Maatiu 22

1Yeesu berɔ kpɔ sɛgla dɛ bol waa bagle nɛra la ja, 2dɛ ŋɔ, "Kenii Korowii Kora ɛɛ ba doe. Kooro bɛlee lawɛ hanfale tɛ o bie dɛ gel ba ɛ o hanfale kondikwa. 3O tomɛ o bonɔɔna ŋɔ bá ka yerɛ nɛra waa yer ba ŋɔ bá ba di hanfale kondikwaa la, asɛ ba sie ta on sui dɛ vɛh bala. 4"Anee o berɛ kwaa tomɛ banfala dɛ ŋɔ ba be ŋɔ, 'Hé ka ŋɔ nɛra maa yer ba la be ŋɔ ba tonɛ kondikwaa la. N kpoo nabala ne nae aa do noo kohona bwa, anomanta n tonɛ komɛlbwa kɛ bá ba.' 5A bwa pɛpɛrɛ nɛ, ba vɛoh dɛ kaa ba tomare ta. Bɛl kaa o koo, bɛl ge kaa o bona dibɔr, 6asɛ ba kar la ge lawɛ o bonɔɔna waa tom ba la dɛ ɛɛ ba hɔhɔrɔwa dɛ kpoo ba. 7A ɛ kooro la bandia kohona dɛ gel o tomɛ o soojare ba ka kpoo banɔ la baa kpoo o bonɔɔna la, asɛ dɛ fuh ba bwɛɛ la ge. 8"Anee o kwaa yerɛ o bonɔɔna bane ge ja dɛ ŋɔ ba be ŋɔ, 'Ba tonɛ n hanfale kondikwaa la, kɛ nɛra la maa yer ba ŋɔ bá ba di la, a ta ban chɛɛ. 9Name te hé le kaa fɔgbaahna dɛ ka yerɛ nɛra haa na ba la bwa ba hanfale kondikwaa la mun.' 10Asɛ bonɔɔna la le kaa fɔgbaahna dɛ ka yerɛ nɛra baa na ba la bwa. Nɛndɛɛga ne nɛnchɔga bwaa ba yerɛ, asɛ nɛra su bela baa lawɛ hanfale la maa ken. 11"Kooro la aa dɛ jam hɔɔhra la aa baa cheme bela la, o na baa bɛl ba bini kɛ o te ta laala aa chɛ kɛŋɔ o do dɛ ba hanfale dem bela la ane doe. 12Anee o bɔɔ baa la ŋɔ, 'N dam, ŋwɛnɛ besoo taa a che he ba bonɔ, haa wola laala aa chɛ kɛ he do dɛ ba hanfale dem bonɔ nɔ ane doe nɔɔ?' Waa bɔɔro gɛ la, o ta waane dɔe dɛ́ bol. 13Anee kooro la den ŋɔ o bonɔɔna la be ŋɔ, 'Hé vɔrɔwe baa nɔ nɔɔra ne o nakpale dɛ kpɔɔ ka ta dahara biro ta. Belaa wii ne weweele do.' " 14Yeesu aa kpɔ sɛgla nɔ bol waa bag ba tonɛ la, asɛ o ŋɔ, "Nɛra maa yer ba warɔ taeh, kɛ ba bini tamaa kenii n chale." 15Farisii tena la le bokɛre dɛ ka vɔrɔwe gɛ baa ɛ dɛ́ dɔ Yeesu lawɛ webɔɔra ne. 16Anomanta ba tomɛ ba habɔteŋra bane ne Hɛrɔd nɛra bane, ba ba o be dɛ ba ŋɔ, "Nomoa, ya jemɔ kɛŋɔ kasinteŋ gboo hɛɛ bol, haa nyosone teŋe. Korowii ŋwɛnɛɛ hɛɛ chagle nɛra kasinteŋ ne. He ta bolɛ dɛɛ ɔmɛ a habɔɔ kɛŋɔ a dɛ do bane som, kɛɛ a dɛ we bane bambile nɔ. Haa nɛra sie bɔr nyiŋi dɛɛ bol wa, kɛŋɔ bɛl ɛ kooro kɛɛ nomoa kɛɛ bechala nɔ. 17Anomanta chagle yaa gɛ haa na waa nɔ yá jemɛ. Ya mmarare dɛ tɛ yaa ŋwɛnɛ kɛ ya bɔ lampoo dɛɛ tɛ Room Koojen Siisa la aa, kɛɛ waa yaa ŋwɛnɛ tɛ?" 18Yeesu tɔ sie jemɛ ba liichɔga, anomanta o ŋɔ ba be ŋɔ, "He nɛra haa nyiŋi nɛra sie mɔɔ dɛɛ ɛ wa! Ɛrɛɛ hɛɛ nyin dɛ har mɛ bel nɔɔ? 19Hé kpɔ suuga haa kpɔa dɛɛ bɔ lampoo la tɛ mɛ ń na." Baa kpɔ suuga la ba la, 20anee o pɛɛ ba ŋɔ, "Ume nyu ne o sɔnee nɔɔ?" 21Anee ba chaŋo ŋɔ, "Koojen Siisa nyu ne o sɔnee." Anee Yeesu ŋɔ ba be ŋɔ, "Gɛɛ a do te naa, hé kpɔ kwaa aa ɛ Koojen Siisa kwaa tɛo, dɛ kpɔ kwaa aa ɛ Korowii kwaa la tɛ Korowii." 