Maatiu 27

1Tɔɔ aa pera chɔmbibi la, Korowii Dea Sɔfonomonome bwa ne ba harɛ la nomonome chemo dɛ vɔrɔwe Yeesu kpoe vɔrɔwa, 2dɛ vɔrɔwe o nɔɔra, dɛ kpɔɔ ka tɛ Room nomoa Paelet waa dɛ nyiŋi bela harɛ la. 3Judas la waa le Yeesu tɛ ba dɔɔ lawɛ la aa bera na kɛ ba dɛ nyin ba kpo Yeesu la, a we o nɛ, asɛ o berɛ charɛ o liire kɛŋɔ o fe jemaa, o fe ta suuga la lɛɛ dɛ le Yeesu tɛ, asɛ dɛ berɛ kpɔ suugapoŋa fifraatoro la ka tɛ Sɔfonomonome la ne bwɛɛ nomonome la, dɛ ŋɔ, 4"N ɛ wechɔga kɛ maa le nɛn waa wola wechɔga bɛlbwa ɛɛ tɛ heyaa ŋɔ hé ka kpoo nɔ." Anee nɛra la ŋɔ, "Ya te waane laa, a bwa do kɛ hen." 5Anee Judas kpɔ suugapoŋa la vigri Korowii Dea bela, asɛ dɛ ka sagɛ o te. 6Sɔfonomonome la pa suuga la dɛ ŋɔ, "Suuga nɔ ɛ chal suuga, asɛ ya mmarare ge aa yaa ŋwɛnɛ tɛ kɛŋɔ ya won kpɔ suuga nɔ ja Korowii Dea suuga ta." 7Anomanta ba bwa nyoa pɛo kɛŋɔ bá kpɔ suuga la ka yawɛ harɛ bɛl waa ɛ vimamaa harɛ ásɛ dɛɛ huge hɔɔhra baa wola Juda tena ɛɛ bela. 8A waa gela baa yerɛ bela harɛ la Chal Harɛ dɛ ba le fini la. 9Waa Korowii keame Jɛremaya faa bola la ɛ kpela. O fa ŋɔ, "Ba lɛ suugapoŋa fifraatoro, gɛ Israel tena nyoa aa pɛa ba di o yog la, 10asɛ dɛ kpɔ gɛ suuga la ka yawɛ vimamaa harɛ la gɛ Korowii aa ŋɔ n be la." 11Dɛ Yeesu ge chegɛ nomoa Paelet sie. Asɛ Paelet bɔɔro ŋɔ, "Henee Juda tena kooro ɛ?" Asɛ Yeesu ŋɔ, "Anee he bol la." 12Sɔfonomonome ne harɛ nomonome la teŋe nyosone dawɛ Yeesu nɛ, kɛ Yeesu ta ban chaŋɛ. 13Asɛ Paelet bɔɔro ŋɔ, "Wedamanta nɔ bwa baa kpɔa dɛɛ dawɛ nɔ, haa no kɛɛ?" 14Yeesu ta wobɛlbwa chaŋɛ, o ta a bɛlbwa tɔeh, asɛ nomoa Paelet nyoa kpo kohona. 15Dɛ o dɔ we-ɛɛle bɛl waa dɛ ɛ bena bɛlbwa. A gɛ tɔpejen la baa tel aa, wechɔg-ɛɛ te bɛlbwa baa doo dea asɛ bwɛɛla la ŋɔ ó fooru ta la, a chɛ kɛŋɔ o fooru ta. 16A gɛ saŋ la, dɛ ba do baa bɛl baa dɛ yerɔ Barabas nomɛlbwa dɛ no o sɔn dea. 17Asɛ baa ba Paelet be o bɔɔ ba ŋɔ, "Barabas ne Yeesu baa dɛ yerɔ Kristo la, ba bini umee hɛɛ nyin n fooru ta tɛ heya ɔ?" 18Dɛ o gbabir jemɔ kɛŋɔ bɔweela waa ba che Yeesu nɛɛ pɛɛpɛɛ dɛ kpɔɔ ba o be la. 19Nomoa Paelet aa soge o kara ta dɛɛ bol waa la, o haah tomɛ nɛn o be ŋɔ, "Nyiŋi kɛrɛdɛ dɛ bɛ baa la wobɛlbwa ɛ. Nɛndɛɛge tentenee. Gɛ maa dee o waa fini nɔ la, a we n nɛɛ taeh." 20Jaah dɛ Sɔfonomonome ne bwɛɛ nomonome la do nɛnlaa la bwa ŋɔ bá ŋɔ Barabasee baa nyin kɛ Paelet foo ta asɛ dɛ kpo Yeesu. 21Anee Paelet bɔɔ ba ŋɔ, "Nɛra banɛ nɔ bini umee hɛɛ nyin n foo ta tɛ heya ɔ?" Asɛ ba ŋɔ, "Barabas." 