Maatiu 4

1Belaa Korowii Domadɛɛge la kpɔ Yeesu kaa pua waa ɛ hɛŋle gbo ta ásɛ Bɔnsam daahno na. 2Dɛ Yeesu lawɛ o nyoa vɔwɛ tɔpebire fifraanaarɛ. Dɛ lɔr dɛ kpoo. 3Anee Bɔnsam ba o be dɛ ba ŋɔ o be ŋɔ, "Dɛ henee Korowii Bie la kpela aa, gel bwea nɔ berɛ paanoo hé di." 4Anee Yeesu ŋɔ, "Korowii Tɔn baglɔ ŋɔ, 'Kondikwaa gbo laa dɛɛ tɛ nɛn mkpa. Waa Korowii aa dɛ bol la bwa ge dɛ tɛ nɛn mkpa.' " 5Anee Bɔnsam kpɔɔ kaa Korowii Bwɛɛ Jerusalam la ta dɛ kpɔɔ ka cheg Korowii Dea la nyundujagla, 6asɛ dɛ ŋɔ o be ŋɔ, "Dɛ henee Korowii Bie la kpela aa, che bonɔ dɛ jah le harɛ, dɛkalkɛ Korowii Tɔn baglɔ kɛ, 'Korowii ɛɛ geloo o nyundua toroma ɛɛ nyiŋi he nɛɛ kɛrɛdɛ. Baa lawɛɛ haa wola nakpala kwaraa lɔ.' " 7Anee Yeesu chaŋo ŋɔ, "Korowii Tɔn baglɔ ŋɔ, 'Bɛ N Naa Korowii daah na.' " 8Anee Bɔnsam berɛ kpɔɔ ka chɔŋɛ bobɛl waa do kɛŋɔ bwejeŋ bɛl doa dɛ baglo harɛ nɔ ta bela bwa kora dii aa lole ne kondɔɔh ne konjena aa lɔ o ta bwa, 9dɛ ŋɔ o be ŋɔ, "Dɛ he guŋ mɛ harɛ dɛ duu mɛ naa, mɛɛ kpɔ kwaa haa naa nɔ bwaa tɛɛ." 10Anee Yeesu kɔro ŋɔ, "Le n jwɛɛh kaa, Bɔnsam! Korowii Tɔn baglɔ ŋɔ, 'Dɛɛ duu N Naa Korowii dɛɛ tomɛ o gbo.' " 11Anee Bɔnsam gelo dɛ kaa, asɛ nyundua toroma ba chao. 12Gɛ saŋ Yeesu aa noa kɛ ba lawɛ Jɔn do dea la, o berɔ kaa Galilia harɛ ta. 13O la Nasarɛt, kɛ o ta bela soge, dɛ berɛ ka so bwɛɛ bɛl waa lɔ Galilia Moo la nyoa dɛ do Sebulɔn ne Naftale harɛ ta baa yerɔ Kapeeneɔm la ta. 14Gɛ waa nɔɔ gela Korowii keame Aesaya waa o faa bola la ɛ kasinteŋ. O bolɔ ŋɔ, 15"Nɛra baa lɔ Sebulɔn ne Naftale harɛ waa lɔ Jɔɔdan Moo la baŋ, dɛ kpɔ dɛɛ kaa moo nyoa bela la, Galilia harɛ ta bela hɔɔhra aa wara dɛ koo Juda tena bini la, 16gɛ nɛra nɔ ba wechɔga aa gela ba do seo lɔga kɛ nɛra baa soge biro ta la, ba na nii bɛl o chaah kohona tɛ ba bwa." 17Gɛ saŋ laanee Yeesu pa mun bol waa dɛɛ chagle nɛra ŋɔ, "Hé charɛ he liire le he wechɔga ta, dɛkalkɛ Korowii Kora la pu heyaa tonɛ." 18Yeesu aa dɛ valɛ Galilia Moo la nyoa la, o na baala banɛ baa dɛ ɛ nee toma dɛɛ ta asau. Baala banɛ laanee Seemɔn baa dɛ yerɔ Pita la ne o nime Andriu. 19Anee Yeesu ŋɔ ba be ŋɔ, "Hé gel he pɛŋa la nyina dɛ ba teŋɛ n nɛ, ásɛ n bagle heyaa gɛ baa nyin nɛra baa tɛ Korowii." 20Bug la ta ba den gel ba asauri la bela dɛ kpɔ teŋɛ o nɛ. 21Waa dɛ kaa sie la, o berɔ ka na Sebedii bii banɛ, Jems ne o nime Jɔn, dɛ ba ne ba mɛɛ lɔ gbera bini dɛɛ tɔɔge ba asauri, asɛ Yeesu yer ba. 22Bug la ta ba den gel ba mɛɛ ne gbera la bela dɛ kpɔ teŋɛ Yeesu nɛ. 23Yeesu gaage Galilia harɛ ta bobɛlbwa dɛ jo cheremi deene bini dɛɛ chagle nɛra Korowii Kora la Amanesoma wa, dɛɛ chah nɛra baa dɛ we weela bwa soosiwi. 24O waa perɛ Siiria harɛ bobɛlbwa, anomanta bela tena kpɔ ba weela tena baa dɛ we weela bwa soosiwi dɛ ba o be. Banɔ la kwaa aa dɛ ir ba nɛ, ne banɔ la baa dɛ we gbuŋgbuŋri, ne banɔ la ba nɔɔra ne ba nakpale aa serewa bwaa ba kpɔ ba Yeesu be o chaah ba. 25Dɛ nɛnlaa tenten le Galilia harɛ ne bwɛɛre fi baa dɛ yera Dekapɔles la, ne Jerusalam, ne Judia harɛ, ne Jɔɔdan Moo baŋ bwɛɛre bwa ta dɛ kpɔ teŋɛ Yeesu nɛ.

will be added

X\