Maatiu 3

1A gɛ saŋ la, dɛ baa bɛl waa dɛ sɔ nɛra Korowii nee baa yerɔ Jɔn ba Judia harɛ pua waa ɛ hɛŋle gbo la ta dɛ baa bol Korowii Waa ŋɔ, 2"Hé charɛ he liire le he wechɔga ta, dɛkalkɛ Korowii Kora tel he be tonɛ." 3Jɔn nɔ waa Korowii keame Aesaya faa bol la. O fa bolɔ ŋɔ, "Nomɛl dɛ bol waa takpeg ne pua waa ɛ hɛŋle gbo ta, dɛ ŋɔ nɛ́ra gel ba we-ɛɛla togre, dɛ kpɔ ba te dɛɛ kpa ba Dɔɔ bala." 4Gɛ Jɔn nɔ, nyogma pona nee ba sɔh o yal, asɛ o kpɔ ol tɔn ɛ kriso dɛɛ vɔwɛ o chara. O kondikwaa gee tontombɛ ne tooh. 5Dɛ nɛra le Jerusalam ne Judia harɛ ta bobɛlbwa, ne bwɛɛre aa lɔ Jɔɔdan Moo la nyoa bwa dɛɛ ba o be. 6Ba bol ba wechɔga chaglo waa, dɛ o sɔ ba Korowii ne. 7Jɔn aa naa kɛ Farisii tena ne Saduki tena ge warɔ dɛɛ ba o be ó sɔ ba Korowii nee la, o ŋɔ ba be ŋɔ, "Nɛnchɔga kɛŋɔ harɛkwaa baa do nii kpɔg ta asɛ a le dɛ chwa dɛɛ kaa la! Umee ŋɔ he be ŋɔ hɛɛ wonoo chwa le Korowii bandia ta nɔ? 8Hɛ́ɛ ɛ waa aa dɛ chagle kɛŋɔ he charɛ he liire le he wechɔga ta. 9He bɛ dɛɛ lii kɛŋɔ haa ɛ Abraham naanar la gbo ɛɛ wonoo gel he chwa Korowii bandia la. Kasinteŋ, Korowii ɛɛ wonoo gel bwea nɔ begre Abraham naanar. 10He do kɛŋɔ daa. Daa bɛlbwa waa wola nɔndɛɛga nɔnɛ la, baa teŋo ta dɛ fuuh. Gɛɛ Korowii ge gɔɔ o kpanfɛ nɛra baa wola ba liire charɛ la nɛɛ dɛɛ ba ba teŋna ta dɛ kpɔ ba do nii ta bá fuh. 11"N te, nee n kpɔ dɛɛ sɔ heyaa Korowii nee dɛ́ chagle kɛ he charɛ he liire le wechɔga ta. Kɛ naate waa ba n habɔɔ la te, wɛɛ kpɔ Korowii Domadɛɛge ne niinii sɔ heya. O gwaa mɛ. Maa o napaa tee kwaraa dɔ. 12O kpoŋe o lukoli dɛɛ ba ó ba palɛ o mea. Wɛɛ kpɔ a bie laanee do dɔndɔŋ bini cheg, asɛ a pɛga la, o kpɔa ka ta nii aa wola dime bwa ta." 13Gɛ saŋee Yeesu le Galilia harɛ dɛ ba Jɔɔdan Moo la nyoa Jɔn be ŋɔ ó sɔɔ Korowii ne. 14Dɛ Jɔn fe dɛ nyin vɛɛh, dɛ ŋɔ, "Menee chɛ kɛŋɔ ń ba he be hé sɔ mɛ Korowii ne, gɛɛ he ba n be naa?" 15Anee Yeesu ŋɔ, "Taraken nɔ te, sɔ mɛ. He sɔ mɛ naa, gɛɛ yaa ba wona ɛ wedɛɛga aa dɛ su Korowii siwi la bwa." Asɛ mɔɔ Jɔn sɛh dɛ sɔɔ nee la. 16Waa sɔɔ Korowii nee la tonɛ la, Yeesu le nee ta dɛ ba che baŋ. Nyundua pilo, asɛ o na Korowii Domadɛɛge o do kɛŋɔ brɔnoma ken dɛ ba ba so o nɛ. 17Asɛ taa bɛl le nyundua ŋɔ, "N bie maa dɛ nyinu o wa ɛɛ su n siwii nɔ."

will be added

X\