Maatiu 1

1Gɛ Kooro Devid naa Yeesu Kristo naanar aa teŋɛ dɔŋa nɛɛ laanee nɔ. Abrahamee ɛ ba bwa nyu te. 2Abraham lolɛ Aesek, Aesek lolɛ Jekɔb, Jekɔb lolɛ Juda ne o dɔɔranar ne nimanar, asɛ Juda lolɛ Pɛrɛs ne Sɛra (ba nya sɔne Taama). Pɛrɛs lolɛ Hɛsrɔn, Hɛsrɔn lolɛ Ram, Ram lolɛ Aminadab, Aminadab lolɛ Naasɔn, Naasɔn lolɛ Salmon, Salmon lolɛ Boas (o nya sɔne Rahab), Boas lolɛ Obɛd (o nya sɔne Rut), Obɛd lolɛ Jese, asɛ Jese lolɛ Kooro Devid. Kooro Devid lolɛ Solomɔn (Solomɔn nyaa haah bɛl Yuraya faa moo ka la), Solomɔn lolɛ Rehoboam, Rehoboam lolɛ Abija, Abija lolɛ Asa, Asa lolɛ Jehosafat, Jehosafat lolɛ Joram, Joram lolɛ Usaya, asɛ Usaya lolɛ Jotam. Jotam lolɛ Ahas, Ahas lolɛ Hɛsekia, Hɛsekia lolɛ Manasɛ, Manasɛ lolɛ Amon, Amon lolɛ Josia, asɛ Josia lolɛ Jekonia ne o nimanar. A gɛ saŋee Babilɔn tena pɔ Israel tena nɛɛ dɛ lag ba kaa ba harɛ la. Baa lag ba kaa Babilɔn harɛ la taa Jekonia lolɛ Sealteɛl, Sealteɛl lolɛ Sɛrubabɛl, Sɛrubabɛl lolɛ Abiud, Abiud lolɛ Eliakim, Eliakim lolɛ Asɔ, asɛ Asɔ lolɛ Sadɔk. Sadɔk lolɛ Akim, Akim lolɛ Eliud, asɛ Eliud lolɛ Eleasa, Eleasa lolɛ Matan, Matan lolɛ Jekɔb, Jekɔb gee lolɛ Josef. Gɛ Josef nɔɔ mo Mɛɛre waa lolɛ Yeesu baa dɛ yerɔ Kristo Korowii aa ŋɔa ŋɔ wɛɛ tomɔɔ ó ba lɛ o nɛra la. 17Le Abraham bere saŋ ka tel Kooro Devid saŋ la, naanar la lɔ fi dɛ banaarɛ. Asɛ le Kooro Devid saŋ ka tel gɛ saŋ baa lag ba kaa Babilɔn harɛ la ge, naanar la lɔ fi dɛ banaarɛ. Asɛ dɛ berɛ le gɛ saŋ baa lag ba kaa Babilɔn harɛ la ba le Kristo saŋ la, a ge jagɛ fi dɛ banaarɛ. 18Kenii Yeesu Kristo lola bini waa do. Josef ne Yeesu nya Mɛɛre nɛra sɛoh ŋɔ o kpɔɔ mo. Baa wola chɔe mɔɔ la, dɛ Mɛɛre chegɛ Korowii Domadɛɛge ta dɛ kpoŋe tea. 19Dɛ o jaa Josef la ɛ nɛndɛɛge o wa ɛɛ su Korowii siwi. Dɛ o fe aa nyin kɛŋɔ o do Mɛɛre sihiih nɛnfuuh baah ta, dɛ fe ɛɛ nyin kɛŋɔ o sɔh dɛ vɛoh. 20Gɛ waa nɔ aa lɔ Josef liire bini la, belaa nyundua torome bɛl ba o be deera ta dɛ ba ŋɔ, "Devid Naa Josef, dɛɛ berɛ ɔma kɛŋɔ hɛɛ mo Mɛɛree. Korowii Domadɛɛgee gela o kpoŋe tea la. 21Wɛɛ lolɛ bibaalee, asɛ he pa o sɔn Yeesu, o munii kɛŋɔ Lɛɛ, dɛkalkɛŋɔ on dɛɛ ba bala dɛ ba lɛ o nɛra ba wechɔga ta." 22A gɛ waa nɔ bwa chigo dɛ gel waa Korowii aa gela o keame bol la ɛ kpela kɛŋɔ waa ŋɔa ŋɔ, 23"Tolo bɛl ɛɛ kpoŋe teaa dɛ lolɛ bibaa, asɛ baa yerɔ Imanoɛl." O munii kɛŋɔ, "Korowii ne ya lole." 24Josef aa ir dom ta la, o ɛ gɛ nyundua torome la aa ŋɔ o be la, dɛ kpɔ Mɛɛre ba o dem. 25Kɛ o ne o ta chɔe bwa dɛ ka tel kɛŋɔ waa lolɛ o bibaa la. Waa lolɔ la, Josef pa o sɔn Yeesu.

will be added

X\