Maatiu 18

1A gɛ saŋ la Yeesu habɔteŋra la bwa ba o be dɛ ba pɛɛro ŋɔ, "Ya bini umee gwaa ya bwa dɛ ɛ nomoa Korowii Kora la ta nɔ?" 2Asɛ Yeesu yerɛ bechajega bɛl dɛ gel o ba che ba baah ta, 3asɛ dɛ ŋɔ, "Kasinteŋ, he ta he liire charɛ dɛ do kɛŋɔ bechajegre aa, haa won ja Korowii Kora la ta bwa. 4Naate waa won pwɛr o te dɛ do kɛŋɔ bechajega nɔ la, onee gwaa nomɛlbwa Korowii Kora la ta. 5Nomɛlbwa waa koh n waa dɛ nyiŋi bie nɔ dɔŋ nɛɛ la, menee o nyiŋi la. 6"Nomɛlbwa waa negre bechajegre nɔ dɔŋ bɛlbwa waa dɛ yarada mɛ nɔ asɛ o ɛ wechɔga la, dɛ ba fe vɔwɛ nambwe do o baŋa dɛ kpɔɔ ka ta moo vil ta kwaraa fe bɔ. 7Harɛ nɔ ta nɛra, hé bwɛɛlɛ, he dɔŋa negra dɛɛ do wechɔga ta nomanta. A gɛ waa la ɛɛ bao te, kɛ naate waa ba a ne la, ó bwɛɛlɛ. 8Dɛ he nɔn kɛɛ he nakpala ɛɛ negree he ɛ wechɔga aa, teŋo ta. Haa dɔ nɔmbeŋkpoŋ kɛɛ nakpabeŋkpoŋ dɛ dɔ Korowii be kaa bɔ kɛŋɔ haa dɔ nɔɔra anɛ kɛɛ nakpale anɛ dɛ kaa Bɔnsam nii aa wola dime bwa la ta. 9Dɛ he siwi gee negree he ɛ wechɔga aa, fomo ta. Haa dɔ siwi beŋkpoŋ dɛ ba dɔ Korowii mkpa bɔ kɛŋɔ haa dɔ sibie anɛ dɛ kaa Bɔnsam nii aa wola dime bwa la ta. 10"Hé nyiŋi kɛrɛdɛ dɛ bɛ n bechajegre nɔ bɛlbwa nyiŋi vah. N dɛ ŋɔ he be kɛŋɔ nyundua toroma baa dɛ nyiŋi ba nɛɛ la won n Mɛɛ sie laŋa saŋ te bɛlbwa. 11Nɛra baa nyogra la waa n Nɛn Bie koh ba. 12Dɛ nomɛl dɔ peera lafa asɛ beŋkpoŋ nyogre aa, ɛrɛɛ wɛɛ ba ɛɛ yɔ? Wɛɛ gel fifraanuanaarɛ dɛ anuanaarɛ la a dibɔr belaa tama, dɛ ka gaage beŋkpoŋ waa nyogra la bɔr. 13Dɛ o nao waa, o sie ɛɛ lɛ o nɛɛ gwaa fifraanuanaarɛ dɛ anuanaarɛ la aa wola nyogrɛ la. 14Gɛɛ a do he Mɛɛ waa lɔ nyundua la aa wola nyin kɛŋɔ bechale nɔ bini bɛlbwa nyogre la. 15"Dɛ he dɔŋ ɛɛ wechɔga ane aa, la o be he ne o le bokɛre bela nomɛlbwa aa wola toole dɛ ka gel o jemɛ wechɔga waa kpɔa ɛɛ. Dɛ o na o wechɔga dɛ larawe naa, dɛ he berɔ dɔ he chamenate. 16Kɛ dɛ o ŋɔ waa sɛh kɛ o ɛ wechɔga aa, ka nyin nɛmbeŋkpoŋ kɛɛ banɛ ja he nɛ, asɛ hé ne ba la o be, dɛkalkɛ nɛra banɛ kɛɛ batoro danseɛ ɛ kasinteŋ. 