Maatiu 11

1Yeesu aa bol waa nɔ bagle o habɔteŋra fi dɛ banɛ la tonɛ la, o le bela dɛ kaa bwɛɛre aa bɛne bela la ta dɛ kaa bol Korowii Waa dɛɛ bag ba. 2Dɛ ba do Jɔn waa dɛ sɔ nɛra Korowii nee la dea, o chɔ bela dɛ no waa Yeesu Kristo aa dɛ ɛ la, asɛ o tomɛ o habɔteŋra bane o be 3ŋɔ bá ka pɛɛro ŋɔ, "Henee nɛn Korowii aa bagɛ nyoa ŋɔ wɛɛ geloo o ba la aa, kɛɛ he laa o, asɛ yáa nyiŋi naate habɔɔ?" 4Anee Yeesu ŋɔ, "Hé berɛ kaa dɛ ka ŋɔ Jɔn be waa haa baa na dɛ no la. 5Hé ŋɔ o be ŋɔ nyoŋa dɛ na bɔr, boobie ɛɛ valɛ, asɛ nɛra weechɔga aa chɔg ba bwadabii la ge bwara kwaa. Hé ŋɔ o be ŋɔ amumure dɛ no wa, lala ir seo ta, asɛ nyaara ge dɔ Amanesoma la dɛɛ no. 6He naate haa wola men tɔŋle la, he na som." 7Jɔn habɔteŋra la aa dɛ kaa la, Yeesu bol Jɔn waa dɛɛ bagle nɛnlaa la ŋɔ, "Haa la Jɔn be pua waa ɛ hɛŋle gbo la ta la, dɛ bɔkwaa he fe ɛɛ nyin kɛ he na nɔ? Kpɔg bɛl peu aa dɛ ta wɛɛ yiigi la kɛɛ? 8Dɛ gɛ laa ge aa, dɛ bɔkwa tenee he ka nyiŋi ɔ? Nɛn waa do laaladɛɛgaa he ka nyiŋi kɛɛ? Nɛra baa dɛ do laaladɛɛga la, koodemii ba do. 9Hé bag mɛ, bɔkwa tenee he la bela ka nyiŋi ɔ? Korowii keamee kɛɛ? Kasinteŋ, Korowii keamee he na la, kɛ o gwaa Korowii keame kwara, 10dɛkalkɛ Jɔn nɔ waa ba chwerɛ ŋɔ, 'Korowii ŋɔ, "Mɛɛ tomɛ n toromee ó tɔ he sie dɛ kwaa ŋwɛnɛ tɛɛ" ' la. 11Kasinteŋ, ba lolɛ nɛnjena harɛ nɔ ta, kɛ Jɔn waa dɛ sɔ nɛra Korowii nee nɔ gwaa ba bwa. Kɛ nomɛlbwa waa ɛ bechala Korowii Kora la ta te berɔ gwaa Jɔn. 12Dɛ le saŋ la Jɔn aa lea dɛɛ bol Korowii Kora nɔ waa la, nɛra sie begrɔ ba kpɔ sibegra dɛɛ nyin dɛ ja o Kora la ta. 13Korowii keamere la bwa ne Mosis tɔ sie bol Korowii Kora la waa dɛ ba tel gɛ saŋ Jɔn aa bala. 14Kɛ dɛ hɛɛ yarada n waa maa dɛ bol nɔɔ te naa, Elaeja la baa bol o waa ŋɔ wɛɛ bao la, onee a gɛ Jɔn nɔ. 15Nomɛlbwa waa no la, ó no. 16"Bɔkwa konee mɛɛ ba fini nɔ nɛra kpɔe dɛ magɔɔ? Ba do kɛŋɔ bechale bane aa dɛ hɛlɛ fɔgbaah, asɛ bane ŋɔ ba bala be ŋɔ, 17'Ɛrɛɛ ya go silɛɛ yela, he sie ta lɛɛ hé sa, ya berɛ ta wiile ge, he loo ta kui hé wi nɔɔ?' 18Jɔn aa bala la, dɛ o dɛ vɔwɛ nyoa, waa sen ge nyɔ, asɛ nomɛlbwa ŋɔ kwaa dɛ ir o nɛ. 19Asɛ n Nɛn Bie la te aa bala la, n di kwa, dɛ nyɔ sen ge, asɛ nomɛlbwa berɛ ŋɔ, 'Hé na baa nɔ! Kondikondidii ne sennyɔɔree on. Lampoo lɛɛra baa dɛ bɔ nɛra apoo ne wechɔg-ɛɛraa ɛ o daamanar.' " Waa bol gɛ tonɛ la, anee o ŋɔ, "Wejereme bɛlbwa we-ɛɛla taa a che baa jemɛ kɛ o ɛ wejereme." 20Bwɛɛre Yeesu aa ɛ nyokpowaa a ta warɛ la, a nɛra ta ba wechɔga ta leɛ. Anomanta o ŋɔ, 21"Korasen tena, hé bwɛɛlɛ. Hɛɛ na waa taeh! Bɛtsaeda tena, hé ge bwɛɛlɛ. He gee na waa taeh! Nyokpowaa nɔ maa ɛa he bini nɔ, dɛ Taaya ne Sidonee n fee ɛa nɔ naa, ba fe charɛ ba liire le ba wechɔga ta bigri, dɛ tɔ lwe yale dɛ kpɔ tɔɔ fɔgɛ ba bwara bwa. 22Kasinteŋ, awola Korowii aa ba dɛ ba bol nɛra bwa waa dɛ pa bole la, wɛɛ na Taaya ne Sidon tena sumii gwaa heya. 23Asɛ he Kapeeneɔm tena ge, he fe dɛ nyin kɛ he gbagba ir kaa Korowii doa kɛɛ? Baa vigri heyaa Bɔnsam nii taa. Nyokpowaa nɔ maa ɛa he bini nɔ, dɛ ba fe ɛa Sodom aa, Sodom fe ta lole ba le fini, Korowii fe ta on chɔgɛ. 24Kasinteŋ, hé jemɛ kɛŋɔ awola Korowii aa ba bol nɛra bwa waa dɛ pa bole la, wɛɛ na Sodom tena sumii gwaa heyaa." 25Belaa Yeesu kpɛɛ Korowii ŋɔ, "N Mɛɛ, nyundua ne harɛ bwa Dɔɔ! N dɛ jaame kɛ haa kpɔ he waa nɔ sɔh sipila tena ne wejerema, dɛ kpɔ bagle nɛra baa wola wobɛlbwa jemɛ nɔ. 26Jam, n Mɛɛ. Gɛɛ wera he be." 27Bela Yeesu berɛ ŋɔ, "N Mɛɛ kpɔ wobɛlbwa do n nɔn ta. Nomɛlbwa aa men Korowii Bie jemɛ, nemenɛ n Mɛɛ la gbo. Gɛɛ nomɛlbwa ge aa wola n Mɛɛ la jemɛ, nemenɛ n ne nɛra maa dɛ nyin kɛ n gel ba jemɔ la. 28"He banɔ la he soga bini waa aa kana gwaa he nɛɛ la bwa, hé kpɔa ba n be ásɛ n lɛ heyaa he onɛ. 29Gɛ baa kpɔ daa dawɛ nae anɛ nɛ a pɛ dɛɛ ɛ toma la, hé gel n ne heyaa ɛ gɛ, asɛ he hweli le n be, dɛkalkɛ n pwɛre, maa mbarafo ge ɛ. He ɛ gɛ naa, haa koeh ba. 30N waa do toŋgboŋ ken, bone maa kpɔ dawɛ he nɛɛ la ge fɛgre."

will be added

X\