1 Ona Tɔpere bɛl wee, Yeesu ne o habɔteŋra kaa kpɔ mea koo bɛl ta, dɛ lɔr dɛ kpo o habɔteŋra la, asɛ ba ɛ mea la ane dɛɛ chwe. 2 Farisii tena la aa na gɛ la, ba ŋɔ Yeesu be ŋɔ, "Nyiŋi na! He habɔteŋra la dɛ ɛ toma dɛɛ to ya Ona Tɔpere mmara la." 3 Anee Yeesu chaŋ ba ŋɔ, "He ta kure na gɛ ya naa Devid aa ɛa gɛ saŋ lɔr aa dɛ kpo o ne o nɛra la kɛɛ? 4 O jo Korowii Dea dɛ kpɔ paanoo aa ɛ Korowii kwa, o ne o nɛra di. Mmara fe aa ŋwɛnɛ tɛ kɛ ba fee di gɛ paanoo la, Sɔfore gboo fe dɔ ŋwɛnɛ kɛ ba dia. 5 Kɛɛ he ta kure na gɛ Mosis Mmara la aa bagla kɛ Sɔfore baa ɛ toma Korowii Dea Ona Tɔpere la ta la dɛ to Ona Tɔpere mmara la, kɛ ba ge aa bolchɔge di aa? 6 Korowii Dea toma ɛɛ waa baa wola bolchɔge di la, kɛ kasinteŋ, nomɛl lɔ bonɔ dɛ gwaa Korowii Dea. 7 Korowii Tɔn dɛ bagle kɛ, 'He dɛ na he dɔŋa sum aa, anee mɛɛ nyin gwaa kɛ haa kpoo kwaa dɛɛ tɛ mɛ.' Dɛ he fe jemɛ waa nɔ mun aa, he fe aa nɛra nɛɛ nya ŋɔ ba di bolchɔge, 8 dɛkalkɛ n Nɛn Bie laanee dɔ Ona Tɔpere kpegri." 9 Yeesu le bela dɛ kaa cheremi dea bɛl ta, 10 dɛ baa bɛl o nɔn aa sewa lɔ bela. Dɛ nɛra bane lɔ bela dɛɛ nyin dɛ kpɔ waa dawɛ Yeesu nɛ. Anomanta ba pɛɛro ŋɔ, "Ya mmara la dɛ tɛ yaa ŋwɛnɛ kɛ ya won chah weela Ona Tɔpere aa?" 11 Anee Yeesu chaŋe ŋɔ, "Amɔ dɛ he bini bɛl pee le bɔluŋ bɛl bini Ona Tɔpere aa, ɛrɛɛ wɛɛ ba ɛɛ yɔ? Waa pee laanee ka lawɛ le bɔɔ la bini naa? 12 Nɛn ta pee gwaalaa? Anomanta ya mmara dɛ tɛ yaa ŋwɛnɛ ŋɔ ya ɛ nɛn wedɛɛga Ona Tɔpere." 13 Anee o ŋɔ baa la o nɔn aa sewa la be ŋɔ, "Tɛr he nɔn." Asɛ baa la tɛr o nɔnsewe la, dɛ o berɔ do kpegri gɛ o faa doa wubwa la, dɛ do kɛ o nɔn la waa wola sewɛ la. 14 Belaa Farisii tena la le bela dɛɛ vɔrɔwe kɛ bá kpo Yeesu. 15 Yeesu aa naa kɛ nɛra la dɛ nyinu dɛ́ kpo la, o le bela kaa bofale, dɛ nɛnlaa tenten teŋɛ o nɛ, asɛ o chah ba bini banɔ la ba bwara aa dɛ wee ba la bwa, 16 dɛ ŋɔ ba bɛ o waa taa bagle nomɛlbwa. 17 Gɛ Yeesu aa ɛa nɔɔ gela ba jemɛ kɛ waa Korowii keame Aesaya faa bola la ɛ kasinteŋ. 18 O bolɔ ŋɔ, "N bonɔɔ maa leo laanee la. O waa mɛɛ nyin, asɛ n sie gee lɛ o nɛɛ ga. Mɛɛ geloo n Doma ba so o nɛ, ásɛ o bagle nɛra baa lɔ harɛ ta bwa ge gɛ n kasinteŋ ŋwɛnɛre aa doa. 19 Waa waa tɔŋle dɛɛ nyɛg, waa takpeg gee kpɔ bol waa fɔgbaahna. 