Maak 7

1Farisii tena la ne Tɔn Jerema la bini bane baa le Jerusalam la pɛ nyoa dɛ ba cheme Yeesu sie. 2Farisii tena la ne ba dɔŋa Juda tena la bwa ta ba nɔɔra samɛ ŋwɛnɛ saŋ la tena la aa bagla la ta naa, baa kwaa di, dɛkalkɛŋɔ ba kii. 3Dɛ ba le yawa ta ba naa, ba dɔ yagla bɛl baa dɛ yagle kondikwaa baa kpɔa le yawa ta ba la, dɛɛ loo ba numoli ne polowiine ne loga gɛ saŋ la tena aa bagla la mɔɔ dɛɛ di kwa. 4Farisii tena la ne Tɔn Jerema la aa cheme Yeesu sie la, ba nao kɛ o habɔteŋra la bane chɔg ba kii la. Ba ta nɔɔra samɛ gɛ, dɛ kpɔ "nɔndoŋa" dɛɛ di kwa. 5Ba bɔɔ Yeesu ŋɔ, "Ɛrɛ waa he habɔteŋra nɔ ɛɛ jo ya kii nɛɛ baa wola sama yaa naanar aa bagle yaa ŋɔ yá samɛ la samɛ mɔɔ dɛɛ di kwaa nɔɔ?" 6Anee Yeesu ŋɔ ba be ŋɔ, "He nɛra haa nyiŋi nɛra sie mɔɔ dɛɛ ɛ wa! Korowii keame Aesaya na he waa bol kɛrɛdɛ kɛ waa ŋɔa ŋɔ, 'Nɛra nɔ te, nyoa gbo nee baa duu mɛ, kɛ ba tea bini te ta toe. 7Nɛwɛnyini mmarare taa baa bagle ŋɔ nɛ́ra teŋɛ. Anomanta pɛɛpɛɛ baa tom mɛ.' 8Korowii waa he gel, dɛ berɛ lawɛ he saŋ la waa bini." 9Yeesu berɔ ŋɔ ba be ja ŋɔ, "Hé na gɛ haa vɛh Korowii waa la bil dɛ lawɛ he saŋ la waa bini! 10Mosis Mmara la bini o ŋɔ, 'Duu he nya ne he mɛɛ,' dɛ, 'Nomɛlbwa waa bol o nya ne o mɛɛ bwara wechɔge la, a chɛ kɛ ba kpoo.' 11Kɛ he te dɛ bagle he saŋ la waane kɛŋɔ dɛ nɛn dɔ komɛl dɛ́ won kpɔ cha o nya ne o mɛɛ, dɛ ŋɔ kon la ɛ Kɔɔban aa, Kɔɔban munii kɛŋɔ Korowii konee, 12amɔ haa sɛh ó kpɔ kon la cha o nya ne o mɛɛ kpa. 13He kpɔ he saŋ la waa la haa dɛ bagle la dɛɛ chɔg Korowii waa la. Waa haa dɛ ɛa ken warɔ." 14Yeesu yerɛ nɛra la ba o be ja dɛ ŋɔ, "Hé bwa no n be dɛ jemɛ kɛŋɔ 15kwaa nɛn aa dɛ di la laa gela o ɛ nɛnchɔge, anɔ la aa dɛ le o nyoa wɛɛ bol la, anee gela o ɛ nɛnchɔge. 16Nomɛlbwa waa dɔ deŋna dɛ no la, ó no." 17Yeesu gel nɛnlaa la bela dɛ ba dem, anee o habɔteŋra la bɔɔro sɛgla la mun. 18O ŋɔ ba be ŋɔ, "He ge aa a mun jemaa? Haa jemɛ kɛ kwaa haa dɛ di aa won gel he ɛ nɛnchɔge aa? 19Aa he bambile bini kaa. He teene binii aa kaa, asɛ dɛɛ berɛ dahara." Yeesu aa bol waa nɔ la, o baglɔ kɛ kondikwaa bɛlbwa wer. Aa won gel nɛn ɛ nɛnchɔge. 20Dɛ ŋɔ, "Waa aa le nɛn bambile bini la, anee gela o ɛ nɛnchɔge. 21Liichɔga, jwamane, ŋwɛɛ, nɛŋkpoa, 22dɔŋa haahna nyina, kwaa ta sibegra, musu wa, nɛra faahra, pɛlchɔga we-ɛɛla, kayɛglɛ, dɔŋa ŋwala, karamani wa, ne liire bɛ dɔe, bambile binii a le. 23Anee gela nɛn ɛ nɛnchɔge." 24Yeesu berɔ ir le bela kaa Taaya pera, dɛ ka jo dem bɛl ta, dɛ fee so bela tama asɛ nomɛlbwa bɛ jemɛ, kɛ o ta wone sɔh. 25Belaa haah bɛl kwaa aa dɛ ir o bihaah nɛɛ no Yeesu waa dɛ ba guŋi o sie dɛ soŋo ŋɔ ó doŋi kwaa la le o bihaah la nɛɛ tɛo. 26Haah la ta Juda te ɛɛ, kɛ lola bini te, Siiria harɛ bobɛl baa dɛ yerɛ bela Finiisia tee. 27Waa wola Juda te ɛɛ la, Yeesu ŋɔ o be ŋɔ, "A chɛ kɛ bechale di kwaa vagre mɔɔ nyootena ge di. Aa were kɛ ba kpɔ bechale kondikwaa tɛ nyootena." 28Haah la wono no a mun dɛ ŋɔ, "Kpelaa he ŋɔ, Nomoa, kɛ nyootena aa bechale kondikompugrere aa leera la ge di aa?" 29Yeesu ŋɔ, "Waa nɔ haa bola nɔ nomanta, kaa dem. Kwaa la le he bihaah la nɛ." 30O la dem dɛ kwaa la le o bihaah la nɛ, asɛ o chɔ mpa ta. 31Yeesu berɔ le Taaya harɛ dɛ kpɔ Sidon ne Dekapɔles harɛ dɛ kaa Galilia Moo la ta. 32Nɛra bane kpɔ baa bɛl waa wola waa no, wobol waa do kpegri tɛo ba Yeesu be, dɛ soŋo ŋɔ ó kpɔ o nɔn dawɛ o nɛɛ ásɛ wɛɛ no waa dɛ won waa bola. 33Yeesu kpɔ baa la le nɛra la baah ta, o ne o gbo ka che bokɛre, asɛ o kpɔ o nonie do baa la deŋna bini, dɛ berɛ ta nentane dɛ kpɔ lege o nyondoŋe, 34dɛ ha sie nyiŋi nyundua dɛ hwee fuuu, dɛ ŋɔ baa la be ŋɔ, "Efata!" O munii kɛŋɔ, "Pili." 35Bug la ta la, baa la deŋna pilo, asɛ o nyoa chaa, o won waa bola kɛrɛdɛ. 36Yeesu aa chah baa la tonɛ la, o kah nɛra la ŋɔ ba bɛ nomɛlbwa be ŋɔ. Waa dɛ kah ba la, ate taa ba taa bol waa la kwara. 37Belaa nɛra baa noa la nyoa kpo taeh, ba ŋɔ, "O ɛ wobɛlbwa kɛrɛdɛ, hale o gelɔ amumure ɛɛ no wa, dɛ won waa bola."

will be added

X\