Maak 13

1Yeesu aa dɛ le Korowii Dea la, o habɔteŋra la bɛl ŋɔ, "Nomoa, na bwea baa kpɔa ma deene nɔ aa bara gɛ. Deene la kakan bee! A wer ge laa nɔ!" 2Anee Yeesu ŋɔ, "Kɛ he na dejena nɔ kenɛ? Ba ta ɛɛ pagre a bwaa kwara, asɛ a bwe beŋkpoŋ kwara aa lee do dɛ ta chɔŋɛ o dɔŋ ta kpa." 3Ba le Korowii Dea dɛ kaa Ɔlevere Bwe la bɔr. Asɛ Yeesu so bwe la doa dɛɛ nyiŋi Korowii Dea la, asɛ Pita ne Jems ne Jɔn ne Andriu gbo ba o be, dɛ ba bɔɔro ŋɔ, 4"Waa la haa bola la, saŋ besoo aa ba chiga ɔ? Bɔkwaa dɛɛ ba bagla kɛ gɛ waa nɔ chiga teloo?" 5Anee Yeesu ŋɔ ba be ŋɔ, "Hé nyiŋi kɛrɛdɛ asɛ nomɛlbwa bɛ heyaa negre. 6Nɛra ɛɛ warɔɔ dɛ kpɔ n sɔn ba dɛ ba ŋɔ banee men. Ba bɛlbwa ɛɛ ŋɔɔ onee Kristo la Korowii aa bagɛ nyoa ŋɔ wɛɛ tomɔɔ ó ba lɛ nɛra la dɛ negre nɛra pirim. 7"Dɛ he baa no laa yoi waa ne laa gbɔga bobɛlbwa ge aa, he bɛ gel a ɛ heyaa wepigra, dɛkalkɛŋɔ a chɛ kɛŋɔ a ɛ gɛ. A gɛ waa nɔ bwa chɛ kɛŋɔ a chig, dɛ wobɛlbwa jaga la ta tele mɔɔ. 8Bwɛɛre ne ba bwɛɛre dɔŋa ɛɛ yo laalee, koranar ge ne ba koranar dɔŋa ɛɛ yo dɔŋa. Harɛ ɛɛ jigri bobɛlaa, asɛ lɔr ge ba. A gɛ waa nɔ kaa chaa haah loltea wee o yon dɛɛ weo kɛ dɛ o lola ta tele mɔɔ la. 9"Hé gbagba ge nyiŋi kɛrɛdɛ. Baa larawe heyaa dɛ la he ne nomonome sie, dɛ lɔɔ heyaa cheremi deene bini. N nomanta hɛɛ che Abane nomonome ne koranar siinii dɛ bol Korowii Amanesoma la bag ba. 10Baa bol Amanesoma laanee bagle nɛwɛnyina bwa mɔɔ wobɛlbwa jaga la ba. 11Dɛ ba baa lawɛ heya, dɛ la he ne nomonome sie naa, he bɛ gel waa haa dɛ ba bola la hiah heya. A baa tel kɛŋɔ hé bol wa aa, hé bol wobɛlbwa aa le he nyoa la, dɛkalkɛŋɔ waa haa bol la aa he be lee ba. Korowii Domadɛɛge la bee aa ba lee. 12"Nɛra ɛɛ le ba gbagba lolanaree tɛ ŋɔ bá kpoo ba, baala ɛɛ le ba gbagba biirii tɛ ŋɔ bá kpo, asɛ bii ge ir che ba nyare ne mɛɛnanar nɛɛ dɛ gel baa kpoo ba. 13Nɛra bwa ɛɛ koh n waa hah heya. Kɛ naate waa dɛ ba wona dɛ lawɛ bambile ka tonɛ la, wɛɛ dɔ o nyuu. 14"Hɛɛ na konchɔgechɔge laanee kɛŋɔ o chegɛ bela aa wola chɛɛ kɛŋɔ ba nao. (Bonɔ kpegri. Anomanta nomɛlbwa waa kuro la kwaa nyiŋu kɛrɛdɛ.) He baa na gɛ naa, a chɛ kɛŋɔ Judia harɛ tena chwa ka nyin sɔɔhbɔr ba bwea la ta. 15Naate waa soge o sal dea doa la ge, o bɛ berɛ koh o te ŋɔ o dɛ tu dɛ jo dea dɛ́ kpɔ komɛl. A chɛ kɛŋɔ o chwa dɛ dɔ o nyu. 16Nomɛlbwa waa lɔ koo ta la bɛ berɛ la dem dɛ́ ka kpɔ o yal. 17Ei! Aa do kpegrii tɛ tekpoŋra ne haahna baa kpoŋe bechasɔɔhne a gɛ saŋ nɔ noo! 18Hé soŋe Korowii asɛ a gɛ waa nɔ bɛ waa saŋ chig oo! 19Dɛkalkɛŋɔ a gɛ wekpega nɔ dɔŋa ta ɛɛ bwa. A ɔma! Dɛ den le saŋ la Korowii aa ta harɛ la dɛ kpoŋe ba le fini nɔ, nɛwɛnyini ta a dɔŋa nae bwa. A gɛ waa nɔ ɛo waa, a dɔŋa aa ɛɛ ba kpa. 20Dɛ Korowii fe ta tɔpera la ane teŋe ta aa, nomɛlbwa fe aa lee ba. Kɛ o koh o nɛra waa chal ba ba teŋɛ o nɛɛ la waa dɛ teŋe tɔpechɔga la ane ta. 21"A gɛ saŋ la bane ɛɛ dɛɛ ŋɔɔ, 'Kristo la Korowii aa bagɛ nyoa ŋɔ wɛɛ tomɔɔ ásɛ o ba lɛ yaa laanee nɔ!' Asɛ bane ge ŋɔ, 'On ka lɔ le la!' A gɛ waa nɔ bwa baa ɛ aa, he bɛ a bɛlbwa yarada, 22dɛkalkɛŋɔ nɛra ɛɛ bao dɛ ba teŋe nyosone ŋɔ Kristo laanee ban, asɛ bane ge ŋɔ Korowii keameree ban. Baa baa ɛ nyokpowaa ne bebeewaa dɛɛ nyin bɔr dɛ́ negre nɛra Korowii aa chal ba la kwara. 23Hɛ́ɛ nyiŋi he te kɛrɛdɛ! N dɔɔ bagle waa aa dɛ ba ɛɛ mɔɔ tɔpere la ba. 24"A gɛ wekpega nɔ baa ɛ dɛ kaa laa, wee aa bɔr chaahna ba kpa, korobie ge aa bɔr chaahna ba kpa. 25Weweela dɛ ba nyundua lee dɛ lee harɛ, asɛ Korowii doa bwa yiigi dɛ chɔg. 26Belaa baa ba n Nɛn Bie nae kɛŋɔ maa lɔ baama bini dɛɛ ba kpegri waa wola dɔŋ dɔe ne jirima ne. 27Mɛɛ tomɛ nyundua toromaa harɛ nɔ bobɛlbwa bá valɛ lawɛ n nɛra maa chal ba la bwa ba pɛ. 28"Hé kpɔ pur daa nɔna hweli wa. O baa fogre dɛɛ le papo-lwɛɛne, dɛ nomɛlbwa jemɔ kɛŋɔ bɔwɔb saŋ telo. 29Gɛɛ dɛ he ba dɛ na a gɛ waa nɔ naa, hé jemɛ kɛŋɔ tɔpere la tuuhno tel dɛɛ nyin joe. 30Kasinteŋ, a gɛ waa nɔ bwa dɛ ba ɛɛ mɔɔ fini nɛra nɔ bwa serewe. 31Nyundua ne harɛ ɛɛ chɔgoo. Aa lee ba do kpa. Kɛ n waa la te kpegri ɛɛ do lee dɛɛ la saŋ bɛlbwa. 32"A gɛ tɔpere nɔ te, nomɛlbwa aa tɔpere la bala saŋ jemɛ. Korowii toroma baa lɔ nyundua la kwara aa tɔpere la jemɛ. O bie la gbabir aa jemɛ. O gboo jemɛ tɔpere la. 33Hɛ́ɛ nyiŋi kɛrɛdɛ, hɛ́ɛ do dɛɛgɔ, dɛkalkɛŋɔ haa tɔpere la jemɛ. 34Aa ɛo kɛŋɔ nomoa bɛl aa dɛ ba bobɛl kaala dɛ bagle o bonɔɔna tomare, dɛ ŋɔ baa waa dɛ nyiŋi o dem la ta be ŋɔ wɛ́ɛ nyiŋi o ta kɛrɛdɛ la. 35Hɛ́ɛ nyiŋi kɛrɛdɛ, dɛkalkɛŋɔ he ta wone jemɛ tɔɔ la wee dem te la aa dɛ ba bala. Bɛl lole jwaanaa wɛɛ ba bala. Gɛ laa ge aa, harambaŋa ne. Bɛl lole o ta jabala siiga saŋ balaa, chɔɔbɔree wɛɛ ba bala. 36He bɛ gel o ba pigri heya, dɛ he dɛ chɔ doromi. 37Waa nɔ maa dɛ bol he be nɔ, nɛra bwa bee mɛɛ ŋɔ la. Hɛ́ɛ nyiŋu ŋwɛnɛ kɛrɛdɛ!"

will be added

X\