chaah tɛ nɛra baa lɔ dem bela la bwa. 16Gɛɛ chɛ kɛŋɔ he chaah tɛ nɛra ásɛ ba na he wedɛɛga ɛɛ dɛ duu he Mɛɛ waa lɔ nyundua la. 17"He bɛ dɛɛ lii kɛ n balɔ dɛ́ ba chɔg Mosis Mmara la ne waa Korowii keamere la aa chagla la. A chɔga laa n ba. N balɔ dɛ́ ba gel a dɔ mun kɛrɛdɛ. 18Kasinteŋ, nyundua ne harɛ taa lole nɔ, Mmara nɔ bini wejega bɛlbwa aa lee ba. 19Anomanta naate waa berɛ Mmara la bini onjega bɛlbwa dɛ berɛ chagle bane ge ba ɛ gɛ la, waa bɔr dɔe ba Korowii Kora bini. Naate ge waa dɛ teŋɛ Mmara la ta, dɛ chagle bane ge baa ɛ gɛ la, wɛɛ dɔ nomonsoŋnibɔree Korowii Kora bini. 20Kasinteŋ, n dɛ ŋɔ he be, dɛ he wedɛɛga ɛɛ ta Tɔn Jerema ne Farisii tena wedɛɛga ɛɛ gwaalaa, haa won ja Korowii Kora ta ŋwɛnɛ bɛlbwa ta. 21"He noɔ kɛ ba ŋɔ saŋ la tena be ŋɔ, 'Bɛ nɛn kpo. Nomɛlbwa waa kpo nɛn la, o ɛ wechɔga kɛŋɔ bá bol o waa dɛ pa bole.' 22Kɛ taraken n dɛ ŋɔ he be, nomɛlbwa o baah naa di o dɔŋ nɛɛ la, o ɛ wechɔga kɛŋɔ bá bol o waa dɛ pa bole. Nomɛlbwa ge waa yerɛ o dɔŋ nɛnsala la chɛ kɛ o che Juda tena nomonome bwa sie. Asɛ nomɛlbwa o ge aa yerɛ o dɔŋ koŋgɛne bɛl la, a chɛ kɛ ba tao Bɔnsam nii ta. 23"Anomanta dɛ he kpɔ jam kwaa dɛɛ la ká tɛ Korowii bela baa dɛ fuh kwaa dɛɛ tɛo la, dɛ lii kɛ he ne he dɔŋ bɛl dɔ waane aa, 24gel he kwaa la bela, dɛ la ka nyin he dɔŋ la hé ne o nyoa ka pɛ mɔɔ he ba kpɔ he kwaa la tɛ Korowii. 25Dɛ he ne he dɔŋ dɔɔ, asɛ o kpɔe dɛɛ kaa kɔɔto aa, larawo hé kwaa he baah. Gɛ laa aa, o dɔɔ tel he ne bela aa, kɔɔto nomoa la ɛɛ kpɔe tɛ prosiri bá ka doe dea. 26Kasinteŋ, dea belaa hɛɛ ba kae ka tel gɛ saŋ haa bɔ he kem la bwa, kapɛrɛ gba aa wola ka mɔɔ ba lee. 27"He noɔ kɛ ba faa ŋɔa ŋɔ, 'Bɛ jwamane dɛɛ bɔ.' 28Kɛ taraken n dɛ ŋɔ he be ŋɔ, he naate haa na haah dɛ nyiŋu he pɛla do o nɛɛ la, he bɔ jwamane he bambile bini. 29Anomanta, dɛ he dig siwi ɛɛ geloo he ɛ wechɔga aa, fomo ta! He fomo ta kwaraa bɔ kɛ haa kpɔ sibie anɛ kaa Bɔnsam nii ta. 30Dɛ he nɔndig ɛɛ geloo he ɛ wechɔga aa, teŋo ta! He teŋo ta kwaraa bɔ kɛ haa kpɔ nɔɔra anɛ kaa Bɔnsam nii ta. 31"Ba fa ŋɔ nomɛlbwa dɛ ba o haah vɛɛh yaa, ó chwerɛ tɔn tɛo dɛ vɛoh. 32Kɛ taraken te n ŋɔ baa bɛlbwa o haah naa wola baala nyine, asɛ o vɛoh la, o di bolchɔge, dɛkalkɛ o gelɔ haah la bɔ jwamane. Asɛ naate ge waa bera ka mo haah la baa vɛoh la, o ge bɔ jwamane. 