Maatiu 16

1Farisii tena bane ne Saduki tena bane ba Yeesu be dɛ ba daahno na dɛɛ nyin o ɛ nyokpowaane bá na asɛ dɛ won jemɛ kɛ Korowii bee o le kpela. 2Asɛ Yeesu ŋɔ ba be ŋɔ, "Weswɛm saŋ he nyiŋi nyundua dɛ nyundua swɛɛraa, he yon ŋɔ bwaala aa tena ba. 3Chɔmbibi ne ge he iro dɛ na kɛ nyundua swɛɛrɔ dɛ bibir aa, he yon ŋɔ nyundua aa swɛɛra dɛ bibir nɔ, bwaala ɛɛ nɛo. He won nyundua nyiŋa dɛ jemɛ waa aa dɛ ba chiga, aah ɛrɛ waa haa wola won jemɛ waa aa chig taraken nɔ mun nɔ? 4Fini nɛra, nɛnchɔga ne nɛra baa vɛh Korowii la, heyaa ŋɔa ń ɛ nyokpowaa he na naa? Maa wobɛlbwaa ɛ hé na. Waa aa pu Korowii keame Jona la dɔŋa gboo dɛɛ ba n ge pui ásɛ he che a ta dɛ jemɛ n nɛnsoo." Anomanta o gel ba bela dɛ kaa. 5Yeesu habɔteŋra la aa gale moo la dɛ le o baŋ la, ba soɔh, ba ta paanoo kpɔe ja. 6Anee Yeesu ŋɔ ba be ŋɔ, "Hɛ́ɛ nyiŋi he te kɛrɛdɛ Farisii tena ne Saduki tena iisi wa." 7Ba ta o sɛgla la mun noɛ, dɛɛ pɛɛ dɔŋa ŋɔ, "Amɔ yaa wola paanoo kpɔe waa wɛɛ bol gɛ naa?" 8Yeesu aa no waa baa dɛ pɛɛ dɔŋa la, o pɛɛ ba ŋɔ, "Ɛrɛ waa hɛɛ pɛɛ dɔŋa paanoo bɛ dɔe waa nɔɔ? Haa men yarada kwara! 9Saŋ la bwa haa waa mun no mɔɔ naa? Maa mɔne paanoo anue tɛ nɛra kagboŋa banue ba di ka la, a kabora haa paa la, wɛgrɛ dela aŋwɛnɛɛ he dɔ laɔ? 10Paanoo anuanɛ la maa tɛ nɛra kagboŋa banaarɛ ba di la, wɛgrɛ dela aŋwɛnɛɛ gee he dɔ laɔ? 11Ɛrɛ taa a che he ta wone jemɛ kɛŋɔ paanoo waa laa mɛɛ bol he be nɔɔ? Hɛ́ɛ nyiŋi he te kɛrɛdɛ Farisii tena ne Saduki tena iisi la wa." 12Name o habɔteŋra la ta no waa la mun kɛ iisi baa kpɔa dɛɛ ɛ paanoo waa laa wɛɛ ja ba la, kɛ Farisii tena ne Saduki tena webagla la taa wɛɛ ja ba. 13Yeesu la Sisaaria Felepae bwɛɛre ane ta. Belaa o pɛɛ o habɔteŋra la ŋɔ, "Nɛn besoo nɛra ɛɛ lii men Nɛn Bie nɔɔ?" 14Anee ba ŋɔ, "Bane ŋɔ Jɔn o faa dɛ sɔ nɛra Korowii nee laanee hen, bane ŋɔ Elaejaa hen. Bane ge ŋɔ Jɛremaya laa hen aa, amɔ te, Korowii keamebena la bɛlee hen." 15Anee Yeesu berɛ pɛɛ ba ŋɔ, "Asɛ he ge sɛ, nɛn besoo hɛɛ lii mɛ nɔ?" 16Seemɔn Pita chaŋo ŋɔ, "Henee Kristo la, Korowii tenten waa lole saŋ bɛlbwa la Bie la." 17Yeesu ŋɔ, "Jɔn bie Seemɔn, he na som kɛŋɔ nomɛlbwa aa wola hen waa nɔ baglɛ asɛ he jemɛ nɔ. N Mɛɛ waa lɔ nyundua laanee bagle. 18Anomanta n ŋɔ he sɔne Pita, o munii Bwe. Gɛ bwe nɔ taa mɛɛ ba n dea doe chɔŋɛ. N habɔteŋraa n dea la. Hale seo kwara aa wola won pɔ ba nɛɛ bwa. 19Mɛɛ kpɔ Korowii Kora la safoaa do he nɔn ta hɛɛ nyiŋi n habɔteŋra tɛ mɛ, asɛ waa haa wola sɛɛh harɛ nɔ ta la, nyundua ge Korowii aa sɛh, kɛ anɔ haa sɛah harɛ nɔ ta la, nyundua ge Korowii ɛɛ sɛah." 20Anee Yeesu kah ba ŋɔ ba bɛ o waa bol bagle nomɛlbwa kɛ onee Kristo la. 21Le gɛ saŋ la, Yeesu bol waa chasee ken dɛɛ bagle o habɔteŋra la, dɛ ŋɔ, "A chɛ kɛŋɔ n kaa Jerusalam dɛ ka na wahala bela nomonome ne Sɔfonomonome ne Tɔn Jerema nɔn ta, asɛ ba kpo mɛ, asɛ a tɔpera atoro la n ir seo ta." 22Anee Pita lawɔ le bokɛre dɛ kaoh ŋɔ, "Aa! N Dɔɔ, Korowii ɛɛ la a ne bojaŋ. Aa he nɛɛ gɛɛ ba bwa." 23Belaa Yeesu laa o te berɛ dɛ kɔr Pita ŋɔ, "Le n jwɛh, Bɔnsam! He dɛ neg mɛ ń ɛ wechɔga, dɛkalkɛ haa anɔ la Korowii aa dɛ nyin la lii, nemenɛ nɛra tetoowa." 24Asɛ Yeesu ŋɔ o habɔteŋra la be ŋɔ, "Dɛ nomɛlbwa dɛ nyin kɛ o teŋɛ n nɛ aa, ó gel o tetookwaa nyina dɛ kpɔ o te kɛ wɛɛ sɛh wahala nae ne seo bwaa dɛ baa teŋɛ n nɛɛ kɛŋɔ nɛn waa kpɔ dagagre che kaa o kpobɔr, 25dɛkalkɛ nomɛlbwa o sie aa swɛɛ harɛ nɔ ta silɛɛ kwaa ta la, wɛɛ paŋɛ o nyuu. Asɛ nomɛlbwa ge o sie aa wola harɛ nɔ ta silɛɛ kwaa ta swɛɛ la, wɛɛ dɔ o nyuu. 26Dɛ nɛn dɔ harɛ nɔ ta kwaa bwa dɛ nyogre o nyu aa, bɔkwa tɔnɔɔ o dɔɔ? Bɔkwaa nɛwɛnyini ɛɛ ba wona kpɔ dɛ charɛ o nyuɔ? 27N Nɛn Bie nɔ ɛɛ kpɔ n Mɛɛ jirima laanee, n ne n nyundua toroma le nyundua ba dɛ ba bɔ nomɛlbwa kem gɛ o toma aa doa. 28Kasinteŋ, a gɛ saŋ n Nɛn Bie aa ba di kora la, dɛ he bini bane ta soge le dɛ na mɛ."

will be added

X\