Maatiu 24

1Yeesu aa le Korowii Dea bela dɛɛ kaa la, o habɔteŋra la baa ŋɔ ó nyiŋi na Korowii Dea la kan waa doa ne gɛ waa wera. 2Anee Yeesu ŋɔ, "Hé nyiŋi deene nɔ bwa kɛrɛdɛ. N dɛ ŋɔ he be kɛ baa ba kuugi a bwaa ta. Bwe bɛlbwa aa lee do dɛ ta chɔŋɛ o dɔŋ nɛɛ kpa." 3Yeesu teehnɔ ka so bwe bɛl baa dɛ yerɔ Ɔlevere Bwe la doa. Belaa o habɔteŋra la gbo ka puu bela, dɛ ŋɔ o be ŋɔ, "Chagle yaa gɛ saŋ gɛ waa nɔ bwa aa dɛ ba chiga, ne waa aa dɛ ba bala dɛ chagle kɛŋɔ he bala saŋ la ne waa bwa jaga saŋ la telo." 4Anee Yeesu chaŋ ba ŋɔ, "Hé nyiŋi kɛrɛdɛ dɛ bɛ gel nomɛlbwa negre heya. 5Nɛra ɛɛ warɔɔ taeh dɛ ba negre heya, dɛ kpɔ n sɔn dɛɛ bol wa, hale dɛ ŋɔ banee Kristo la Korowii aa bagɛ nyoa ŋɔ wɛɛ tomɔɔ ó ba lɛ yaa la, dɛ negre nɛra kɛrɛdɛ bwa. 6Hɛɛ no laa gbɔgaa he jwɛh, asɛ dɛɛ no ane ge gbɔga bojaŋa. Kɛ dɛ he baa dɛɛ na gɛ naa, he bɛ ɔmɛ. A chɛ kɛ gɛ waa nɔ bwa chig, kɛ dɛ a laa dɛɛ chagle kɛ waa bwa jaga saŋ la telo. 7Harɛre ane ɛɛ dɛɛ yo dɔŋaa, koranar ge yo dɔŋa. Lɔr ɛɛ ba harɛ nɔ ta bobɛlaa, asɛ harɛ ɛɛ jijigri bobɛla ge. 8Kɛ anɔ bwa do kɛŋɔ haah loltea yon tɔ sie lɔɔ dɛ o lola ta tele mɔɔ la. 9"Asɛ mɔɔ ba ta lawɛ heyaa tɛ nɛra, ba ɛ heyaa hɔhɔrɔwa dɛ kpoo heya. Nomɛlbwa ɛɛ koh n waa hah heya. 10A ba gɛ naa, nɛra baa teŋɛ n nɛɛ nɔ kɛrɛdɛ ɛɛ le n habɔɔ, dɛ le ba bala tɛ, asɛ dɛ hah dɔŋa. 11Asɛ nɛra ir dɛ teŋe nyosone kɛŋɔ ba ɛ Korowii keamere dɛ negre nɛra kɛrɛdɛ. 12Wechɔga ɛɛ perɛ harɛ nɔ ta bobɛlbwaa, asɛ nɛra bane aa won nyin ba dɔŋa kɛrɛdɛ kpa. 13Kɛ nomɛlbwa waa wola n habɔɔ leɛ, dɛ won teŋɛ n nɛɛ ka tonɛ la, wɛɛ dɔ o nyuu. 14Baa bol Korowii Kora Amanesoma nɔ waa harɛ nɔ ta bobɛlbwa asɛ nɛwɛnyini te bɛlbwa no mɔɔ waa bwa jaga saŋ la tel. 15"Hé naate haa kure tɔn nɔ bonɔ la no a mun kɛrɛdɛ. Hɛɛ na konchɔgechɔge Korowii keame Daneɛl faa bol o waa ŋɔ o dɛ pagre bwɛɛ la chega Korowii bodɛɛge bela. 16Gɛ saŋ la telaa, a chɛ kɛŋɔ Judia harɛ tena chwa le Judia ka sɔh bwejena la baah. 17Nɛn waa lɔ sal dea doa la bɛ berɛ ŋɔ o dɛ tu ka jo dea ka kpɔ o laala bɛlbwa kpa. 18Nɛn waa lɔ koo ta bɛ berɛ ŋɔ o dɛ kaa dem ka kpɔ o yal kpa. 19Gɛ saŋ la aa no tekpoŋra ne haahna ba taa kpoŋe bechale nɔn taa. 20Hé soŋe Korowii asɛ gɛ waa nɔ aa dɛ ba chiga he chwaage nɔ bɛ waa saŋ chig, dɛ bɛ Ona Tɔpere ta chig, 21dɛkalkɛ, dɛ le harɛ nɔ mumpar bwa ba le fini, wahala aa dɛ we dɛ do ɔma gɛ dɔŋ ta chige bwa. Asɛ wahala aa do ɔma gɛ dɔŋ ge aa chig kpa bwa. 22Kɛ dɛ Korowii fe ta tɔpera la ane teŋe ta aa, nomɛlbwa fe aa o nyuu dɔ. Anomanta gɛ aa ɛ ásɛ Korowii nɛra waa chal ba dɛ lɛɛ ba la dɔ ba nyu la, o teŋe tɔpechɔga la ane ta. 23Gɛ saŋ la dɛ nomɛl ŋɔ he be ŋɔ Kristo la Korowii aa bagɛ nyoa ŋɔ wɛɛ tomɔɔ ó ba lɛ yaa la lɔ bonɔ kɛɛ le naa, he bɛ on yarada, 24dɛkalkɛ nɛra ɛɛ ba teŋe nyosonee ŋɔ banee Kristo la, asɛ bane ge teŋe nyosone ŋɔ ba ɛ Korowii keamere. Baa ɛ wejena ne nyokpowaa, asɛ ba fe ɛɛ wonoo kwaraa naa, bá che ba we-ɛɛla ta dɛɛ nyin dɛ negre nɛra Korowii aa chal ba dɛ lɛɛ ba la gba. 25N felo dɛɛ bol waa nɔ he be noo, ásɛ he pu sie jemɛ a wa. 26"Dɛ nomɛl ŋɔ he be ŋɔ Kristo la lɔ kpɔg bini naa, he bɛ bela la. Dɛ nomɛl ge ŋɔ, 'Ŋyiŋi na, o sɔh dea nɔ bini' naa, he bɛ yarada, 27dɛkalkɛ men Nɛn Bie bala ɛɛ ɛo kɛŋɔ bwaala yon nyɛgle le wee leebɔr kaa wee cholibɔr la. Gɛɛ maa wola n balaa kpɔ sɔh nomɛlbwa. 28Nomonome ŋɔ, 'Bela konlala aa lole la, bela kokosakiri ɛɛ warɛ.' 29"Wahala ne sibegra la aa chig dɛ den dɛɛ tonɛ la, bug la ta 'wee ɛɛ biruu, asɛ korobie ge vɛh bɔr chaahna. Weweela ɛɛ chugruu le nyundua lee harɛ, asɛ koŋkwaa aa lɔ nyundua la bwa begre.' 30"A taa hɛɛ ba waane nyundua nae a chagle n Nɛn Bie la bane, asɛ harɛ nɔ ta nɛra bwa na dɛ wi, asɛ dɛ na kɛŋɔ n Nɛn Bie la aa le nyundua baamare ta dɛɛ ba kpegri ne jirima tenten ne. 31Nɛra ɛɛ no Korowii bɛla la sii, asɛ Korowii tomɛ o nyundua toroma bá ba harɛ nɔ ta bobɛlbwa dɛ ka boa o nɛra waa chal ba dɛ lɛɛ ba la bwa nyoa. 32"Hé kpɔ pur daa nɔna hweli wa. O baa fogre dɛɛ le papo-lwɛɛne, dɛ nomɛlbwa jemɔ kɛŋɔ bɔwɔb saŋ telo tonɛ. 33Gɛɛ dɛ waa nɔ maa bol he be nɔ bwa baa dɛɛ chig aa, asɛ hé jemɛ kɛ tɔpere maa dɛ bol o waa la bala telo. 34Kasinteŋ, he banɔ haa soge le nɔ bwa aa sewa ba mɔɔ gɛ waa nɔ chig. 35Nyundua ne harɛ bwa ɛɛ ba chɔgoo, aa wola lee do kpa, kɛ n waa maa bola te bwa ɛɛ do lee saŋ te bɛlbwa. 36"Nomɛlbwa aa tɔpere la ne saŋ gɛ waa la aa dɛ ba chiga jemɛ. Nyundua toroma la ne n Nɛn Bie la gba aa jemɛ. N Mɛɛ la gboo jema. 37N Nɛn Bie bala ɛɛ pigri nɛraa kɛ Nowa saŋ nesuuli la aa baa pigri nɛra la. 38Gɛ saŋ nee la aa wola sui dɛ chɔg harɛ mɔɔ la, dɛ nɛra dɛ di kwaa dɛɛ lɛ ba sie, dɛɛ mo haahna, dɛɛ yalɛ jaranar. Ba lɔ gɛ waa nɔ ta dɛɛ ɛ dɛ ka tel gɛ saŋ Nowa aa jo gberjen la bini gel ba. 39Kɛ ba ta wone jemɛ waa aa dɛ ba bala ka tel gɛ saŋ nee aa sua dɛ ba kpɔ ba bwa kaa. Gɛɛ n Nɛn Bie la bala la ɛɛ ba nɛra pigra. 40Gɛ saŋ la, nɛra banɛ ɛɛ dɛ ɛ toma koo taa, asɛ ba ba kpɔ beŋkpoŋ kaa dɛ gel bɛl. 41Haahna banɛ ɛɛ pɛo dɛɛ namɛ kwaa nambwe ta, ba ba kpɔ beŋkpoŋ kaa dɛ gel bɛl bela. 42Anomanta hɛ́ɛ do dɛɛgɔ, dɛkalkɛ haa tɔpere la ne saŋ la he Dɔɔ la aa ba jemɛ. 43Hɛ́ɛ no. Dɛ dem te fe jemɛ gɛ saŋ ŋwɛɛ aa ba ŋwɛo waa, o fe aa domii chɔ dɛ gel o ba jo dem dɛ ŋwɛo. 44Gɛɛ chɛ kɛŋɔ he ge kpɔ he te dɛ so kpa, dɛkalkɛ pigraa n Nɛn Bie la ɛɛ ba ba pigri heya. 45"Bonɔɔ waa dɔ kasinteŋ dɛ dɔ liire la nɔn taa o dɔɔ kpɔ o dem tena dɛɛ do, dɛ ŋɔ bɔr dɛ magre aa, ó tɛɛ ba kondikwa. 46Dɛ o dɔɔ la baa puu, dɛ o dɛ ɛ gɛ waa kpɔa do o nɔn ta la aa, o sie ɛɛ lɛo. 47Kasinteŋ, n dɛ ŋɔ he be, o dɔɔ la ɛɛ kpɔ o komɛlbwaa do o nɔn ta ŋɔ wɛ́ɛ nyiŋi a ta. 48Kɛ dɛ o ɛ bonɔnchɔge, asɛ dɛ ŋɔ, 'N dɔɔ ŋwɛnɛ nɔ waa kaala nɔ, waa ba taraken,' 49dɛ do o bonɔndɔŋa la nɛɛ dɛɛ lɔɔ, dɛɛ di kwaa waa dɛ nyin, o ne sennyɔɔra ɛɛ dɛɛ raa, amɔ wɛɛ na waa. 50Tɔpebeŋkpoŋii o dɔɔ la ɛɛ ba bala ba pigru, 51dɛ tɛr o deŋne taeh, dɛ doŋu ka pu nɛra baa dɛ nyiŋi nɛra sie bɔr mɔɔ dɛɛ ɛ waa la. Belaa wɛɛ ba doe dɛɛ wi dɛɛ na weweele.

will be added

X\