Maak 9

1Asɛ o ŋɔ, "Kasinteŋ, Korowii ɛɛ ba di o Koraa kpegri nɛɛ harɛ nɔ ta, dɛ he bini bane ta soge le dɛ nao." 2Aa di tɔpera anumɛl la, Yeesu tɔ Pita ne Jems ne Jɔn sie ba ka teeh bwejen bɛl, dɛ gbo ka pɛ so o doa bobɛl. Baa soga la, dɛ Yeesu begrɔ, 3asɛ o laala bwa to dɛɛ nyɛgle al-al ken dɛ to kohona gwaa gɛ baa chɛgɛ laala a yon to la. 4Ba ne ŋɔ ba nyiŋi dɛ Elaeja ne Mosis ja o nɛɛ ba ne wɛɛ bol wa. 5Asɛ Pita ŋɔ Yeesu be ŋɔ, "N Dɔɔ, a wer taeh kɛŋɔ yaa lɔ bonɔ nɔ. Gel ya do kukure atoro ásɛ he kpɔ bɛl, Mosis kpɔ bɛl, Elaeja ge kpɔ bɛl." 6Ɔmee lag ba kohona dɛ gel Pita aa dɛ bol waa kwaraa la, dɛ waa waa waa dɛ bol la mun jemɛ. 7Belaa bam bɛl ba tɔ ba nɛ, asɛ ba no taa bɛl bam la bini kɛ, 8"N Bie maa dɛ nyinuu nɔ. Hé cheg deŋne dɛ no o be." Ba te ne taa la noe tonɛ dɛ ke nyiŋi dɛ nomɛlbwa toole bela. Yeesu gboo ba na kɛŋɔ o ja ba nɛɛ bela. 9Baa le bwe la doa dɛɛ ba la, Yeesu ja ba ŋɔ, "He bɛ waa nɔ haa naa nɔ taa bagle nomɛlbwa bwa dɛ ka tel kɛŋɔ n Nɛn Bie la aa sewɛ dɛ ir mɔɔ." 10Anomanta ba ta nomɛlbwa be ŋɔe, kɛ dɛ ba te gbagba dɛ bɔɔ dɔŋa ŋɔ, "Seo bini ira nɔ te munii ɛrɛ te nɔ?" 11Anee ba bɔɔ Yeesu ŋɔ, "Aah ɛrɛ waa Tɔn Jerema la ɛɛ bagle ŋɔ a chɛ kɛŋɔ Elaeja tɔ sie ba mɔɔ Kristo la Korowii aa bagɛ nyoa ŋɔ wɛɛ tomɔɔ ó ba lɛ yaa la ge ba nɔɔ?" 12Asɛ o chaŋe ŋɔ, "Elaejaa dɛ tɔ sie ba kpela, dɛ́ ba kwaa ŋwɛnɛ mɔɔ. Kɛ ɛrɛ waa Korowii Tɔn la ŋɔ Nɛn Bie la dɛ ba wahala nae kohona, kɛ nɛwɛnyini sie aa o tɔga ba laɔ? 13Kasinteŋ, Elaeja balɔ dɛ kaa. Waa bala la, ba tetooraa ba ɛo. Gɛɛ ba chwerɛ o waa Korowii Tɔn bini la." 14Baa baa tel o habɔteŋra la kabora la be la, dɛ nɛnlaa bar ba cheme, asɛ ba ne Tɔn Jerema bane ɛɛ tɔŋle wa. 15Nɛra la aa na Yeesu la, ba bwara yɔrɔ, asɛ ba chwa dɛ ba jaamo. 16Asɛ o bɔɔ o habɔteŋra la ŋɔ, "Bɔkwa waa he ne baa tɔŋle laɔ?" 17Baa bɛl le nɛra la bini dɛ ŋɔ, "Nomoa, kwaa dɛ ir n bie nɛɛ dɛ gel waa won waa bol, asɛ n kpɔɔ ba he be. 18A iraa, gɛɛ a goo harɛ, asɛ fufug ɛɛ le o nyoa, dɛ o dɛ chwe o nyena, dɛ beŋri chɔ. N soŋe he habɔteŋra la ŋɔ bá doŋi kwaa la ta, asɛ ba doŋa kahonɛ." 