Maak 12

1"Baa bɛlee parɛ kwaa ane baa kpɔa dɛɛ daa sen, dɛ ke a gɛ koo la, dɛ kwaa bɔr baa dɛɛ harame a nee dɛɛ do, dɛ chigri jɛŋla bela, bá so o ta dɛɛ daah koo la, dɛ kpɔ nɛra báa ɛ koo la toma, a koma telaa, ba dɔ ba bɔr. A habɔɔ la o kpɔ koo la tɛɛ ba bá nyiŋi o ta tɛo, dɛ kaa harɛ bɛl ta. 2Koma saŋ aa baa tel la, o tomɛ o bonɔɔ bɛl ŋɔ ó ka lɛ o dibɔr ba tɛo. 3Bonɔɔ la aa laŋa la, nɛra la lawɔ dɛ lɔɔro dɛ doŋu o kaa. Ba ta on komɛlbwa tɛɛ o kaa. 4Koote la berɔ tomɛ o bonɔn-nɛɛte, asɛ ba lɔɔ o ge dɛ doo bol o nyu ta dɛ ɛo wilewile ken. 5Asɛ koo te la berɛ tomɛ o bonɔɔna la bɛl ja, asɛ nɛra la lawɔ dɛ kpoo. Gɛɛ o tomɛ toroma bane ja, asɛ ba lɔɔ bane dɛ kpo bane ge. 6"Dɛ nɛn waa kaa ó tomɛ bwaa o gbagba bie waa dɛ nyinu gwaa komɛlbwa. O bonɔɔna la bwa aa baa tonɛ la, o bie laanee o ka mun tomɛ dɛ ŋɔ, 'Ba na n bie nɔ te naa, baa heehroo.' 7Nɛra la aa na o bie la la, ba den ŋɔ, 'Yoowa, baa la gbagba biee la. O mɛɛ toole naa, on dɛɛ ba o kapɛrɛ dii. Hé gel ya kpoo, asɛ dɛ o mɛɛ baa sewaa, dɛ kwaa la ɛ ya kwa.' 8Ba lawɛ bie la dɛ kpoo dɛ kpɔɔ vigri koo la baŋ." 9Asɛ Yeesu bɔɔ ba ŋɔ, "Ɛrɛɛ hɛɛ lii kɛŋɔ a gɛ koo te nɔ ɛɛ ɛo wɔ?" Dɛ ŋɔ, "Wɛɛ ba kpo a gɛ nɛra laanee dɛ kpɔ koo la do nɛnfala nɔn ta. 10Ba chwerɔ do Korowii Tɔn la bini ŋɔ, 'Bwe la mamaala aa vɛoh dɛ liiru konsala laanee bera ba lawɛ dea la kpoŋe la. 11Korowiirii ɛa gɛ, a ɛ nyokpowa.' He ta a gɛ waa nɔ kure ka aa?" 12Yeesu aa bol a gɛ waa nɔ dɛ kpɔ sɛgle la, dɛ Juda tena nomonome la dɛ nyin bɔr dɛ́ lawɔ, dɛkalkɛŋɔ dɛ ba jemɔ kɛŋɔ banee o sɛgle. Kɛ dɛ ba dɛ ɔmɛ nɛnlaa baa lɔ bela la, dɛ gelo dɛ kaa. 13Baa kaala la, ba kaa tomɛ Farisii tena ne Hɛrɔd habɔɔ tena bane ŋɔ bá ba hagre Yeesu bela webɔɔre ne dɛ lawɔ. 14Asɛ ba ba ŋɔ o be ŋɔ, "Nomoa, ya jemɔ kɛŋɔ he dɛ bol kasinteŋ. He ta waa bolɛ dɛɛ ɔmɛ a habɔɔ kɛŋɔ a dɛ do bane som, kɛɛ a dɛ we bane bambile nɔ. Haa nɛra sie bɔr nyiŋi dɛɛ bol waa kɛŋɔ bɛl ɛ kooro kɛɛ nomoa kɛɛ bechala nɔ. Korowii ŋwɛnɛɛ hɛɛ bagle nɛra kasinteŋ ne. Webeŋkpoŋii yaa nyin ya jemɛ. Onee kɛŋɔ ya mmara nɔ dɛ tɛ yaa ŋwɛnɛ kɛŋɔ ya bɔ lampoo dɛɛ tɛ Room koojen Siisa la aa, kɛɛ waa yaa ŋwɛnɛ tɛ?" 15Dɛ Yeesu jemɛ ba webɔɔre la mun dɛ ŋɔ, "Ɛrɛɛ hɛɛ hagre mɛ bela nɔɔ? Hé kpɔ suuga bwe ba ń na." 16Anee ba kpɔ bɛl tɛo, asɛ o bɔɔ ba ŋɔ, "Ume nyu ne o sɔnee dawɛ suuga nɔ ta nɔɔ?" Asɛ ba chaŋe ŋɔ koojen Siisa laanee. 