Maatiu 23

1Yeesu bol waa dɛ chagle nɛnlaa la ne o habɔteŋra la dɛ ŋɔ, 2"Tɔn Jerema la ne Farisii tena nɔɔ dɔ ŋwɛnɛ kɛ ba chagle Mosis Mmara la bini bagle nɛra. 3Anomanta a chɛ kɛ he no ba be dɛ teŋɛ waa baa dɛ bagle heyaa ŋɔ hé ɛ la bwa ta. Kɛ he bɛ ba we-ɛɛla te hweli, dɛkalkɛ baa waa baa bola dɛɛ chagle heyaa la ɛ. 4Ba kpɔ ba mmarare ɛ bontɔga dɛ gel nɛra che dɛɛ koh, kɛ ba te gbagba aa berɛ ɛɛ nyin kɛ ba kpɔ nonii gba lega asɛ a ba ɛ kɛ baa chog baa gba. 5"Ba we-ɛɛla bwa la, nɛraa baa nyin kɛ ba na ba dɛɛ tɛɛ ba duure. Gɛ nɛra yon chwerɛ Korowii wobol dɛ kpɔ vɔwɛ ba tili ne ba varama ta la, hé na gɛ ba te kwaa yon do pagri. Hé na gɛ ba batakaani nyoo jɔɔra aa dɛ do jaŋre. 6Bela nɛra yon cheme tɔpejena dɛɛ lɛ ba sie la, ba te la bela aa, kane dɛɛga gbo taa baa nyin soga. Asɛ ba la cheremi deene bini ge aa, nomonsobɔraa baa nyin. 7Ba dɛ nyin kɛŋɔ nɛra ba harɛ dɛɛ lea ba yawa ta ne fɔgbaahna dɛɛ yer ba 'Nomoa, nomoa.' 8He bɛ gel nomɛlbwa yerɛ heyaa ba nomoa, dɛkalkɛ he bwa kɛrɛdɛ. Nomoa beŋkpoŋ gbo gee he dɔ. 9Asɛ harɛ nɔ ta ge, he bɛ nomɛlbwa he Mɛɛ dɛɛ yerɛ, dɛkalkɛ he Mɛɛ lɔ beŋkpoŋ gbo dɛ do nyundua. 10He bɛ gel nomɛlbwa ge yerɛ he bini bɛlbwa o dɔɔ, dɛkalkɛ dɔɔ beŋkpoŋ gboo lole, onee Kristo la. 11He bwa bini, naate waa gwaa heyaa la chɛ kɛ o ɛ o te kɛŋɔ bechala dɛɛ tomɛ heya. 12Nomɛlbwa waa dɛ maŋkura o te la, Korowii ɛɛ ba o ne harɛɛ, asɛ nomɛlbwa waa dɛ pwɛr o te la, Korowii ɛɛ ɛo nɛnjenii. 13"Hé bwɛɛlɛ, Tɔn Jerema ne Farisii tena, he nɛra haa nyiŋi nɛra sie mɔɔ dɛɛ ɛ wa! He tɔ Korowii Kora la ŋwɛnɛ. Heyaa nɔɔ haa jo, he ge aa ŋwɛnɛɛ tɛ ásɛ banɔ la baa dɛ nyin bɔr dɛ́ jo la dɔ bɔr. 15Hé bwɛɛlɛ, Tɔn Jerema ne Farisii tena, he nɛra haa nyiŋi nɛra sie mɔɔ dɛɛ ɛ wa! Heyaa yon gaage aaa gɛ haa ɛ dɛ dɔ nɛn waa wola Juda tena te ɛɛ ó ba ja he nɛɛ dɛ tomɛ Korowii. Kɛ dɛ he baa dɔ bɛl aa, he yon berɛ ɛo o chɔg kwaraa, asɛ a yon berɛ do kɛŋɔ o tenee bera chɛ Bɔnsam nii ta laŋa gwaa heya. 16"Nyoŋa haa dɛ tɔ nɛra sie, hé bwɛɛlɛ! He yon dɛɛ chagle nɛra ŋɔ, 'He naate haa ŋwɛɛ Korowii Dea la, ate aa won hen waane ɛ. Kɛ suugaswɛm waa lɔ Korowii Dea bela la te, baa o te ŋwɛɛ.' 17Nyoŋegɛna bane! Suugaswɛm la ne Korowii Dea la waa gela suugaswɛm la do ɔma la, umee do ɔma gwaa o dɔŋ ɔ? 18He berɔ dɛɛ chagle nɛra ŋɔ, 'He naate haa ŋwɛɛ bela baa kpo kwaa dɛɛ tɛ Korowii la, a ta waane ɛɛ. Kɛ kwaa baa kpoa tɛ Korowii bela la te, baa an ŋwɛɛ.' 19He nyogrɔ kwara! Kwaa baa kpoa tɛ Korowii la, ne bela baa kpo kwaa la waa gela kwaa la do ɔma la, a bini umee do ɔma gwaa o dɔŋ ɔ? 20Anomanta nomɛlbwa waa ŋwɛɛ bela baa kpoo kwaa dɛɛ tɛ Korowii la, bela baa kpoo kwaa la ne kwaa aa dawɛ o ta la bwaa o ŋwɛɛ la. 21Asɛ nomɛlbwa waa ŋwɛɛ Korowii Dea la, Korowii ne dea la bwaa o ŋwɛɛ la. 22Dɛ nomɛlbwa ge ŋwɛɛ Korowii doa aa, Korowii soŋnibɔr ne Korowii gbagbaa o ŋwɛɛ la. 23"Hé bwɛɛlɛ, he Tɔn Jerema ne Farisii tena, he nɛra haa nyiŋi nɛra sie mɔɔ dɛɛ ɛ wa! He kondiili do tamaa gɛ bɛlbwa aa, he won a bini pera bɔre fi dɛ kpɔ bɔrbeŋkpoŋ aa ɛ Korowii kwaa la ka tɛo, gɛ Mmara la aa bagla la, kɛ dɛ gel Mmara la bini waa aa tɔ sie dɛɛ bagle ŋɔ hɛ́ɛ di kasinteŋ, dɛɛ na nɛra sum, asɛ dɛ gel nɛra ɛɛ yarada heyaa la te. Gɛ waa nɔɔ chɛ kɛŋɔ hɛɛ ɛ dɛ ja anɔ la haa dɛ ɛa la ta. 24Nyoŋa haa dɛ tɔ nɛra sie dɛɛ maŋkura wejegre gwaa anjena! He waa haa dɛ ɛ la do kɛŋɔ nɛn o yon nyiŋi o nenyɔɔle ta dɛ won na pereware dɛ laa kpɔ ta, kɛ dɛ nyogma te lɔ a ta naa, waa o te na, dɛ yon kpɔ lile. 25Tɔn Jerema ne Farisii tena, nɛra haa nyiŋi nɛra sie mɔɔ dɛɛ ɛ wa, hé bwɛɛlɛ! He waa haa dɛ ɛ gelɔ he do kɛŋɔ baa loo numol kɛɛ log habɔɔ o do wer asɛ doŋa su o bini te la. Dɛ ɛgre nɛn lɛ o kondɔɔh o be ne kafonyin gboo su he bwa. 26Farisii tena nyoŋa bane! Hé loo doŋa aa lɔ numol la bini la mɔɔ. O bini la dɔɔ lea, dɛ o habɔɔ leɔ. 27"Hé bwɛɛlɛ, Tɔn Jerema ne Farisii tena, nɛra haa dɛ nyiŋi nɛra sie mɔɔ dɛɛ ɛ wa! He do kɛŋɔ ŋwam baa tegɔ wɛɛ nyɛgle. O nyundua la gboo wera, kɛ o bini te, hoga ne kompɔɔhla gboo. 28Gɛɛ he den do. Ba na heya aa, he wer siwi ta kɛŋɔ nɛndɛɛga, kɛ he bini te, negra ne wechɔga gboo su he bwa. 29"Hé bwɛɛlɛ, Tɔn Jerema ne Farisii tena, nɛra haa nyiŋi nɛra sie mɔɔ dɛɛ ɛ wa! Heyaa yon kwaa bela baa huge Korowii keamere a do wer. Nɛndɛɛga baa serewa la ge, he yon kwaa ba ŋwama a do wer ken, 30dɛɛ chagle kɛŋɔ dɛ heyaa fe he naanar gɛ saŋ la aa, he te fe aa wola ja dɛ kpo o Korowii keamere la. 31Kɛ he ge aa berɛ ɛɛ tɔh kɛŋɔ banɔ la baa kpoo Korowii keamere la naanaree heya! 32Hé takapɔ dɛ ɛ wechɔga la he naanar aa pa mun ɛa la ka tonɛ. 33"Nɛnchɔga kɛ harɛkwaare, domkpule bii! Ɛrɛɛ hé ɛ haa wola Bɔnsam nii taa joɔ? 34N gelɔ hɛɛ no kɛŋɔ mɛɛ tomɛ Korowii keamere, wejerema ne Tɔn Jerema he bee. Hɛɛ kpoo bane, dɛ kpaa bane pɛl dagagra ta, dɛ kpɔ chweremi lɔɔ bane cheremi deene ta, dɛ doŋ ba jo bwɛɛre ta dɛɛ nyin ba dɛ́ lawɛ. 35Anomanta nɛndɛɛga baa nya ba nɛɛ dɛ kpoo ba la dɛ le kpoe baa kpo Abɛl waa wola wechɔga bɛlbwa ɛɛ la ka tel kpoe baa kpo Barakia bie Sakaria Korowii Dea la ne bela baa kpoo kwaa dɛɛ tɛo la baah ta bela la, ba bwa waa ɛɛ gure he nɛɛ. 36Kasinteŋ, nɛndɛɛga baa kpoo ba la bwa waa ɛɛ ba gure fini nɔ nɛra nɔ nɛɛ! 37"Oo, Jerusalam tena! Korowii tomɛ o keamere he be naa, gɛɛ he kpoo ba, o tomɛ toroma he be naa, gɛɛ he fog ba bwea. Saŋ bɛlbwa mɛɛ nyin kɛ n kpɔ nɔn tɔ he nɛɛ kɛ jal aa lawɛ o bii dɛɛ do o kena lɔgre la, kɛ haa nyin kɛ n lawɛ heyaa pɛ. 38Anomanta Korowii ɛɛ ta he waa tɛ heya. 39Kasinteŋ, n dɛ ŋɔ he be, haa men na kpa ka tel gɛ saŋ maa ba ja, asɛ he ŋɔ, 'Woowo! Korowii Biee chegɛ o sɔn ta dɛɛ ba la!' "

will be added

X\