Maatiu 2

1Gɛ saŋ baa lolɛ Yeesu Bɛtlɛham waa lɔ Judia harɛ ta la, dɛ kooro bɛl baa dɛ yerɔ Hɛrɔd di kora. Belaa wejerema bane baa jemɛ weweela waa le wee leebɔr harɛ bɛl ta dɛ ba Jerusalam, 2dɛ ba bɔɔ bela tena ŋɔ, "Leperaa Juda tena kooro baa lolɔ taraken la dɔɔ? Ya na wewee bɛl wee leebɔr ya bwɛɛ o bagle kɛŋɔ ba lolɔ. Anee ya ba dɛ́ ba duuru." 3Kooro Hɛrɔd ne Jerusalam tena bwa aa no gɛ kooro nɔ waa la, ɔmee lag ba. 4Anomanta kooro la yerɛ Sɔfonomonome ne Tɔn Jerema la bwa ba cheme o sie dɛ bɔɔ ba ŋɔ, "Leperaa baa ba Kristo la Korowii aa ŋɔa ŋɔ wɛɛ tomɔɔ ó ba lɛ yaa la lola ɔ?" 5Anee ba ŋɔ o be ŋɔ, "Baa lolɔɔ Bɛtlɛham waa lɔ Judia harɛ nɔ taa, dɛkalkɛŋɔ Korowii keame la baglɔ ŋɔ, 6'Judia harɛ bwɛjega Bɛtlɛham, Judia harɛ bwɛɛre bini bwɛsala laa hen, dɛkalkɛŋɔ he taa kooro ɛɛ ba lee dɛ nyiŋi n nɛra Israel tena nɛ.' " 7Belaa kooro la yerɛ wejerema la le bokɛre dɛ bɔɔ ba gɛ saŋ gbagba wewee la aa lea. 8Waa bɔɔ ba gɛ waa nɔ tonɛ la, o ŋɔ ba be ŋɔ, "Hé takapɔ dɛ la Bɛtlɛham dɛ ka gaage bie la bɔr kɛrɛdɛ dɛ na bela waa lole, dɛ ba ŋɔ n be ásɛ n ge ka duuru." 9Wejerema la aa no kooro la wobol tonɛ la, ba chig ŋwɛnɛ ta dɛ kaa. Baa dɛ kaa la, wewee la ba faa nao wee leebɔr la berɔ le ja, dɛ tɔ ba sie dɛ la Bɛtlɛham dɛ ka jagɛ che dem bela bie la aa lole la. 10Baa na wewee la, ba sie lɛo kɛrɛdɛ. 11Ba jo dem bela dɛ ka na bie la ne o nya Mɛɛre. Ba kaa guŋu dɛ duuru dɛ ir pili ba dakare dɛ kpɔ suugaswɛm ne daawiile ane a sɔɔh aa soma baa yera fraŋkensɛns ne mire kɛo. 12Baa dɛ ba kaala la, Korowii chegɛ deera ta dɛ ja ba ŋɔ ba bɛ Hɛrɔd be la kpa, asɛ ba berɛ che ŋwɛnɛfale ta kaa ba bwɛ. 13Baa le bela dɛ kaa la, nyundua torome bɛl ba Josef be deera ta dɛ ba ŋɔ o be ŋɔ, "Kooro Hɛrɔd dɛ ba gela nɛra gaage bie la bɔr dɛ́ kpoo. Anomanta ir dɛ kpɔ bie la ne o nya bwa chwa kaa Ijipt harɛ ka so bela ka tel gɛ saŋ maa berɛ ba ŋɔ hé le bela mɔɔ he le." 14Asɛ Josef ir harambaŋa dɛ kpɔ bie la ne o nya bwa chwa dɛ kaa Ijipt harɛ, 15dɛ ka so bela ka tel gɛ saŋ kooro la aa sewa. A gɛ waa nɔɔ chiga dɛ gel waa Korowii aa chegɛ o keame la nɛɛ bol la ɛ kasinteŋ. O ŋɔ, "N bie lɔ Ijipt harɛ, asɛ n yerɔ o ba." 16Kooro la aa baa jemɛ kɛŋɔ wejerema la negro la, o bwaawee iro taeh. Dɛ o fa ta sie dɛ na kɛ gɛ saŋ wejerema la aa ŋɔa ba na wewee bɛl la, aa dɔ bene anɛɛ. Anomanta o do nɛra ŋɔ bá gaage dɛ kpoo bibaala ba taa ɛ bechasɔɔhne ka tel banɔ la baa di bene anɛ dɛ do Bɛtlɛham ne o bwɛɛre aa baro cheme la bwa ta. 17A gɛ waa nɔɔ gela Korowii keame Jɛremaya waa o faa bola la ɛ kasinteŋ. 18O bolɔ ŋɔ, "Nomɛl lɔ Rama dɛɛ wi. Lokua wii naate ɛɛ wi. Rechɛl dɛ wi o bii wa, ba larawo kahonɛ, dɛkalkɛ o bii bwa serewɔ." 19Kooro Hɛrɔd aa sewa la, dɛ Josef ta lɔ Ijipt harɛ ta, asɛ dɛ dee dɛ na nyundua torome bɛl. 20Nyundua torome la ŋɔ o be ŋɔ, "Ir dɛ kpɔ bie la ne o nya he kaa Israel harɛ ta ja, dɛkalkɛ naate waa dɛ nyin bie la dɛ́ kpo la sewɔ." 21Anee Josef ir dɛ kpɔ bie la ne o nya bwa dɛ berɛ kaa Israel harɛ. 22Waa noa kɛ Akelɔs chig o mɛɛ naa ta dɛ ɛ kooro Judia harɛ ta la, dɛ o fe dɛ ɔmɛ kɛ ó kaa bela. Korowii berɔ jao deera ta ŋɔ o bɛ Judia harɛ la, 23asɛ o kaa Galilia harɛ ta dɛ ka so bwɛɛ bɛl baa dɛ yerɔ Nasarɛt la ta. Anee gela waa Korowii keame la faa bola ŋɔ, "Baa yerɔ Nasarɛt tee" la ɛ kasinteŋ.

will be added

X\