Maatiu 13

1Awola tenten Yeesu le dem bela dɛ ka so moo nyoa dɛɛ bagle nɛra wa. 2Nɛnlaa la aa wara nomanta o jo gbera ta ka so, asɛ nɛnlaa la bwa che baŋ. 3Asɛ o kpɔ sɛgla bol waa chag ba ŋɔ, "Baa bɛlee ira dɛ kaa merɛ mea o koo ta. 4Waa dɛ merɛ mea la, ane lee ŋwɛnɛ nyoa, asɛ jumbii ba tɔɔ di. 5Ane lee bwetala ta bela teera aa wola toole kohona. Teera la aa dawɛ bwetala la ta la aa wola warɛ la nomanta, a ta bigre bɛlbwa mea la le. 6Kɛ a lune ta wone kaa bini. Anomanta wee aa lɔa la, a jwalɔ dɛ sewɛ. 7Mea la ane ge lee sɔɔhne baah, asɛ sɔɔhne la kpeg dɛ lawa, a ta wone ɛ. 8Kɛ anɔ la aa lee harɛdɛɛge ta la te leo, asɛ dɛ ma kohona. Ane ma lafare, ane ma fifraanumɛl, asɛ ane ge ma fifraatoro." 9Yeesu aa bol a gɛ waa nɔ tonɛ la, anee o ŋɔ, "Nomɛlbwa waa dɛ nyin dɛ no la, ó no." 10Asɛ o habɔteŋra la la o be ka pɛɛro ŋɔ, "Ɛrɛ waa he yon kpɔ sɛgla dɛɛ bol waa nɛra nɔ be nɔɔ?" 11Anee Yeesu chaŋ ba ŋɔ, "He te dɔ Korowii Kora ne a wejema aa fa sɔah bwa dɛ́ jemɛ. Kɛ ba te ta dɔe. 12Anomanta naate waa dɔa la, baa jao anee ó dɔ kohona. Kɛ naate waa wola komɛlbwa dɔe la, tama kwaraa waa dɔa la ɛɛ le o nɔn taa. 13Waa aa bala maa kpɔ sɛgla dɛɛ bol waa ba be laanee nɔ: 'Ba dɔ sibie, kɛ baa na, dɛ dɔ deŋna, kɛ baa waa no, baa waa mun jemɛ.' 14Ba waa Korowii keame Aesaya faa bol la. O bolɔ ŋɔ, 'Nɛra nɔ ɛɛ noo kohona, kɛ baa a mun jema ba. Baa nyiŋuu kohona, kɛ baa a jema ba, 15dɛkalkɛ ba bambile kpegri, ba kpɔ nɔɔra tɔɔge deŋna, dɛ tɔɔge ba sibie ge. A waa laa aa, ba sie fe ɛɛ nao, asɛ ba deŋna no, asɛ ba jemɛ a mun, dɛ berɛ ba bambile dɛɛ teŋɛ n nɛɛ asɛ n lɛɛ ba.' 16Kɛ he te, he nyu som taeh. He sibie dɛ na, he deŋna gee no wa. 17Kasinteŋ, Korowii keamere kɛrɛdɛ ne Korowii nɛra kɛrɛdɛ fe dɛ nyin kɛ ba na anɔ haa dɛ na nɔ, ba ta dɔe na, dɛ fe ɛɛ nyin dɛ no anɔ haa dɛ no nɔ, ba ta dɔe no. 18"Hé cheg deŋna dɛ no baa waa merɛ mea la waa la mun. 19Nɛra baa dɛ no Korowii Kora nɔ waa baa wola a mun jemɛ laanee do kɛ mea la aa lee ŋwɛnɛ nyoa la. Bɔnsam balaa, dɛ o baa laa waa baa noa la bwa kpɔ le ba nyu bini. 20Mea aa lee bwetala ta la ge chegɔ tɛ nɛra baa no waa nɔ, dɛ ba sie lɛo la. 21Kɛ waa la aa wola ban jooge la gelɔ aa won ba nyu bini ka. A chegɛ Korowii waa ta waane puu ba, asɛ nɛra ge ɛɛ ba hɔhɔrɔwa aa, dɛ ba horɔ. 22Mea la aa lee sɔɔhne baah la chegɔ tɛ nɛra baa no waa nɔ, asɛ harɛ nɔ soga liire ne harɛ nɔ kondɔɔh waa begre ba sie, ba ta gelɛ waa la dɔ tɔnɔ. 23Asɛ mea la aa lee harɛdɛɛge ta la ge chegɔ tɛ nɛra baa no waa la dɛ lawɛ a bini, a dɔ tɔnɔ tɛɛ ba kɛŋɔ mea la aa ɛa kɛrɛdɛ, ane ma lafare, ane ma fifraanumɛl, ane ma fifraatoro la." 24Yeesu kpɔ sɛgla bol waa chag ba ja dɛ ŋɔ, "Kenii Korowii Kora la do. Baa bɛlee ira dɛ ka merɛ mea o koo ta. 25Jwaana bɛl nɛra bwa aa chɔa la, o dɔm bɛl ge iro dɛ ka merɛ kpɔgchɔga ane aa le mea la koo mea la ta, dɛ ir chwa. 26Kwaa la bwa aa lea dɛ kpeg la, a bie ɛɛ taa ba che jemɛ kɛ kpɔgchɔga koo mea la ta. 27Baa la bonɔɔna baa bɔɔro ŋɔ, 'Nomoa, kɛ mea gboo he merɛ koo nɔ ta laɔ? Lee kpɔgchɔga nɔ ge le dɛ ba koo a ta nɔɔ?' 28Anee nomoa la chaŋ ba ŋɔ, 'N dɔm bɛlee ɛ gɛ la.' Asɛ o bonɔɔna la berɛ pɛɛro ŋɔ, 'He dɛ nyin kɛ ya ka parɛ kpɔgchɔga la ta kɛɛ?' 29Anee baa la ŋɔ, 'Kai. Dɛ he ŋɔ he para ta taraken aa, hɛɛ parɛ mea la anee ja a ta. 30Hé gel a bwa pɛ che dɛ ɛ. A koma ta la, mɛɛ ŋɔ nɛra baa dɛ ba a koma la bee bá tɔ sie kɛ kpɔgchɔga la, dɛ vɔrɔwa, dɛ che ka ta nii ta dɛ fuah, mɔɔ dɛ ba komɛ mea tenten la dɛ pa ka do mɛ n dɔndɔŋ bini.' " 31Yeesu kpɔ sɛgla bol waa chag ba ja dɛ ŋɔ, "Kenii Korowii Kora la do. Baa bɛlee ira dɛ kpɔ daa bɛl baa dɛ yerɔ mastad bii dɛ ka du. 32Kwaa bie baa dɛ du bwa bini onjegaa. Kɛ dɛ o leɔ dɛ kpeg aa, o dɛ gwaa konduula bwa, dɛ yon kpeg dajen, asɛ jumbii gba ba sɔh a kɔne o kpala ta." 33Yeesu kpɔ sɛgla bol waa chag ba ja dɛ ŋɔ, "Kenii Korowii Kora la do. O do kɛŋɔ haah bɛl aa ira dɛ kpɔ iisi tama ka koo men logbaa del ta, asɛ a won gel men la bwa uge." 34Waa nɔ bwa Yeesu aa bola dɛɛ bagle nɛnlaa la bwa la, dɛ sɛgla nee wɛɛ bol. Webeŋkpoŋ gba toole o wobol waa wola sɛgla kpɔe. 35Gɛ waa ɛa nɔ gelɔ waa Korowii keame la faa bola la ɛ kpela. Korowii fa kpɔ o keame la nɛɛ bol ŋɔ, "Mɛɛ kpɔ sɛglaa bol waa chag ba. Waa nomɛlbwa aa wola jemɛ bwa le harɛ nɔ mumpar la, mɛɛ bol ba bee." 36Yeesu aa le nɛnlaa la baah la, o kaa jo dea, asɛ o habɔteŋra la ba o be dɛ ba ŋɔ o be ŋɔ, "Chagle yaa kpɔgchɔga baa la dɔm la aa kaa merɛ koo mea la ta la mun." 37Anee Yeesu ŋɔ, "Men Nɛn Bie laanee merɛ mea tenten la. 38Harɛ ta bonɔɔ ɛ koo la. Mea tenten laanee nɛra baa ja Korowii Kora la ta la, asɛ kpɔgchɔga la ge che tɛ nɛra baa lɔ Bɔnsam be pera. 39Baa la dɔm la waa kaa merɛ kpɔgchɔga koo mea tenten