Maak 4

1Yeesu berɔ la Galilia Moo la nyoa dɛ kaa bagle nɛra wa. Nɛra baa chega baro la warɔ, anomanta o jo gbera bini dɛ ka so nebaah tama, asɛ nɛra la ge che baŋ. 2Belaa o kpɔ sɛgla dɛ bol waa chag ba ŋɔ, 3"Hɛ́ɛ no. Baa bɛlee ira dɛ kaa merɛ mea. 4Waa ka dɛ merɛ mea la, ane lee ŋwɛnɛ nyoa, asɛ jumbii ba tɔɔ di. 5Asɛ ane ge lee bwetala ta dɛ le warane. Teera aa wola toole bela kohona la, a lune ta wone kaa bini. 6Belaa wee aa lɔa la, a jwalɛ dɛ serewe. 7Ane lee sɔɔhne baah dɛ le, asɛ sɔɔhne la kpeg dɛ lawa, a ta wone ɛ. 8Asɛ anɔ la aa lee harɛdɛɛge ta la le, dɛ do wer dɛ ɛ. Ane ma bie fifraatoro, ane ma fifraanumɛl, asɛ ane ge ma lafare." 9Anee Yeesu ŋɔ, "Nomɛlbwa waa dɛ nyin dɛ no la, ó no." 10Aa ka Yeesu ne o habɔteŋra la ne nɛra baa dɛ teŋɛ o nɛɛ la, ba bɔɔro sɛgla la mun. 11Anee Yeesu ŋɔ ba be ŋɔ, "Korowii ta o Kora bini wobɛlbwa kpɔe sɔh he te. Kɛ nɛra baa kaa la te, sɛgla nee mɛɛ ba waa ba be bola, ásɛ a ɛ gɛ baa chwera ŋɔ, 12'Baa nyiŋuu kohona, kɛ baa a mun jema ba. Baa noo kohona, kɛ baa a jema ba, dɛkalkɛ baa ba liire chara ba bwa, ásɛ Korowii kpɔ ba wechɔga kɛ ba.' " 13Belaa Yeesu bɔɔ ba ŋɔ, "He ta sɛgla la mun noɛ yaa? Dɛ he ta onɔ mun noɛ yaa, ɛrɛɛ hɛɛ ba ɛɛ dɛ no sɛgla bwa mun nɔ? 14Nɛn la waa dɛ merɛ kwaa la, o chegɔ tɛ naate waa dɛ bol Korowii Wa. 15Asɛ nɛra baa dɛ no Waa la bane do kɛ mea la aa lee ŋwɛnɛ nyoa jumbii tɔɔ di la, dɛkalkɛ ba baa no Korowii Waa la aa, bug la ta dɛ Bɔnsam baa laa kpɔ ba nyu bini. 16Nɛra baa dɛ no Waa la bane ge do kɛ mea la aa lee bwetala ta bela teera aa wola toole kohona kɛŋɔ a lune won kaa bini la, dɛkalkɛ ba baa no Korowii Waa la, dɛ ba sie lɛo. 17Kɛ Waa la aa wola ban joogɛ la gelɔ aa won ba nyu bini ka. A chegɛ Korowii Waa ta waane puu ba aa, dɛ ba horɔ. 18Asɛ nɛra baa dɛ no Waa la bane ge do kɛ mea la aa lee sɔɔhne baah la, 19dɛkalkɛ ba baa no Korowii Waa la, kɛ dɛ ba soga bini ne kondɔɔh waa ne wepuu aa lɔ harɛ nɔ ta begre ba sie, baa gelɛ Waa la ɛɛ dɔ tɔnɔ. 20Nɛra baa dɛ no Waa la bane ge do kɛ mea la aa lee harɛdɛɛge ta dɛ le, asɛ dɛ ma fifraatoro ne fifraanumɛl ne lafare la, dɛkalkɛ ba no Korowii Waa la aa, ba dɛ kpoŋe a bini, dɛ gel a dɔ tɔnɔ." 21Yeesu bɔɔ ba ja ŋɔ, "Ba choŋi kandea dɛ kpɔ kon dɛɛ pi o ta kɛɛ dɛ kpɔ dɛɛ do mpa lɔga ɔ? Kon ta laa ba kpɔ dɛɛ chɔŋaa? 