1 Tɔɔ aa pera chɔmbibi ne la, Sɔfonomonome ne bwɛɛ nomonome ne Tɔn Jerema bwa, Juda tena nomonome baa dɛ nyiŋi ba waa bini la te bwa, chemo dɛ vɔrɔwe Yeesu vɔrɔwa, dɛ vɔrɔwe o nɔɔra, dɛ kpɔɔ ka tɛ Room nomoa waa dɛ nyiŋi bela harɛ asɛ baa yerɔ Paelet la. 2 Belaa Paelet bɔɔro ŋɔ, "Henee Juda tena kooro ɛ?" Asɛ Yeesu ŋɔ, "Anee he bol la." 3 Sɔfonomonome la teŋe nyosone dawɛ Yeesu nɛ. 4 Asɛ Paelet bɔɔ Yeesu ŋɔ, "He ta wobɛlbwa dɔe dɛ́ bol aa? Haa won chaŋe wedamanta nɔ bwa baa kpɔa dɛɛ dawɛ nɔ bini ane aa?" 5 Yeesu ta wobɛlbwa chaŋɛ, asɛ Paelet nyoa kpo. 6 A gɛ tɔpejen la baa tel aa, wechɔg-ɛɛ te bɛlbwa baa doo dea asɛ bwɛɛla la ŋɔ bá leo ta la, a chɛ kɛŋɔ ba leo ta. 7 A gɛ saŋ la, nɛra bane fa vuugi Room nomonome baa dɛ nyiŋi bela harɛ la dɛ kpoo nɛra a gɛ waa la ta. Dɛ baa bɛl baa dɛ yerɔ Barabas ja a gɛ nɛra nɔ nɛ, asɛ ba do ba bwa dea. 8 Asɛ nɛnlaa la ba Paelet be dɛ ba ŋɔ o be ŋɔ ó le wechɔg-ɛɛra la bɛl ta, gɛ baa dɛ ɛ bena bɛlbwa la. 9 Belaa o bɔɔ ba ŋɔ, "Ń foo Juda tena kooro la ta kɛɛ?" 10 Dɛ o gbabir jemɔ kɛŋɔ bɔweela waa Sɔfonomonome la che Yeesu nɛɛ pɛɛpɛɛ dɛ kpɔɔ ba o be la. 11 Jaah dɛ Sɔfonomonome la do nɛnlaa la bwa ŋɔ bá ŋɔ Barabasee baa nyin, dɛ ŋɔ Páelet leo ta. 12 Belaa Paelet bɔɔ ba ŋɔ, "Aah ɛrɛɛ he ŋɔ ń ɛ baa la haa dɛ yerɔ Juda tena kooro laɔ?" 13 Asɛ ba bwa kparɛ si ŋɔ, "Kpaaro pɛl dagagre ta!" 14 Anee Paelet bɔɔ ba ŋɔ, "Ɛrɛɛ yɔ? Bɔkwa wechɔga o ɛɔ?" Ate dɛ ba berɔ kwaa si kohona ŋɔ, "Kpaaro pɛl dagagre ta!" 15 Paelet aa wola nyin kɛŋɔ nɛnlaa la bwaawee ir o nɛɛ la, o le Barabas ta tɛɛ ba dɛ gel ba lɔɔ Yeesu bampɔrɔ ŋwɛɛra ne mɔɔ dɛ kpɔɔ tɛ ŋɔ bá ka kpaaro pɛl dagagre ta. 16 Asɛ soojare la kpɔ Yeesu le kaa Paelet dem baah dɛ yerɛ ba bala soojare bwa, 17 dɛ kpɔ yaswɛm bɛl kɛŋɔ ba bela kooyal tɔ Yeesu, dɛ kpɔ sɔɔhne sɔh koogbɛrɛ piu, 18 dɛ ba dɛ guŋi o sie dɛɛ si, "Woowo, Juda tena kooro!" 19 Asɛ ba kpɔ chweremi dɛɛ cha o nyu, dɛ ta nentane dɛɛ ta o nɛ, dɛɛ guŋu harɛ kɛŋɔ baa dɛ ɛ kooro la. 20 Baa mugli o baah tonɛ la, ba laa yaswɛm la foo o bwara ta, dɛ kpɔ o gbagba laala la doo, dɛ kpɔɔ le dɛɛ kaa dɛ́ ka kpaaro pɛl dagagre ta. 21 Baa dɛ kaa la, ba kaa na Sairini baa bɛl baa dɛ yerɔ Seemɔn, dɛ o le bobɛl dɛɛ ba. Ba ɛgro o lɛ Yeesu dagagre la che. Dɛ a gɛ Seemɔn la biirii Alɛksanda ne Rufus. 22 Asɛ ba kpɔ Yeesu kaa bela baa dɛ yerɛ Gɔlgɔta la. Gɔlgɔta munii Nyuhog Bɔr. 23 Asɛ ba kpɔ tɛɛga ane baa dɛ yera mire aa wona dɛɛ sɔɔh bwadabii wee nyoa do sen ta dɛ kpɔ tɛ Yeesu ŋɔ ó nyɔ, asɛ o vɛh nyɔe. 24 Ba foo o laala, dɛ kpaa o nɔɔra ne o nakpale pɛl dagagre ta. Dɛ soojare la dɛ nyin Yeesu laala bɔna, dɛ ta chacha mɔɔ dɛ́ won jemɛ laala ba bɛlbwa aa di. 25 Koola nenyɔɔ saŋee ba kpaa Yeesu pɛl dagagre ta. 26 Ba chwerɛ o wechɔga waa ɛa ba koh a waa kpoo la pɛl o dagagre la ta. A gɛ waa laanee, |scJUDA TENA KOORO|d. 27 Ŋwɛɛra banɛɛ ba kpaa pɛl dagagra ta ja Yeesu nɛ. Bɛl sagɛ o dig ta, bɛl ge sagɛ o gal ta. 28 Asɛ waa baa chwera Korowii Tɔn bini ŋɔ "Ba yerɔ wechɔg-ɛɛ" la ɛ kasinteŋ. 