20 Nɛn do kɛŋɔ daa waa gwɛɛna dɛɛ ba kui aa, waa gel o ku. Dɛ o do kɛŋɔ kandea waa dɛ lawɛ kɛlll la ge, waa gel o dime. Wɛɛ lawɛ bambile nɛra nɛɛ dɛ yo ka tel gɛ saŋ nɛra bwa aa ba jemɛ Korowii kasinteŋ ŋwɛnɛre la, 21 ásɛ nɛra baa lɔ harɛ ta bwa kpɔ ba hwɛga dawɛ o nɛ." 22 Asɛ nɛra bane kpɔ baa bɛl kwaa aa dɛ ir o nɛɛ dɛ gel o nyoŋe waa wola won waa ge bol ba Yeesu be, asɛ o chah baa la dɛ gel wɛɛ na dɛ won waa ge bola. 23 Waa Yeesu aa ɛa la gelɔ nɛnlaa la bwa nyoa kpo, baa pɛɛ dɔŋa ŋɔ, "Amɔ Devid Naa nɔɔ naa?" 24 Farisii tena la aa no waa nɛra la aa dɛ bɔɔ dɔŋa la, ba chaŋe ŋɔ, "Kwaa aa dɛ ir nɛra nɛɛ bwa nomoa Bɛlsebulee tɛo kpegri o won kwaa doŋa nɛra nɛɛ la." 25 Yeesu aa jemɛ waa baa dɛ bol la, anee o ŋɔ, "Dɛ harɛ bɛl ta tena bini pere anɛ ba gbogbo ɛɛ yo aa, harɛ la dɛ pagre. Asɛ bwɛɛ bɛlbwa ge o bini aa pere anɛ bampera ne bampera ɛɛ yo la, bwɛɛ la dɛ pagre. Gɛɛ dɛ waane ba lola bɛl bini asɛ ba pere anɛ dɛ gbo ɛɛ yo aa, lola la aa won ɛ lola. 26 Anomanta dɛ Bɔnsam kora bini pegro baa yo aa, amɔ te kora la aa won ɛ kora. 27 Dɛ he ŋɔ Bɛlsebulee tɛ mɛ kpegri n won kwaa doŋa nɛra nɛɛ aa, a wer. Aah, dɛ he ge, umee tɛ he habɔteŋra nɔ kpegri ba won a doŋa ɔ? He gbagba habɔteŋra la we-ɛɛlaa dɛɛ bagle kɛŋɔ he kono kwara! 28 Korowii Doma kpegri nee mɛɛ doŋi kwaa aa dɛ ir nɛra nɛɛ la. Anomanta hé jemɛ kɛŋɔ Korowii Kora dii la telo tonɛ. 29 "Nomɛlbwa aa won jo bokpega te dea dɛ ŋwɛ o laala bwa, nemenɛ o tɔ sie won vɔrɔwo mɔɔ dɛ won jo o dea ka pa o laala. 30 "Nomɛlbwa waa wola n nɛɛ jae la aa n waa nyin. Nomɛlbwa waa wola men chae dɛɛ boa n nɛra nyoa dɛɛ pɛ la lɔ ba dɛɛ pegre. 31 Anomanta n dɛ ŋɔ he be kɛ Korowii ɛɛ wonoo kpɔ wechɔga bɛlbwa ne wobochɔga bɛlbwa kɛ nɛn. Kɛ nomɛlbwa waa bol Korowii Domadɛɛge la te nɛnhɛlwobol la, waa kpɔ kɛo bwa. 32 Nomɛlbwa waa bol waa yagɛ men Nɛn Bie la, wɛɛ wonoo kpɔ kɛo. Kɛ nomɛlbwa waa bol wobochɔga yagɛ Korowii Domadɛɛge la te, fini ne kere, Korowii aa kpɔ kɛo bwa. 33 "Dɛ daa nɔn wer aa, dɛ daa la gbabirii wera. Kɛ dɛ he ŋɔ daa nɔn aa weraa, dɛ daa la gbabir gee wola were. Daa nɔn taa ba che dɛ jemɛ o dasoo. 