22Belaa o berɛ bɔɔ ba ŋɔ, "Aah ɛrɛɛ he ŋɔ ń ɛ Yeesu nɔ baa dɛ yerɔ Kristo nɔɔ?" Asɛ ba bwa pɛ ŋɔ, "Kpaaro pɛl dagagre ta!" 23Anee Paelet bɔɔ ba ŋɔ, "Ɛrɛ yɔ? Bɔkwa wechɔgaa o ɛɔ?" Ate dɛ ba berɔ kwaa ŋɔ kohona ŋɔ, "Kpaaro pɛl dagagre ta!" 24Nomoa Paelet aa nao kɛ dɛ o ŋɔ o sagɛ waa la ta naa, waa aa ba la aa wer doe ba la, o ɛ nee dɛ samɛ o nɔɔra nɛnlaa la bwa sie dɛ ŋɔ, "N laa dɛɛ do heyaa ŋɔ hé kpo nɛndɛɛge nɔ. He gbagbaa dɛɛ ɛ he wa!" 25Anee nɛra la ŋɔ, "Ɔɔh, hé te gel o seo wobɛlbwa dawɛ ya ne ya naanar nɛ!" 26Belaa Paelet le Barabas ta, gɛ baa dɛ nyin la, dɛ gel ba lɔɔ Yeesu bampɔrɔ ŋwɛɛra ne mɔɔ dɛ kpɔɔ tɛ ŋɔ bá ka kpaaro pɛl dagagre ta. 27Asɛ soojare la kpɔ Yeesu le kaa nomoa Paelet dem, dɛ yerɛ ba bala soojare la bwa ba ba baro cheme, 28dɛ laa o laala foo, dɛ kpɔ yaswɛm bɛl kɛŋɔ ba bela kooro yal ba tɔɔ, 29dɛ kpɔ sɔɔhne sɔh koogbɛrɛ piu, dɛ kpɔ daa bɛl do o nɔndig ta, dɛɛ guŋu harɛ kɛŋɔ baa dɛ ɛ kooro la dɛɛ taramo dɛɛ si, "Woowo, Juda tena kooro!" 30Asɛ dɛɛ ta nentane dɛɛ ta o nɛ, dɛ kpɔ daa la dɛɛ cha o nyu. 31Baa mugli o baah tonɛ la, ba laa yal la foo o bwara ta, dɛ kpɔ o gbagba laala o faa doa wubwa la doo, dɛ kpɔɔ le dɛɛ kaa dɛ́ ka kpaaro pɛl dagagre ta. 32Baa dɛ kaa la, ba kaa na Sairini baa bɛl baa dɛ yerɔ Seemɔn. Ba ɛgro o lɛ Yeesu dagagre la che. 33Asɛ ba ba bela baa dɛ yerɔ Gɔlgɔta la. Gɔlgɔta munii Nyuhog Bɔr. 34Asɛ ba kpɔ koŋkpelakpela ane koo sen ta dɛ kpɔ tɛ Yeesu ŋɔ ó nyɔ. Waa daga na la, o vɛh nyɔe. 35Ba foo o laala, dɛ kpaa o nɔɔra ne o nakpale pɛl dagagre ta. Dɛ soojare la dɛ nyin Yeesu laala bɔna, dɛ ta chacha mɔɔ dɛ́ won jemɛ laala ba bɛlbwa aa di. 36Gɛɛ ba ɛ mɔɔ dɛ ba so dɛɛ nyiŋu. 37Ba chwerɛ o wechɔga waa ɛa ba koh a waa kpoo la pɛl o dagagre la ta o nyundua. A gɛ waa laanee: |scYEESU, JUDA TENA KOOROO KEN|d. 38Belaa ba kpaa ŋwɛɛra banɛ pɛl dagagra ta ja Yeesu nɛ, bɛl sagɛ o dig ta, bɛl ge sagɛ o gal ta. 39Nɛra baa kpɔ bela bɔr baa kaa la chɛgre Yeesu dɛɛ mugli o baah ŋɔ, 40"Chwa! Nɛn waa dɛ pagre Korowii Dea dɛ won kpɔ tɔpera atoro mao la laa nɔ gbao? Lɛ he te! Dɛ henee Korowii Bie la aa, le dagagre la doa tu harɛ yá na!" 41Gɛɛ Sɔfonomonome ne Tɔn Jerema ne bwɛɛ nomonome mugli o baah gɛ banɔ la aa ɛa la, 42dɛ ŋɔ, "Ao! O won bane te lɛɛ, kɛ waa won lɛ o te gbagba. Kɛ Israel tena kooroo yɔ. Hé gel o tu le dagagre la doa ba harɛ yá na asɛ dɛ yaradao. 43O ŋɔ Korowii nɛɛ o sie dawɛ, dɛ ŋɔ Korowii Biee on. Dɛ o waa dɛ lɛ Korowii sie te naa, amɔ Kórowii ba lɛo taraken." 44Dɛ gɛɛ ŋwɛɛra baa kpaa ba pɛl dagagra ta ja o nɛɛ la gee chɛgro. 