17Asɛ Yeesu ŋɔ ba be ŋɔ, "Oo. Amɔ hé kpɔ kwaa aa ɛ Siisa kwaa la tɛo, dɛ kpɔ kwaa aa ɛ Korowii kwaa la tɛ Korowii." Asɛ o waa ɛɛ ba anebɛlbwa. 18Saduki tena ba Yeesu be. Dɛ baa yarada kɛŋɔ nɛn sewaa, wɛɛ berɔɔ ir ja. 19Ba baa bɔɔ Yeesu ŋɔ, "Nomoa, Mosis fa chwerɛ mmara bɛl tɛ yaa ŋɔ dɛ baa sewɔ gel o haah dɛ o ta bii dɔe yaa, a chɛ kɛŋɔ o nime kɛɛ o dɔɔ kpɔ haah la mo dɛ logle bii, ásɛ a gɛ bii la ɛ lale la bii. 20Hahbeŋkpoŋ bibaala banuanɛɛ fa lole, asɛ o binomoa la ba mo haah dɛ ba sewɛ, dɛ o ta bie dɔe. 21Asɛ onla waa teŋɛ binomoa la nɛɛ la ge kpɔ haah la mo dɛ ba sewɛ, dɛ o ge ne o ta bie lolɛ. Gɛɛ bitooro te la ge mo haah la dɛ ba sewɛ, dɛ o ta bie dɔe. 22Bii la bwa mo haah la ka lɔ nyoa dɛ ba serewe, dɛ ba ta bii dɔe. A bwa habɔɔ la, haah la ge baa sewɛ. 23Aah dɛ nɛra bwa seo bini ira tɔpere la baa tel asɛ bibaala la bwa ir aa, ba bini umee dɛɛ ba haah la jaa ɛɛ yɔ? Ba nɛra banuanɛ la bwa gee fa moo." 24Belaa Yeesu chaŋ ba ŋɔ, "He kono kwaraa! He jemɛ kon la aa gela he koni aa? Haa wola Korowii Waa baa chwera ne o kpegri waa jemɛ la waa. 25Nɛra baa ir seo ta naa, baa soo kɛŋɔ Korowii toroma baa lɔ nyundua la, dɛkalkɛŋɔ baa haahna moe ba, baa jaranar ge yala ba. 26Nɛra seo ta ira ge la nɔ, dɛ he dɛ lii Mosis Tɔn bini waa ane aa dɛ bagle dawii fuih la wa aa, ba chwerɛ bela gɛ Korowii aa ŋɔ Mosis be ŋɔ, 'Menee Abraham Korowii ne Aesek Korowii ne Jekɔb Korowii.' 27Lala laa dɛɛ tomɛ Korowii, weeraa dɛɛ tomɔ. Anomanta he kono kwaraa!" 28Dɛ Tɔn Jereme bɛl ge ba bela dɛɛ no waa baa dɛ pɛɛro wɛɛ bagle a bini la, dɛ na kɛŋɔ waa la ŋwɛnɛ taa Yeesu bola la. O ge bɔɔ Yeesu ŋɔ, "Mosis Mmarare la bini umee ɛ onjen gwaa a bwa nɔ?" 29Asɛ Yeesu ŋɔ, "A bwa bini onjen laanee nɔ: 'Israel tena, hé no. N Naa Korowii nɔ habɔɔ dɔɔ bɛlbwa toole kpa. 30Hé nyin N Naa Korowii he bambile bwa, he hweera, he liire, ne he bokpega bwa ne.' 31Onjen waa teŋa nɛɛ laanee nɔ: 'Nyin he dɔŋ kɛ he gbagba.' Mmara bɛlbwa toole dɛ ɛ onjen dɛ gwaa anɛ nɔ." 32Asɛ Tɔn Jereme la ŋɔ Yeesu be ŋɔ, "Jam, he ɛ wa, Nomoa. He waa nɔ bwa ɛ kasinteŋ. Korowii beŋkpoŋ gboo lole. Komɛlbwa toole dɛ dɔ yaa ka ja o nɛ. 33A chɛ kɛŋɔ ya nyinu ya bambile ne ya liire ne ya bokpega bwa ne, dɛ nyin ya dɔŋa kɛŋɔ yaa dɛ nyin ya gbagba la. A gɛ mmarare anɛ nɔ ta teŋaa wera gwaa gɛ bwa yaa kpoo kwaa dɛ fuah dɛɛ tɛ Korowii, dɛ che kwaa kaa tɛo." 34Yeesu aa naa kɛŋɔ baa la chaŋe waa la wejema ne la, o ŋɔ o be ŋɔ, "He sie dɛ chaah Korowii Kora waa la ta." A habɔɔ la nomɛlbwa ta berɛ hɛlɛ waa dɛ bɔɔro waane kpa. 35Yeesu aa ba dɛ bagle waa Korowii Dea la, o bɔɔ ba ŋɔ, "Aah ɛrɛ waa Tɔn Jerema la ŋɔ Kristo la Korowii aa bagɛ nyoa ŋɔ wɛɛ tomɔɔ ásɛ o ba lɛ yaa la ɛɛ ɛ Devid naa nɔɔ? 36Dɛkalkɛŋɔ Korowii Domadɛɛge fa ir Devid nɛɛ dɛ gel o bagle Kristo waa dɛ ŋɔ, 'N Naa Korowii ŋɔ n Dɔɔ be ŋɔ ó ba so nomombɔr o dig ta ka tel kɛŋɔ waa ba o dɔma ne harɛ ásɛ o tigri ba nɛ.' 37Aah Devid kwaraa faa dɛ yerɔ o dɔɔ nɔ, ɛrɛɛ a berɛ ɛ o ɛ Devid naa ɔ?" Nɛnlaa la no o wobol la silɛɛ ne. 38Waa dɛ bag ba la, o ŋɔ, "Hɛ́ɛ nyiŋi Tɔn Jerema la kɛrɛdɛ. Ban yon do laalajena ásɛ nɛra bwa na ba dɛɛ guŋi ba harɛ yaware. 39Ba dɛ nyin nomombɔra soga kohona cheremi deene, ne nomombɔra soga tɔpejena dii cheremi bɔra la. 40Ba sie begre kwa, dɛɛ kam kwaa luhaahna deremi, dɛ berɛ saah dɛɛ soŋe Korowii wobojaŋa ne nɛra sie ta. Ba kembɔr ɛɛ do kanee taeh!" 41Yeesu kaa so Korowii Dea suuga tae daka bɔr dɛɛ nyiŋi nɛra baa ta suuga dɛɛ do o bini la, dɛ dɔɔhna bane dɛ do suugajena tenten. 42Belaa luhaah nyaa bɛl ge ba do suuga bwea jegre anɛ. 43Asɛ Yeesu yerɛ o habɔteŋra la dɛ ŋɔ ba be ŋɔ, "Kasinteŋ, luhaah nyaa nɔ do suugajena dɛ gwaa nɛra nɔ bwa, 44dɛkalkɛŋɔ o dea suuga bwaa o gbaa ba do daka nɔ bini la. Kɛ dɔɔhna la te suuga bini tama baa naa kɛŋɔ ba laa kpɔ aa, aa ba nɛɛ we la, anee ba kpɔ baa do la."

will be added

X\