Maatiu 28

1Ona Tɔpere la aa gara, asɛ tɔɔ ɛɛ ba pera Kwasiara la, Mɛɛre waa le Magdala la ne o dɔŋ Mɛɛre la iro ŋɔ ba dɛ la ka nyiŋi bela baa huge Yeesu la. 2Kerabeŋkpoŋ dɛ nyundua torome bɛl le nyundua tu harɛ, asɛ harɛ jigri kohona. O la bɔɔ la ta dɛ ka gbili bwejen la le o nyoa, dɛ so o ta. 3Dɛ he nao waa, o dɛ jajare sie kɛŋɔ bwaala nyɛgla ken, asɛ o laala waa doa la ge to kpelkpel ken. 4Soojare baa dɛ daah bela la aa nao la, ba ɔmɔ taeh, ba bwara ɛɛ sa, dɛ bwa serewe chɔɔge kɛŋɔ nɛra baa serewa ken. 5Anee nyundua torome la ŋɔ haahna la be ŋɔ, "He bɛ ɔmɛ. N jemɔ kɛ Yeesu baa kpaaro pɛl dagagre ta o sewɛ la bɔree hɛɛ nyin. 6O toole bonɔ kpa. O iro gɛ o faa ŋɔ he be la. Hé ba na bela baa hugo la, 7asɛ dɛ ɛ warane dɛ la ka bagle o habɔteŋra be kɛŋɔ o ir seo ta, dɛ berɛ ŋɔ o tɔ ba sie dɛɛ kaa Galilia harɛ ta. Belaa baa ba o nae. Waa maa dɔa dɛ́ bol he be laanee la." 8Asɛ haahna la chwa le bɔɔ la bɔr bela. Ɔmee lag ba. Ba sie ge garɛ lɛ taeh. Ba lawɛ ŋwɛnɛ dɛ chwa la ká taa waa la bagle Yeesu habɔteŋra la. 9Bug la ta, Yeesu chem ba ŋwɛnɛ ta dɛ chɔɔ ba, asɛ ba tel o be dɛ guŋi lawɛ o napaala dɛɛ duuru. 10Belaa Yeesu ŋɔ ba be ŋɔ, "He bɛ ɔmɛ. Hé la ka ŋɔ n nimanar la be kɛ bá kaa Galilia harɛ. Belaa baa ba n nae." 11Haahna la taa lɔ ŋwɛnɛ ta dɛɛ kaa la, soojare la baa dɛ daah lalbɔɔ la bane chwao kaa Jerusalam dɛ taa waa aa chiga la bwa bagle Sɔfonomonome. 12Sɔfonomonome la ne bwɛɛ nomonome chemo dɛ vɔrɔwe, dɛ nyin suuga damanta tɛ soojare la, 13dɛ lɔ ba nyoa ŋɔ, "He ɛo waa, hé ŋɔ dɛ he chɔɔge doromi harambaŋa, asɛ o habɔteŋra la ba ŋwɛo kaa, 14asɛ dɛ Paelet noɔ kɛ dɛ doromii he chɔ dɛ gel ba won ba ŋwɛ Yeesu chɔɔ la, dɛ gel ba la he ne kɔɔto aa, yá bol tɛ heyaa ásɛ he kon do som." 15Soojare la aa lɛ suuga la, gɛ Sɔfonomonome la aa do ba ŋɔ bá bol laanee ba taa bagle nɛra bwa. Hale kpoŋe ba le fini, gɛ waa laanee Juda tena ta kpoŋe. 16Yeesu habɔteŋra fi dɛ beŋkpoŋ la Galilia harɛ ta ka chemo bwe bɛl o faa ŋɔ ba be ŋɔ o baa ir seo ta naa bá chemo bela la. 17Baa nao la, ba duuru, kɛ dɛ bane dɛ tɔŋle ŋɔ Yeesu laa ba na la. 18Yeesu tel ba jwɛh dɛ ŋɔ, "Korowii kpɔ nyundua ne harɛ nɔ ta bwa kpegri do n nɔn ta. 19Anomanta hé valɛ kaa harɛ nɔ ta bobɛlbwa dɛ ka nyin nɛra bwa bini nɛra bá ba teŋɛ n nɛ, dɛ sɔ ba Korowii ne ásɛ dɛ kpɔ ba do n Mɛɛ ne men o Bie ne o Domadɛɛge la nɔn ta, 20asɛ dɛ chag ba ŋɔ báa teŋɛ n waa maa chagle heyaa la bwa ta. Kasinteŋ, mɛɛ che he habɔɔ dɛ ja he nɛɛ tɔpere te bɛlbwa dɛ ka tel wobɛlbwa jaga saŋ."

will be added

X\