45Wee aa baa che nyufala la, bɔr biro jumaa ken dɛ ka tel wekee saŋ mɔɔ dɛ berɛ chaah ja. 46Wekee saŋ aa baa tel la, Yeesu do lɔŋɔ kpegri nɛɛ dɛ ŋɔ, "Eli, Eli, lama sabaktani?" O munii kɛŋɔ, "N Mɛɛ Korowii, n Mɛɛ Korowii, ɛrɛɛ he chwa mɛ nɔɔ?" 47Nɛra baa chegɛ bela la aa no gɛ la, ba ŋɔ, "Hɛ́ɛ no! Elaejaa wɛɛ yerɛ la." 48Asɛ bɛl chwa bug la ta dɛ ka kpɔ konjɔgɔjɔgɔ bɛl waa dɛ lɛ nee ka li sennyɛga ta dɛ kpɔ toh daa ta, dɛ kpɔ pao ó nyɔ. 49Nɛra aa kaa la ge ŋɔ, "Hé gel ya na, dɛ Elaeja ɛɛ ba lɛo waa?" 50Belaa Yeesu berɛ do lɔŋɔ kohona, asɛ dɛ gel o doma kaa, o ta. 51Waa sewa la, ate dɛ yal waa teŋe Korowii Dea la baah ta la pere anɛ le nyundua ba ta harɛ. Harɛ jigro, asɛ bwetala bini pegri, 52lalbɔɔne pili, asɛ Korowii nɛra baa serewa kɛrɛdɛ ir seo ta. 53Yeesu aa ir seo ta la, ba ge le ba lalbɔɔne bini dɛ ka jo Jerusalam, asɛ nɛra kɛrɛdɛ na ba. 54Sooja nomoa ne o soojare baa dɛ daah Yeesu la aa na gɛ harɛ aa jigra ne waa aa chiga la, ba ɔmɔ, asɛ ba ŋɔ, "Korowii Biee baa nɔ kpela!" 55Dɛ haahna warɔ dɛ che bojaŋ dɛɛ nyiŋi. A gɛ haahna nɔɔ teŋɛ o nɛɛ le Galilia harɛ dɛ daa kondikwaa dɛɛ tɛo. 56Ba bini banee Mɛɛre waa le Magdala la, ne Jems ne Josef nya Mɛɛre, ne Sebedii bii la nya. 57Awola jɔmɔra la baa bɛl waa ɛ Arimatea te dɛ ɛ suuga te ba. Dɛ o gba ɛ Yeesu habɔteŋra bɛl, 58dɛ ge la Paelet be dɛ ka soŋo ŋɔ ó tɛo ŋwɛnɛ ó ka kpɔ Yeesu lale la. Paelet sɛh dɛ kpɔ tɛo. 59Anee Josef kpɔɔ, dɛ kpɔ yapoŋ ondɛɛge bɛl dɛ fɔrɔwo, 60dɛ kpɔɔ ka huge lalbɔɔ o gbagba aa forɛ bwe bɛl ta o do kɛŋɔ dea ken baa wola nomɛlbwa o bini huge mɔɔ la, dɛ gbili bwejen bɛl tɔ o nyoa, asɛ dɛ le bela kaa. 61Dɛ Mɛɛre waa le Magdala la ne o dɔŋ Mɛɛre la soge bela, asɛ ba sie pa lalbɔɔ la ta baa nyiŋi. 62Awola la Juda tena dɛ kpɔ ba te asɛ tɔɔ peraa, bá di ba Ona Tɔpere. Tɔɔ aa pera la Sɔfonomonome ne Farisii tena la kaa cheme nomoa Paelet dem, 63dɛ ŋɔ o be ŋɔ, "Nomoa, gɛ saŋ a gɛ nyosonteŋni nɔ aa wola sewɛ mɔɔ la, dɛ o dɛ bol ŋɔ dɛ o sewaa, tɔpera atoro wɛɛ iruu ja. 64Anomanta, do nɛra bá kaa daah lalbɔɔ la mɔɔ tɔpetooro wee la tel. A waa laa aa, o habɔteŋra la ɛɛ ka ŋwɛ lale laanee le bɔɔ la bini, dɛ ka teŋe nyosone bagle nɛra bwa ŋɔ iraa ba Dɔɔ la ir. Dɛ gɛ laa aa, negra baa dɛ ba dɔe ka negre nɛra nɔ ɛɛ dɔ bɔree che gwaa gɛ baa tɔ sie negre nɛra la bwa." 65Anee nomoa Paelet ŋɔ ba be ŋɔ, "Soojaree la. Hé gel ba ka daah bɔɔ la. Ŋwɛnɛ te bɛlbwa haa kpɔ o ta asɛ ba bɛ won ka ŋwɛ lale la la, hé kpɔ o ta." 66Anee ba ka ɛ gɛ baa ɛ bwa nɛn bɛ won ka ŋwɛ lale la. Ba kaa maa lalbɔɔ la ne bwe la baa kpɔa tɔ o nyoa la bobɛl pɛ gɛ aa ɛ dɛ nomɛl ŋwɛo jo bɔɔ la bini aa, ba won jemɛ, asɛ dɛ berɛ kpɔ soojare so bela ŋɔ báa daah bela.

will be added

X\