Maatiu 25

1"N Nɛn Bie bala la telaa, kenii Korowii Kora ɛɛ ba doe. O dɛ ba doe kɛŋɔ toli fi bane baa ira dɛ kpɔ ba kandere dɛɛ la ká cheme hanfale jaa. 2Ba bini banue ɛ gɛna, banue ge ɛ wejerema. 3Gɛna la ta noo kpɔe ásɛ dɛ ba kandere la bini noo tonaa ba kpɔ do. 4Kɛ wejerema la te kpɔ noo do loŋa ta dɛ ja ba kandere la ta. 5Hanfale jaa la ta fele ba, anomanta dom chugli bitoli la, ba bwa chɔɔge doromi. 6"Harambaŋa la, nɛra bane nao kɛŋɔ hanfale jaa la dɛ ba, asɛ dɛ kpɔ takpeg ŋɔ, 'Hanfale jaa laanee la oo! Hé le ka chemo!' 7Bitoli fi la bwa ir doromi ta, dɛ kwaa ba kandere. 8Gɛna banue la ŋɔ wejerema la be ŋɔ, 'Hé tɛ yaa he noo nɔ ane. Gɛ laa aa, ya kandere dɛ dirimi.' 9Anee wejerema la ŋɔ ba be ŋɔ, 'Aa ya ne he bwaa tel, anomanta hé chwa la bela baa dɛ yoga la ka yawɛ ane.' 10Gɛ saŋ bitoli gɛna la aa chig ŋwɛnɛ ta kaa noo la yawa la taa hanfale jaa la ba. Wejerema la aa kpɔ ba te la, ba dɔ bɔr teŋɛ hanfale jaa la nɛɛ dɛ ka di hanfale kondikwaa la. Baa joa tonɛ la, dem te den laa gbera la tɔ. 11"A habɔɔ la banɔ la balɔ dɛ baa yerɛ ŋɔ, 'Ya dɔɔ, ya dɛ soŋe, ya yaa ásɛ ya jo.' 12Anee hanfale jaa la ŋɔ, 'Kasinteŋ, maa heyaa jemɛ.' " 13Yeesu aa bol gɛ tonɛ la, o berɛ ŋɔ, "Anomanta hé gel he sie do le hɛɛ kpa, dɛkalkɛ haa tɔpere la ne gɛ saŋ maa dɛ ba bala la jemɛ." 14Yeesu berɛ ŋɔ, "Awola n Nɛn Bie la aa ba la, kenii Korowii Kora la ɛɛ ba doe. Baa bɛlee ira dɛɛ ba o ŋwɛnɛ bɛl kaala, dɛ yerɛ o bonɔɔna dɛ kpɔ o suuga bwa do ba nɔn ta. 15Gɛ del ba bɛlbwa aa dɛ ba wona kpoŋe la taa o nyiŋi dɛ bɔne tɛɛ ba. O tɛ sitɔte la bɔre anue, dɛ tɛ nɛɛte la bɔre anɛ, asɛ dɛ tɛ tooro te la ge bɔrbeŋkpoŋ, mɔɔ dɛ kaa o ŋwɛnɛ la. 16A ta bigre bɛlbwa onɔ la waa dɔ bɔre anue la den kpɔ o kwaa ka ɛ toma dɛ berɛ dɔ a dɔŋa ja a ta. 17Gɛ tentenee onɔ la waa dɔ bɔre anɛ la ge berɛ dɔ a dɔŋa ja o kwaa ta. 18Bonɔɔ la waa dɔ bɔrbeŋkpoŋ la te kpɔ o kwaa ka huge harɛ. 19"Aa baa bigri la bonɔɔna la dɔɔ la balɔ dɛ ba ŋɔ bɛ́lbwa ba chagle gɛ waa ɛ suuga waa kpɔa tɛɛ ba la ne. 20Bonɔɔ la waa tɛo bɔre anue la kpɔ anɔ la waa dɔa ja la ja anɔ waa kpɔa tɛo la ta dɛ ŋɔ, 'N Dɔɔ, bɔre anuee he tɛ mɛ, kɛ n ge berɔ dɔ a dɔŋa ja a ta. Anee la.' 21Anee o dɔɔ la ŋɔ, 'Jam, bonɔndɛɛge, kasinteŋ te! Tama nɔ haa kpɔ kasinteŋ dɛ ɛ a ne toma nɔ, mɛɛ kpɔe so andamanta nyoa. Ba puu mɛ so silɛɛ ta.' 22"Bonɔɔ nɛɛte la ge ba dɛ ba ŋɔ, 'N Dɔɔ, bɔre anɛɛ he tɛ mɛ, kɛ n ge berɔ dɔ a dɔŋa ja a ta. Anee la.' 23Anee o dɔɔ la ŋɔ, 'Jam, bonɔndɛɛge, kasinteŋ te! Tama nɔ haa kpɔ kasinteŋ ɛ a ne toma nɔ, mɛɛ kpɔe so andamanta nyoa. Ba puu mɛ so silɛɛ ta.' 24"Asɛ bonɔɔ waa dɔ bɔrbeŋkpoŋ la ge ba, dɛ ba ŋɔ, 'N Dɔɔ, n jemɔ kɛ he waa kpegri. Bela haa wola mea due laanee hɛɛ koma, asɛ bela haa wola kwaa ane komɛ laanee hɛɛ nyin a chegbɔr. 25Anomanta n ɔmɔ dɛ kpɔ suuga haa tɛ mɛ la ka huge harɛ. Anee la.' 26Anee o dɔɔ la ŋɔ, 'Bonɔnchɔge bɔhwaah kohona! He jemɔ kɛ bela maa wola mea duee mɛɛ koma, asɛ bela maa wola kwaa komɛ laanee mɛɛ nyin a chegbɔr aa? 27A fe chɛ kɛŋɔ he kpɔ n suuga la ka cheg nɛra baa kpɔ suuga dɛɛ cheg ba be ba kpɔ dɛɛ kemɛ nɛra la be, asɛ n balaa, ń ka lɛ n kwaa ne a nee bwa. 28Anomanta hé lɛ o kwaa la o be dɛ kpɔ tɛ onɔ maa tɛo anue o dɔ a dɔŋa ja a ta la. 29Naate waa dɔa la, baa jao anee ó dɔ kohona a gwaa o nɛ, asɛ naate waa wola komɛlbwa dɔe la, tama kwaraa waa dɔa la ɛɛ le o nɔn taa. 30Bonɔnsala nɔ te, hé kpɔɔ le dahara ka ta biro ta, bela wii ne weweele do.' 31"Dɛ n Nɛn Bie la balɔ jirima ne, nyundua toroma la ja n nɛ aa, mɛɛ ba so n kookara taa, 32asɛ nɛwɛnyina baa lɔ harɛ bɛlbwa ta ba cheme n sie. Mɛɛ pegri ba bini bɔre anɛɛ gɛ petegre aa dɛ pegri o peera ne o boohna bini la. 33Mɛɛ kpɔ wedɛɛga tena laanee che n nɔndig ta, asɛ ba kar la ge che n nɔŋgal ta. 34Belaa mɛɛ ba n ŋɔ banɔ la baa lɔ dig ta la be ŋɔ, 'He banɔ n Mɛɛ aa swee andɛɛga tɛ heyaa la, hé ba di kora waa le harɛ mumpar dɛ kwaa cheg heyaa la, 35dɛkalkɛŋɔ lɔr aa dɛ kpo mɛ la, he tɛ mɛ kondikwaa n di, nyɔgre aa dɛ kpo mɛ la, he tɛ mɛ nee n nyɔ. Maa ɛ hɔɔh la, he kpɔ mɛ kaa he deremi, 36maa valɛ muŋgbal la, he tɛ mɛ yal n tɔ. N bwara wee mɛ, he nyiŋi n nɛ, asɛ baa do mɛ dea ge la, he kaa na mɛ.' 37"A taa wedɛɛga tena la ɛɛ ba ŋɔe ŋɔ, 'Ya Dɔɔ, bɛweeree ya na kɛŋɔ lɔr aa dɛ kpoe ya tɛɛ kondikwaa he di, asɛ nyɔgre ge kpoe ya tɛɛ nee he nyɔɔ? 38Bɛweeree ya na kɛŋɔ he ɛ hɔɔh ya kpɔe kaa ya deremi, dɛ berɛ na kɛŋɔ haa valɛ muŋgbal ya tɛɛ yal he tɔɔ? 39Bɛweeree ya na kɛ he bwara wee kɛɛ ba doe dea asɛ ya ka nae nɔ?' 40Asɛ ń ŋɔ ba be ŋɔ, 'Kasinteŋ, gɛ haa cha n nimanar waa nɔ dɔŋa aa puu ba la, hale nyaa ne nɛŋgwɛgre la, menee he cha la.' 41"Asɛ ń berɛ ŋɔ banɔ la baa lɔ n gal ta la be ŋɔ, 'He banɔ Korowii nyotaahna aa lawɛ heyaa la, hé le n sie bonɔ dɛ ka jo nii aa wola dime bwa ba mara tɛ Bɔnsam ne o toroma la ta, 42dɛkalkɛ lɔr kpo mɛ, he ta men kondikwaa tɛɛ ń di, nyɔgre kpo mɛ, he ta men nee tɛɛ ń nyɔ. 43Maa ɛ hɔɔh la, he ta men lawɛ kaa dem, maa valɛ muŋgbal ge la, he ta men yal tɛɛ ń tɔ. N bwara wee mɛ, ba do mɛ dea ge, kɛ he ta balɛ dɛ́ ba na mɛ.' 44"Asɛ bá ge chaŋo ŋɔ, 'Ya Dɔɔ, bɛweeree ya na kɛ lɔr ne nyɔgre dɛ kpoe, kɛɛ he ɛ hɔɔh, kɛɛ dɛɛ valɛ muŋgbal, kɛɛ he bwara wee, kɛɛ ba doe dea asɛ ya ta balɛ dɛ ba chae nɔ?' 45Asɛ ń ŋɔ ba be ŋɔ, 'Kasinteŋ, gɛ haa wola n nimanar waa nɔ dɔŋa aa puu ba la bɛlbwa chae, hale nyaa ne nɛŋgwɛgre la, menee haa wola chae la.' 46Banɔ te ɛɛ kaa weweele aa wola jaga dɔe bwa la taa, asɛ wedɛɛga tena la te dɔ Korowii mkpa aa wola jaga dɔe bwa la."

will be added

X\