19Asɛ Yeesu ŋɔ ba be ŋɔ, "Oo! Ɛrɛɛ he fini nɔ nɛra aa wola yarada dɔe bwa nɔɔ? Tɔpera aŋwɛnɛɛ hɛɛ nyin kɛ ń lawɛ bambile dɛ so he be mɔɔ he yarada Korowii ɔ? Maa tɔpere bɛl dii ba he be kpa oo! Hé kpɔ bie la ba tɛ mɛ." 20Asɛ ba kpɔ bie la ba tɛo. O kwaa aa dɛ ir o nɛɛ la aa na Yeesu la, a tagɔ ta, asɛ o chɔ dɛɛ yo gɛ gbuŋgbuŋri te aa dɛ ɛ la, dɛɛ gbili bɔr bwa, dɛ fufug dɛ le o nyoa. 21Asɛ Yeesu bɔɔ bie la mɛɛ ŋɔ, "Saŋ besoo weela nɔ lawɔ wɔ?" Asɛ o mɛɛ la ŋɔ, "O bechale saŋ bwaa a lawɔ. 22Kwaa la ir o nɛɛ aa, dɛ a dɛ nyin o kpoe. Tɔpebɛla a tagɔ dɛɛ ta nii ta, tɔpebɛla ge a tagɔ dɛɛ ta nee ta. Dɛ hɛɛ wonoo chaoh waa, na ya sum dɛ chaoh tɛ yaa." 23Anee Yeesu ŋɔ, "Mɛɛ wonoo chaoh waa, a lɔ he be. Nɛn waa yarada Korowii la, Korowii won wobɛlbwa ɛɛ dɛ tɛo." 24Bug la ta dɛ baa la sɛoh takpeg ne ŋɔ, "N yaradao, kɛ n yarada aa kanɛ. Cha mɛ ń yaradao kohona." 25Asɛ Yeesu aa baa na kɛŋɔ nɛra wuro dɛɛ ba ba tɔ ba nɛɛ la, o den kɔr kwaa aa dɛ ir bie la nɛɛ la ŋɔ, "He konchɔga haa dɛ ir bie nɔ nɛɛ waa wola waa no, waa berɛ won dɛɛ bol waa ge nɔ, n ŋɔ he be ŋɔ hé le o nɛ! He bɛ o nɛɛ ba so kpa bwa!" 26Ate dɛ kwaa la sio kpegri ne dɛ tagɛ bie la ta harɛ, asɛ o chɔ dɛɛ yo kɛŋɔ gbuŋgbuŋri te ken mɔɔ a le o nɛ. Anee o chɔ kɛŋɔ waa sewa ken. Asɛ nɛra kɛrɛdɛ ŋɔ o sewɔ. 27Belaa Yeesu lawɛ o nɔn o ir. 28Yeesu aa ba dem a ka o ne o habɔteŋra la gbo la, ba bɔɔro ŋɔ, "Ɛrɛ waa ya te aa wola wone kɔr kwaa la á le nɔɔ?" 29Anee Yeesu ŋɔ, "Korowii soŋa gboo won a gɛ kwaa nɔ doŋa." 30O ne o habɔteŋra la le bela dɛ kpɔ Galilia harɛ ta kaa. Dɛ waa nyin kɛŋɔ nomɛlbwa jemɛ bela waa lole, 31dɛkalkɛŋɔ dɛ o dɛ bagle o habɔteŋra la wa, dɛɛ ŋɔ, "Ba dɛ ba n Nɛn Bie lee do nɛra nɔn ta, asɛ ba kpo mɛ, asɛ a tɔpetooro wee la, n ir seo ta." 32Dɛ ba ta Yeesu waa waa bola la mun noɛ, kɛ dɛ ba dɛ ɔmɛ kɛŋɔ bá bɔɔro a mun. 33Asɛ ba ba Kapeeneɔm. Baa baa jo dea la, Yeesu bɔɔ o habɔteŋra la ŋɔ, "Bɔkwa waa he tɔŋle ŋwɛnɛ ta laɔ?" 34Ba ta wone chaŋo, dɛkalkɛŋɔ dɛ ba dɛ nyin ba jemɛ ba bini onɔ la waa ɛ ba bwa nomoa, dɛɛ di a gɛ tɔŋla. 