Maak 2

1Tɔpere bɛl habɔɔ la, Yeesu berɔ la Kapeeneɔm. Belaa o waa perɛ bwɛɛ la ta kɛ o lɔ dem. 2Anomanta nɛra cheme dem bela kɛrɛdɛ, dɛ bɔr toole doonyoa kwaraa, asɛ Yeesu bol waa bag ba. 3Belaa nɛra banaarɛ bane kpɔ baa bɛl waa kuuga dɛɛ ba Yeesu be. 4Bɔr aa fara la, ba ta wone kpɔ baa la ba o be. Anee ba teeh dea la dɛ forɛ sal la bela Yeesu aa chega la, dɛ kpɔ baa la ne o kalaŋ waa chɔ o ta la dɛ che bela dɛ kpɔɔ bil Yeesu sie. 5Belaa Yeesu aa naa kɛ ba yaradao kɛrɛdɛ la, o ŋɔ baa la waa kuuga la be ŋɔ, "N bie, n kpɔ he wechɔga kɛɛ." 6Tɔn Jerema baa soge bela la lii ba nyu bini dɛ ŋɔ, 7"Ɛrɛɛ o do dɛɛ bol waa gɛ nɔɔ? Korowii gboo won wechɔga kpɔe dɛ kɛ. Aa! O dɛ ɛ Korowii nɛnhɛla." 8Belaa Yeesu aa jemɛ waa baa liira la, asɛ o ŋɔ ba be ŋɔ, "Ɛrɛɛ hɛɛ lii gɛ nɔɔ? 9Maa ŋɔ o be ŋɔ n kpɔ o wechɔga kɛo nɔ, ne kɛŋɔ maa ŋɔ o be ŋɔ ó ir dɛ kpɔ o kalaŋ valɛ, a bini umee kpega ɔ? 10Mɛɛ chagle heyaa kɛŋɔ n Nɛn Bie dɔ kpegri harɛ nɔ ta kɛ n kpɔ nɛra wechɔga kɛ ba." 11Belaa o ŋɔ weela te la be ŋɔ, "No n be! Ir kpɔ he kalaŋ kaa dem." 12Asɛ baa la ir bug la ta dɛ kpɔ o kalaŋ nɛra la bwa siwi ta bela dɛ kaa. A gelɔ nɛra la bwa nyoa kpo, asɛ ba kpɛɛ Korowii ŋɔ ba ta a dɔŋa nae bwa. 13Yeesu berɔ la Galilia Moo la nyoa. Belaa nɛra warɛ dɛ ba o be, asɛ wɛɛ bag ba wa. 14Waa vala baa kaa la, o na baa bɛl waa soge o toma ta dɛɛ lɛ lampoo, baa yerɔ Lewi, o mɛɛ ge sɔne Alfeɔs. Anee Yeesu ŋɔ o be ŋɔ, "Ba teŋɛ n nɛ." Asɛ o ir dɛ teŋɛ o nɛ. 15A habɔɔ la, Yeesu la Lewi dem dɛ ka so dɛɛ di kwa. Lampoo lɛɛra baa dɛ bɔ nɛra apoo ne wechɔg-ɛɛra yon warɛ teŋɛ Yeesu nɛ. Ba ne Yeesu ne o habɔteŋra la so tig ta. 16Anee Farisii tena Tɔn Jerema la aa na Yeesu ne lampoo lɛɛra ne wechɔg-ɛɛra la aa pɛa dɛɛ di kwaa la, ba bɔɔ o habɔteŋra la ŋɔ, "Ɛrɛɛ o ne gɛ nɛra nɔ pɛ dɛɛ di kwaa nɔɔ?" 17Yeesu aa no gɛ waa nɔ la, o ŋɔ ba be ŋɔ, "Weela tenaa hiah tɛɛga te, bokpega tena laa." Dɛ ŋɔ, "Nɛra baa dɛ lii ba te nɛndɛɛga waa laa n ba. Wechɔg-ɛɛra waa n ba ásɛ ba charɛ ba liire." 18Awola bɛl, Jɔn waa dɛ sɔ nɛra Korowii nee la habɔteŋra ne Farisii tena vɔwɛ ba nyoa, asɛ nɛra bane ba Yeesu be dɛ ba bɔɔro ŋɔ, "Ɛrɛ waa Jɔn habɔteŋra ne Farisii tena habɔteŋra te ɛɛ vɔwɛ ba nyoa, asɛ he habɔteŋra nɔ te aa wola nyoa vɔwɛ nɔɔ?" 19Anee Yeesu sɛg ba dɛ ŋɔ, "Baa lawɛ hanfale dɛ yerɛ o daamanar ŋɔ bá ba lɛ ba sie nɔ, baa berɔɔ so lɔr aa? Baa lɔree so. 20Kɛ tɔpere bɛl ɛɛ bao kɛŋɔ baa lawɛ hanfale jaa laanee le ba bini. Gɛ saŋ la te, baa vɔwɛ nyoaa. 21"Baa yafale yakwara kpɔe dɛɛ tɔ yabene bɔɔ. Gɛ laa aa, onfale la ɛɛ kɛɛroo le yabene la ta, asɛ bɔɔ la berɛ do kan kohona. 22"Baa senfala kpɔe dɛɛ do loŋbena aa kɔɔhna bini dɛɛ tɔ a nyoa. Dɛ he ɛ gɛ naa, senfala la baa peraa, aa do kpegrii dɛ pere loŋa la a chɔg, asɛ sen la fuge. Senfala chɛ loŋfala." 23Awola Ona Tɔpere bɛl, Yeesu ne o habɔteŋra kpɔ mea koo bɛl ta, asɛ o habɔteŋra la kuugi mea la ane. 24Anee Farisii tena bane aa naa la, ba ŋɔ Yeesu be ŋɔ, "Nyiŋi na! He habɔteŋra la dɛ ɛ toma dɛɛ to ya Ona Tɔpere mmara la." 25Belaa Yeesu ŋɔ, "He ta gɛ ya naa Devid aa ɛa saŋ la Abiata aa ɛ Sɔfore Nomoa la kure kɛɛ? Gɛ saŋ la Devid nyao, asɛ lɔr ɛɛ kpo o ne nɛra baa ja o nɛɛ la. 26O la Korowii Dea dɛ ka di paanoo aa ɛ Korowii kwa, nomɛlbwa fe aa wola ŋwɛnɛ dɔe kɛ o di la atane kɛ Sɔfore la gbo, asɛ o di dɛ tɛ o nɛra baa ja o nɛɛ la ge ba di." 27Anee Yeesu ŋɔ ba be ja ŋɔ, "Nɛn waa Korowii cheg Ona Tɔpere. Ona Tɔpere te waa laa o ta nɛn. 28Anomanta n Nɛn Bie dɔ Ona Tɔpere gba kpegri."

will be added

X\