17Dɛ he ne nɛra la laŋɔ o ŋɔ waa sɛh ja aa, kpɔ ka bil he bala bwa he ne ba aa dɛ cheme la sie. Dɛ o ŋɔ waa ba ge bee no aa, gel o waa tɛo kɛ nɛn waa wola Korowii tomɛ kɛɛ wechɔg-ɛɛ. 18"Kasinteŋ, wobɛlbwa haa wola sɛɛh harɛ nɔ ta la, nyundua ge Korowii aa sɛh, asɛ wobɛlbwa haa sɛh harɛ nɔ ta la, nyundua ge Korowii ɛɛ sɛoh. 19"N berɔ dɛɛ ŋɔ he be ja kɛ dɛ he bini banɛ gba nyoa pɛo harɛ nɔ ta hɛɛ nyin komɛl aa, n Mɛɛ waa lɔ nyundua la ɛɛ kpɔɔ tɛ heya, 20dɛkalkɛ bela nɛra banɛ kɛɛ batoro aa kpɔ nyopɛo cheme n sɔn ta la, dɛ n ja ba nɛ." 21Anee Pita ba bɔɔ Yeesu ŋɔ, "N Dɔɔ, kera aŋwɛnɛɛ chɛ kɛŋɔ dɛ n dɔŋ ɛɛ mɛ wechɔga aa n kpɔ kɛo wɔ? Kera anuanɛ kɛɛ?" 22Yeesu chaŋo ŋɔ, "N ta ŋɔe kera anuanɛ, kɛ kera fifraanuanɛ bele anuanɛ. 23"Anomanta, Korowii Kora waa la do kɛŋɔ kooro bɛl ne o bonɔɔna wa. Kooro la iro dɛ ŋɔ ó bonɔɔna ba bagle ba toma ɛɛ bini ó na. 24Waa pa mun dɛɛ nyiŋi ba toma ɛɛ bini la taa, o na kɛ bonɔɔna la bɛl di o kem suuga aa wola nyoa dɔe. 25Waa naa kɛŋɔ bonɔɔ la aa won ɛ wobɛlbwa dɛ bɔ kem la la, o ŋɔ bá yog o ne o haah ne bii ne o kondɔɔh bwa dɛ́ kpɔ bɔ kem la. 26"Anee bonɔɔ la guŋi kooro sie dɛ soŋo ŋɔ, 'N poori, na n sum dɛ lawɛ bambile kɛ mɛɛ bɔe he kem la bwaa.' 27Asɛ kooro la na o sum kohona dɛ gelo, dɛ kpɔ kem la kɛo. 28"Bonɔɔ la aa dɔ bɔr le dɛɛ kaa la, o kaa pu o dɔŋ o ge aa di o kenjegaa bɛl. Waa na o dɔŋ la, o den hamɛ o lobi dɛ ŋɔ, 'Kpɔ n suuga tɛ mɛ!' 29Anee o bonɔndɔŋ la guŋi o sie dɛ soŋo ŋɔ, 'N poori, na n sum dɛ lawɛ bambile kɛ mɛɛ bɔe he kemee.' 30Bonɔɔ la ta o dɔŋ la sum nae, dɛ gel ba ka doo dea dɛ́ ka tel saŋ waa bɔ kem la mɔɔ. 31O bonɔndɔŋa la aa na waa aa chiga la, a we ba nɛɛ taeh, asɛ ba ka taa waa la bagle ba bwa dɔɔ kooro la. 32"Kooro la yerɛ o bonɔɔ la dɛ ŋɔ, 'Nyubinikpeg te kohona! N koh soŋa haa soŋ mɛ la waa dɛ kpɔ kendamanta la bwa kɛɛ. 33Amɔ a fe ta chɛɛ kɛŋɔ he ge fee na he dɔŋ nɔ sum dɛ kpɔ kem nɔ kɛo waa?' 34Kooro la kpɔ bandia ŋɔ bá kpɔ bonɔɔ la ka do dea dɛ ɛo weweele ká tel gɛ saŋ waa dɛ ba wona bɔ kem la bwa." 35Yeesu aa bol a gɛ waa nɔ tonɛ la, anee o ŋɔ, "Dɛ he ge ta he bambile bini leɛ dɛ kpɔ he dɔŋa wechɔga kɛ ba aa, gɛɛ n Mɛɛ waa lɔ nyundua la gee ba heyaa ɛɛ."

will be added

X\