35Asɛ Yeesu so harɛ dɛ yer ba dɛ ŋɔ ba be ŋɔ, "Naate waa dɛ nyin kɛ o ɛ he bwa nomoa la, a chɛ kɛŋɔ o ɛ o te bechala dɛɛ tomɛ heya." 36Anee o lawɛ bechajega bɛl ba che ba baah ta, dɛ kpɔɔ, dɛ ŋɔ ba be ŋɔ, 37"Nomɛlbwa waa koh n waa dɛ nyiŋi bie nɔ dɔŋ nɛɛ la, dɛ menee o nyiŋi la. Nomɛlbwa ge waa nyiŋi n nɛɛ la, dɛ n gbo laa o nyiŋi. Dɛ naate waa tom mɛ la nɛɛ o nyiŋi la." 38Jɔn ŋɔ o be ŋɔ, "Nomoa, ya na baa bɛl waa kpɔ he sɔn dɛɛ doŋi kwaa nɛra nɛ, asɛ ya kaoh ŋɔ ó gel, dɛkalkɛŋɔ o ta ya bini bɛl ɛɛ." 39Asɛ Yeesu ŋɔ, "He bɛ on kah ŋɔ ó gel, dɛkalkɛŋɔ nomɛlbwa toole dɛ won che n sɔn ta ɛ a gɛ nyokpowaa nɔ dɔŋa dɛ berɛ yerɛ n sɔnchɔge kpa. 40Nomɛlbwa waa wola ya nɛɛ chegɛ la, dɛ ya somee. 41Kasinteŋ, nomɛlbwa waa koh kɛ he ɛ men Kristo nɛra nomanta dɛ tɛ heyaa nee hé nyɔ la, waa o kembɔr paŋa ba bwa. 42"Nomɛlbwa waa negre bechajegre nɔ dɔŋ bɛlbwa waa dɛ yarada mɛ nɔ asɛ o ɛ wechɔga la, dɛ ba fe vɔwɛ nambwe do o baŋa dɛ kpɔɔ ka ta moo vil ta kwaraa fe bɔ. 43Dɛ he nɔn ɛɛ negree he ɛ wechɔga aa, teŋo ta, dɛkalkɛŋɔ he kpoŋe nɔmbeŋkpoŋ dɛ dɔ Korowii be kaa bɔ haa kpoŋe nɔɔra anɛ dɛ kaa Bɔnsam nii aa wola dime bwa la ta. 45Dɛ he nakpala gee negree he ɛ wechɔga aa, teŋo ta, dɛkalkɛŋɔ dɛ he nakpale teŋno he dɔ Korowii be kaa laa, a bɔ kɛŋɔ haa dɔ nakpale anɛ dɛ kaa Bɔnsam nii ta. 47Dɛ he siwi gee geloo he ɛ wechɔga aa, fomo ta, dɛkalkɛŋɔ he kpoŋe siwi beŋkpoŋ dɛ ja Korowii Kora ta bɔ kɛŋɔ haa kpoŋe sibie anɛ dɛ kaa Bɔnsam nii ta, 48belaa dudule aa dɛ di ba ola la aa wola sewɛ bwa, nii aa dɛ fuuh ba la ge aa dime bwa. 49Anomanta Korowii ɛɛ kpɔ niinii ɛ nɛra bwa kɛŋɔ ba yon kpɔ yar merɛ kwaa ta la. 50"Yar wer. Kɛ dɛ aa somɛ kpa aa, ɛrɛɛ baa ba a ɛɛ a do som jaɔ? Anomanta hé ne he dɔŋa so kɛrɛdɛ dɛ do som gɛ yar aa soma la. Hé gel he nyoa pɛ."

will be added

X\