34 Nɛnchɔga kɛ harɛkwa! Wechɔga gbo aa su he bini nɔ, wobodɛɛga ɛɛ wonoo le he nyoa ta naa? Waa aa lɔ nɛn bambile ta laanee o nyoa ɛɛ bol. 35 Nɛndɛɛge wedɛɛga ɛɛ taa a che baa jemɛ wedɛɛga aa lɔ o bambile bini. Gɛɛ ba che nɛnchɔge ge wechɔga ɛɛ ta dɛɛ jemɛ wechɔga aa lɔ o bambile bini. 36 N dɛ ŋɔ he be ŋɔ, wesale bɛlbwa nomɛlbwa aa bola la, wɛɛ bagle a munii awola Korowii aa ba dɛ ba bol nɛra bwa waa dɛ pa bole la. 37 He gbagba wobol taa Korowii ɛɛ ba chega pa heyaa bole. He wobol ɛ wobodɛɛga aa, wɛɛ pae boldɛɛgee, dɛ he wobol ɛ wobochɔga aa, wɛɛ pae bolchɔgee." 38 Tɔn Jerema la bane ne Farisii tena bane ba Yeesu be dɛ ba ŋɔ, "Nomoa, ya dɛ nyin kɛ he ɛ nyokpowaane yá na dɛ jemɛ kɛ kpelaa Korowii bee he le." 39 Anee Yeesu chaŋ ba ŋɔ, "Ɛrɛɛ fini nɛra ɛ wechɔg-ɛɛra gbo baa wola Korowii ɔmɛ gɛ nɔɔ? Maa wobɛlbwaa ɛ hé na, nemenɛ waa aa pu Korowii keame Jona la dɔŋ gboo dɛɛ ba n ge pui ásɛ he che a ta jemɛ n nɛnsoo. 40 Gɛ Jona aa di tɔpebire atoro pɛŋejen la tea bini la, gɛɛ men Nɛn Bie la gee ba tɔpebire atoro dii lalbɔɔ bini. 41 Awola nɛra bwa aa ir seo ta dɛ ba che Korowii sie asɛ o bol ba waa dɛ pa bole la, Niniwe tena ɛɛ bol waa bɔ fini nɔ tena, dɛkalkɛ ba te no Korowii waa Jona aa bola la mun dɛ charɛ ba liire le ba wechɔga ta. Kɛ kasinteŋ, naate waa gwaa Jona lɔ bonɔ, asɛ he ŋɔ haa o bee no. 42 Seba kooro waa ɛ haah la gba ɛɛ bol waa bɔ fini nɔ tena, dɛkalkɛ o valɔ le o harɛ ta bojaŋ le dɛ́ ba no Kooro Solomɔn wejemwa. Kɛ kasinteŋ, naate waa gwaa Kooro Solomɔn lɔ bonɔ, asɛ he ŋɔ haa o bee no. 43 "Fini nɔ nɛra do kɛŋɔ nɛn Bɔnsam aa gela o torome bɛl do o nɛɛ dɛ chɔg o da. A habɔɔ la naate charɛ o liire, asɛ Bɔnsam torome la le o nɛɛ dɛ kaa ka nyin bofale dɛ́ so. O gaagaa, o ta wone dɔ bɔr dɛ́ so onɛ, 44 dɛ berɛ ŋɔ, 'Mɛɛ kaa n bug ta bela maa lea ba laanee,' 45 dɛ berɛ ka na kɛ baa la liire chaahnɔ kɛŋɔ dea baa chaaro dɛ kwaaro kɛrɛdɛ, kɛ dɛ gel o chɔ pɛɛ. Gɛɛ o won la ka kpɔ o bala anuanɛ aa gwaalo kwara, a bwa won ba so naate la nɛ, dɛ chɔg o da gwaa gɛ o faa doa wubwa la. Gɛɛ aa ba doe fini nɔ nɛra baa ɛ nɛnchɔga nɔ nɛ." 46 Yeesu nyoa taa lɔ waa ta o bol dɛɛ bagle nɛra la la, o nya ne o nimanar ba bela dɛ ba che buse dɛɛ nyinu dɛ́ bol waa o be. 47 Anomanta nɛra la bɛl ŋɔ o be ŋɔ, "Nyiŋi na, he nya ne he nimanar chegɛ buse dɛɛ nyin he bɔr dɛ́ bol waa he be." 48 Yeesu pɛɛ ba ŋɔ, "Umee n nyaɔ? Umewaa n nimanar ɔ?" 49 Asɛ o tɛr o nɔn pa o habɔteŋra la nɛɛ dɛ ŋɔ, "Hé na n nya ne n nimanar. 50 Nomɛlbwa waa dɛ ɛ waa n Mɛɛ waa lɔ nyundua aa dɛ nyin kɛ he ɛ laanee n nime ne n nimambie ne n nya."