22Baa no gɛ Yeesu aa bola la, ba nyoa kpoo, ba le o be dɛ kaa. 23Awola tenten la, nɛra bane baa dɛ yer ba Saduki tena ba o be. Dɛ baa yarada kɛŋɔ nɛn sewaa, wɛɛ berɔɔ ir ja. 24Ba ŋɔ o be ŋɔ, "Nomoa, Mosis fa ŋɔ dɛ baa mo haah, o ne o ta lolɛ o sewaa, ó nime kpɔ haah la mo asɛ o ne o lolɛ bii bá ɛ baa la aa sewa la kwa. 25Asɛ baa bɛl ne o nimanar banumɛlee fa lole. Nomoa la mo haah dɛ ba sewɛ, dɛ o ne haah la ta bie lolɛ, anomanta o nime waa teŋɛ o nɛɛ la kpɔ haah la mo. 26O ge ne haah la ta lolɛ, o sewɛ. Gɛɛ tooro te la ne banɔ la baa kaa la mo haah la ka lɔ nyoa, dɛ ba serewe. 27A habɔɔ la luhaah la ge baa sewɛ. 28Taraken nɔ, dɛ tɔpere nɛra baa sewa bwa aa dɛ ba ira nɔ telaa, baala banuanɛ la bini, umee dɛ ba haah la jaa ɛɛ yɔ? Ba bwa gee moo ka." 29Anee Yeesu chaŋ ba ŋɔ, "He kono kwara! Haa wola Korowii Tɔn la ne Korowii kpegri jemɛ la waa. 30Dɛ nɛra baa sewa la berɔ iraa, baala aa haahnaa mo, haahna ge aa yalɛ. Baa soo kɛŋɔ nyundua toroma ken. 31Nɛra seo ta ira ge la nɔ, he ta gɛ Korowii aa bol he be kure dɛ no a mun kɛɛ? 32O ŋɔ, 'Menee Abraham Korowii, Aesek Korowii ne Jekɔb Korowii.' Lala laa dɛɛ tomɛ Korowii, weeraa dɛɛ tomɔ." 33Nɛnlaa la aa no gɛ waa nɔ la, ba nyoa kpo o webagla ta. 34Belaa Farisii tena la aa no gɛ Yeesu aa gela Saduki tena la ta berɛ won dɔ waane dɛ́ bol kpa la, ba kaa cheme, 35asɛ ba bini Tɔn Jereme bɛl pɛɛ Yeesu waane, dɛ kpɔ harɔ bel. 36O pɛɛro ŋɔ, "Nomoa, mmarare nɔ te bwa bini umee dena gwaa a bwa nɔ?" 37Yeesu chaŋɔ ŋɔ, " 'Hé nyin N Naa Korowii he bambile bwa, he hweera ne he liire bwa ne.' 38Onɔɔ gwaa a bwa dɛ tɔ a bwa sie. 39Onɔ la waa jaa dɛ teŋɛ nɛɛ o waa hiah la gee kɛŋɔ, 'Nyin he dɔŋ kɛ he gbagba.' 40Gɛ mmarare anɛ nɔ binii Mosis Mmara la ne waa Korowii keamere la aa bagla la bwa le." 41Farisii tena la bane aa kaa pɛ so la, Yeesu pɛɛ ba ŋɔ, 42"Ɛrɛɛ hɛɛ lii Kristo la Korowii aa bagɛ nyoa ŋɔ wɛɛ tomɔɔ ó ba lɛ yaa laɔ? He dɛ lii kɛ ume naa yɔ?" Anee ba ŋɔ, "Devid naa." 43Anee Yeesu berɛ pɛɛ ba ŋɔ, "Aah ɛrɛ waa Korowii Domadɛɛge la aa ir Devid nɛɛ la o berɛ yerɔ o dɔɔ nɔɔ? Devid fa ŋɔ, 44'N Naa Korowii ŋɔ n Dɔɔ be ŋɔ ó so nomombɔr o dig ta ka tel kɛŋɔ waa ba o dɔma ne harɛ ásɛ o tigri ba nɛ.' 45Dɛ Devid fa yerɔ o dɔɔ naa, ŋwɛnɛ besoo taa a che Kristo la berɛ ba ɛ Devid naa ɔ?" 46Nomɛlbwa ta wone chaŋe waa Yeesu aa pɛɛra la nomanta, le awola tɔpere la dɛɛ kaa la, nomɛlbwa ta wone ba che o sie dɛ pɛɛro waane kpa.

will be added

X\