22Komɛlbwa waa sɔah ɛɛ le bochaahnee nɛra nao. Waa bwa baa tɔ a ta ɛɛ ba leo nɛra jemɛ. 23Anomanta nomɛlbwa waa dɛ nyin dɛ no la, ó no." 24Yeesu bolɔ ŋɔ, "Hé pese waa nɔ haa noa nɔ kɛrɛdɛ, dɛkalkɛŋɔ kpelaa ba ŋɔ, 'Kon haa kpɔa magɛ kwaa tɛ he dɔŋ la tentenee baa ba kpɔe magɛ tɛ he ge la, dɛ berɛ jae ane.' 25Nɛn waa dɔa la, baa jao anee, asɛ nɛn waa wola komɛlbwa dɔe la, tama kwaraa waa dɔa la ɛɛ le o nɔn taa." 26Yeesu ŋɔ, "Korowii Kora do kɛ baa bɛl waa du kwa, 27asɛ dɛ chɔ, dɛɛ ir tɔpere bɛlbwa, asɛ kwaa la le. O ta jemɛ gɛ aa ɛa a le. 28Harɛ laanee gela a le dɛ kpeg dɛ nɔnɛ. 29Belaa kwaa la aa ɛa dɛ be la, o kpɔ kere ka koma, dɛkalkɛŋɔ dɛ a koma telo." 30Anee Yeesu ŋɔ, "Bɔkwa konee yaa ba kpɔe dɛ magɛ Korowii Kora laɔ? Sɛgla besoo yaa ba kpɔe bagle o mun ɔ? 31O waa tamaa won yɛɛra kɛŋɔ baa bɛl aa ira dɛ kpɔ mastad bii dɛ ka du. O do jegaa ken gwaa harɛ nɔ ta kwaa bwa bie. 32Kɛ o baa le dɛ kpeg aa, o kan gwaa konduula bwa, dɛ pegri kpaljena, asɛ jumbii sɔh kɔne do o papooni lɔgre." 33Gɛɛ Yeesu kpɔ sɛgla nɔ bwa dɔŋa dɛ bol waa ka tel kɛ nɛra la aa wona no a mun. 34Sɛgla gbo nee wɛɛ bol waa ba be. Kɛ o ne o habɔteŋra la gbo te, o dɛ bag ba a bini. 35Awola tenten jɔmɔra ne la, Yeesu ŋɔ o habɔteŋra la be ŋɔ bá gel ba kaa Galilia Moo la baŋ. 36Belaa ba gel nɛra la bela dɛ jo gbera Yeesu aa lɔ o bini la bini, asɛ dɛ kpɔ gbeni la aa lɔ bela la ane ja. 37Baa dɛ kaa la, bug la ta peujen bɛl tao dɛ kpɔ nehaŋma dɛɛ jo ba gbera la bini wɛɛ ba sui. 38Dɛ Yeesu te serɛ o kapuri dɛɛ chɔ dom gbera la mun ta. Anee o habɔteŋra la chumu dɛ ŋɔ, "Nomoa, yaa dɛ ba mora nɔ, he waane laa kɛɛ?" 39Asɛ Yeesu ir dɛ kɔr peu la ŋɔ, "Gel!" Dɛ berɛ ŋɔ nehaŋma la be ŋɔ, "Hel!" Belaa peu la gel, asɛ bɔr hel kerker ken. 40Yeesu bɔɔ o habɔteŋra la ŋɔ, "Oo! Ɛrɛɛ hɛɛ ɔmɛ kohona gɛ nɔɔ? Ba le saŋ nɔ haa men yarada aa?" 41Ba bwara hwah o waa taeh, ba bɔɔ dɔŋa ŋɔ, "Nɛn besoo siwii nɔ, peu ne nee ɛɛ no o wobol nɔɔ?"

will be added

X\