29 Nɛra baa kpɔ bela bɔr baa kaa la chɛgre Yeesu dɛɛ mugli o baah ŋɔ, "Chwa! He nɛn haa pagre Korowii Dea dɛ berɛ kpɔ tɔpera atoro mao laanee nɔ naa? 30 Lɛ he te dɛ tu harɛ yá na!" 31 Gɛɛ Sɔfonomonome ne Tɔn Jerema la mugli o baah dɔŋa be dɛ ŋɔ, "Ao! Nɛra gboo o won lɛɛ, kɛ waa won lɛ o te. 32 He nɛn haa ŋɔa henee Israel tena kooro Kristo la Korowii aa bagɛ nyoa ŋɔ wɛɛ tomɔɔ ásɛ o ba lɛ yaa la, le dagagre la doa tu harɛ yá na dɛ won yaradae." Asɛ ŋwɛɛra baa kpaa ba pɛl dagagra ta ja o nɛɛ la gee chɛgro. 33 Wee aa baa che nyubaah la, bɔr biro jumaa ken dɛ ka tel wekee saŋ mɔɔ bɔr berɛ chaah ja. 34 Wekee saŋ aa tela la, Yeesu do lɔŋɔ kpegri nɛɛ dɛ ŋɔ, "Eli, Eli, lama sabaktani?" O munii kɛŋɔ, "N Mɛɛ Korowii, n Mɛɛ Korowii, ɛrɛɛ he chwa mɛ nɔɔ?" 35 Nɛra baa chegɛ bela la aa no gɛ la, ba ŋɔ, "Na, Elaejaa wɛɛ yerɛ la!" 36 Asɛ bɛl chwa dɛ ka kpɔ konjɔgɔjɔgɔ waa won nee lɛɛ ka li sennyɛga ta dɛ kpɔ toh daa ta tɛo ó nyɔ, dɛ ŋɔ, "Hé gel ya na, dɛ Elaeja ɛɛ ba leo dagagre nɔ taa yaa?" 37 Belaa Yeesu do lɔŋɔ kohona, asɛ o doma le o sewɛ. 38 Asɛ yal waa teŋe Korowii Dea baah ta la pere anɛ le nyundua ba ta harɛ. 39 Soojare lafa nomoa waa dɛ daah Yeesu aa na gɛ Yeesu hweera aa teŋa la, o nyoa kpoo, asɛ o ŋɔ, "Korowii Biee baa nɔ kpela!" 40 Dɛ haahna bane ge chegɛ bojaŋ dɛɛ nyiŋi. Ba bini banee Mɛɛre waa le Magdala la, ne Jemsbechala ne Josis nya Mɛɛre, ne Salome. 41 A gɛ saŋ waa lɔ Galilia harɛ la, dɛ a gɛ haahna nɔɔ daa kondikwaa dɛɛ tɛo. Dɛ haahna bane ba faa teŋɛ o nɛɛ pirim ba Jerusalam la bwa lɔ bela. 42 Awola tɔpere la taa baa nyin ba kwaa bwa dɛɛ cheg ásɛ dɛ tɔɔ peraa ba di Ona Tɔpere la. 43 Dɛ Josef waa le Arimatea la ɛ ba bela nomonome la bini nɛn nɛra bwa aa dɛ tɛo duure. O ge dɛ kpa saŋ la Korowii aa di kora dɛ lɛɛ ba la. Awola jɔmɔra la, o lɔ bambile dɛ la Paelet be dɛ ka soŋo ŋɔ ó tɛo ŋwɛnɛ ó ka kpɔ Yeesu lale la. 44 Asɛ a pigri Paelet kɛŋɔ Yeesu aa dena sewɛ la. Anee o yerɛ soojare lafa nomoa la dɛ bɔɔro ŋɔ, "Yeesu sewɔ kpela aa?" 45 Nomoa la aa sɛah ŋɔ Yeesu sewɔ la, Paelet tɛ Josef ŋwɛnɛ ŋɔ ó ka kpɔ o lale la. 46 Asɛ Josef yawɛ yapoŋ dɛ ka laa Yeesu kpɔ dagagre la doa dɛ kpɔ yapoŋ la fɔrɔwo dɛ hugo. Bwe bɔɔ bɛl baa kwiu kɛŋɔ dea binii ba hugo, dɛ gbili bwe tɔ bɔɔ la nyoa. 47 Mɛɛre waa le Magdala la ne Josis nya Mɛɛre na bela baa hugo.