la ta la chegɔ tɛ Bɔnsam. Kwaa la koma la chegɔ tɛ waa bwa jaga saŋ, asɛ nɛra baa koma la chegɔ tɛ nyundua toroma la. 40Gɛ baa vɔrɔwe kpɔgchɔga la dɛ che ka do nii ta a fuh la, gɛɛ waa bwa jaga saŋ ɛɛ ba doe. 41Men Nɛn Bie la ɛɛ tomɛ n nyundua toromaa ba n kora nɔ ta bá ba kpɔ nomɛlbwa waa dɛ do nɛra wechɔga ta ne wechɔg-ɛɛra bwa, 42dɛ kpɔ ba ka ta ninlao ta, belaa wii ne weweele do. 43Asɛ name nɛra baa dɛ ɛ wedɛɛga la chaah kɛŋɔ wee ken ba Mɛɛ Koobwɛɛ bela. Nomɛlbwa waa no la, ó no. 44"Korowii Kora la waa ane gee la ja. A do kɛŋɔ baa bɛl aa kaa kpaah kondɔɔh kwaane baa kpɔa sɔh harɛ bɛl ta. Asɛ o ge berɛ kwaa sɔh dɛ kpɔ kwaa la silɛɛ dɛ ka yog komɛlbwa waa dɔa dɛ kpɔ suuga la ka yawɛ a gɛ harɛ la. 45"Korowii Kora la tenten berɔ do kɛŋɔ bonadii bɛl waa dɛ gaage lwedɛɛga ane a yog aa kpega dɛ́ yawɛ. 46Asɛ awola bɛl o ka na lwedɛɛge tenten bɛl o yog aa kpega taeh, dɛ ka yog o kondɔɔh bwa dɛ kpɔ ka yawɛ gɛ lwee la. 47"Korowii Kora la dor bɛl gee nɔ. Nɛra bane baa dɛ ɛ nee toma kaa ta dɔɔh moo ta dɛ lawɛ pɛŋe te bɛlbwa siwi. 48Dɔɔh la aa su pɛŋa la, ba tɛr ba hɛŋle ta, asɛ dɛ soŋni harɛ dɛ chale a bini, dɛ pa pɛŋedɛɛga la do logbaa bini, asɛ dɛ pa anɔ la aa wola were la ka ta. 49Gɛɛ waa bwa jaga saŋ ɛɛ ba doe. Nyundua toroma ɛɛ bao dɛ ba chale nɛnchɔga le nɛndɛɛga bini, 50asɛ dɛ kpɔ nɛnchɔga la ka ta ninlao ta. Belaa wii ne weweele do." 51Yeesu pɛɛ ba ŋɔ, "He dɛ no waa nɔ mun te naa?" Asɛ ba ŋɔ, "Ɔɔh." 52Anee Yeesu berɛ ŋɔ, "Amɔ nomɛlbwa waa jemɛ Mosis Mmara la, dɛ berɛ ba hweli Korowii Kora nɔ waa la do kɛŋɔ nomɛl aa dɔ o dem, dɛ dɔ konfala ne kombena, dɛ won a bini bɛlbwa waa dɛ nyin kpɔe dɛ le bela waa dɛ cheg o kwa." 53Yeesu aa kpɔ sɛgla bol waa bagle nɛra la tonɛ la, o le bela, 54dɛ berɛ kaa o gbagba bwɛ. O bagle nɛra waa ba cheremi dea ta, asɛ nɛra baa no o webagla la bwa nyoa kpo, baa pɛɛ dɔŋa ŋɔ, "Leperaa o le gɛ wejema nɔ ne nɔɔ? Asɛ nyokpowaa nɔ geɔ? 55Kapenta te la bie la laa kɛɛ? O nya laa Mɛɛre aa? O nimanar laa Jems ne Josef ne Seemɔn ne Judas kɛɛ? 56Bwɛɛ nɔ ta laa o nimambii bwa do aa? Leperaa o le a gɛ wejema nɔ ne nyokpowaa ɛɛ nɔ bwa ne nɔ?" 57Anomanta ba siwi ta on sui. Asɛ Yeesu ŋɔ ba be ŋɔ, "Korowii keame dɔ sɔn bobɛlbwa. Kɛ o gbagba bwɛɛ tena ne o lola gboo wola on duu." 58Baa wola on yaradae nomanta, nyokpowaa waa ɛa bela ta warɛ.

will be added

X\