33"He noɔ kɛ baa ŋɔ saŋ la tena be ŋɔ, 'Bɛ waa haa bagɛ nyoa dɛ ŋwɛɛ a ta la ta koni. Ɛ waa la tɛ Korowii.' 34Kɛ n dɛ ŋɔ, he be ŋɔ he bɛ ŋwɛɛ kwaraa. He bɛ nyundua ŋwɛɛ, dɛkalkɛ Korowii soŋnibɔree. 35He bɛ harɛ ŋwɛɛ, o natigribɔree. He bɛ Jerusalam ŋwɛɛ, Koojen bwɛɛ bela. 36He bɛ he nyu gba ŋwɛɛ. Haa won gel he nyumpon beŋkpoŋ gba to, gɛɛ haa wola won gel o bir ge. 37Ba dɛ bɔɔre waa dɛ a ɛ kpela aa, sɛh ŋɔ, 'Ɔɔh,' dɛ nyosone gee yaa, ŋɔ, 'Ɔɔhɔ.' He bol waane ja a ta naa, amɔ a te le Bɔnsam be. 38"He noɔ kɛ ba faa ŋɔa ŋɔ, 'Dɛ nɛn fome he siwi aa, hé ge fome o siwi. Dɛ nɛn fome he nyen aa, hé ge fome o nyen.' 39Kɛ taraken te n ŋɔ, dɛ nomɛl ɛɛ wechɔga aa, bɛ wechɔga kpɔ bɔɔ kem. Dɛ nomɛlbwa kpaa he dig lwɛɛma aa, berɛ gal lwɛɛma la ge tɛo ó kpaa ja. 40Dɛ nomɛl dɛ nyin kɛ o kpɔe la kɔɔto dɛ́ ka lɛ he batakaare aa, kpɔ he yal ge jao. 41Dɛ kpegnɛn ge dɛ doe ŋɔ hé che o bone ka doo kwansini beŋkpoŋ naa, che ka doo kwansini anɛ. 42Dɛ nomɛl soŋe komɛl aa, kpɔ tɛo. Dɛ nomɛl ge ŋɔ o dɛ nyin komɛl dɛ kemaa, kpɔ kemɔ. 43"He noɔ kɛ ba faa ŋɔa ŋɔ, 'Hé nyin he daamanar dɛ hah he dɔma.' 44Kɛ taraken n dɛ ŋɔ he be, hé nyin he dɔma dɛ soŋe Korowii dɛɛ tɛɛ ba, 45ásɛ nɛra jemɛ kɛ he ɛ he Mɛɛ waa lɔ nyundua la bii, dɛkalkɛ o te gelɔ wee lɔ dɛɛ tɛ wechɔg-ɛɛra ne nɛndɛɛga bwa, dɛ nɛ bwaala ge dɛɛ tɛ nɛndɛɛga ne wechɔg-ɛɛra bwa. 46Dɛ he dɛ nyin nɛra baa dɛ nyin heyaa gbo aa, kembɔr besoo hɛɛ ba dɔe le Korowii be nɔ? Wechɔg-ɛɛra gba dɛ nyin nɛra baa dɛ nyin ba wa. 47Dɛ he ne he chamenetena gbo dɛ bol wa aa, dɛ amee he ɛ gwaa he bala ɔ? Hale nɛra baa wola Korowii tomɛ gba won gɛ ɛɛ! 48A chɛ kɛŋɔ he we-ɛɛla bwa do kaih, gɛ he Mɛɛ waa lɔ nyundua la waa aa do kaih la.

will be added

X\