Luk 9

1Yeesu yerɛ o habɔteŋra fi dɛ banɛ la ba cheme o sie, dɛ tɛɛ ba kpegri ne ŋwɛnɛ ŋɔ bá doŋi kwaa nɛra nɛ, dɛ chah weela ge, 2dɛ tom ba ŋɔ bá ka bol Korowii Kora la wa, dɛ chah weela tena. 3Waa dɛ tom ba la, o ŋɔ ba be ŋɔ, "He bɛ komɛlbwa kpɔ kpoŋe he ŋwɛnɛ nɔ kaala ta. He bɛ daŋgbale kpɔ, dɛ bɛ pure kpɔ, dɛ bɛ kondikwaa kpɔ, dɛ bɛ suuga kɛɛ batakaare bele anɛnɛ kpɔ. 4Bwɛɛ bɛlbwa haa la o ta la, dem haa ka jo o ta la, hé so bela ka tel kɛŋɔ haa le bwɛɛ la ta. 5Dɛ bwɛɛ la tena ta heyaa lɛɛ silɛɛ ne naa, hé jwii he napaala teera ta bela mɔɔ dɛ le bela, ásɛ a bagle kɛŋɔ he kpɔ Korowii Waa ba ba be ba vɛah." 6Asɛ ba le kaa, dɛ kaa bol Amanesoma la bela bwɛɛre la ta, dɛɛ chah weela tena bobɛlbwa. 7Kooro Hɛrɔd waa dɛ nyiŋi Galilia harɛ ta aa no waa Yeesu aa dɛ ɛ la bwa la, o liire ɛo sakaa ken, dɛkalkɛŋɔ dɛ nɛra bane dɛ bol ŋɔ Jɔn o faa dɛ sɔ nɛra Korowii nee la ir seo ta. 8Bane ŋɔ Korowii keame Elaejaa ir seo ta, asɛ bane ge ŋɔ Korowii keamebena la bɛlee weera. 9Anee Kooro Hɛrɔd ŋɔ, "Jɔn te, n gelɔ ba teŋe o nyu, aah nɛn besoo ge waa mɛɛ no ken nɔɔ?" Asɛ dɛ swɛɛ siwi kɛŋɔ wɛɛ na Yeesuu. 10Yeesu habɔteŋra la balɔ dɛ ba bol waa baa kaa ɛ o be, asɛ o kpɔ ba le nɛnlaa la bini ba kaa bwɛɛ bɛl baa dɛ yerɔ Bɛtsaeda la ta. 11Nɛra aa no o waa la, ba tiu bela, asɛ o lɛɛ ba silɛɛ ne dɛ bol Korowii Kora la waa bag ba, dɛ chah ba bini banɔ la ba bwara aa dɛ wee ba la. 12Wee aa dɛ jo la, o habɔteŋra fi dɛ banɛ la la o be dɛ ka ŋɔ o be ŋɔ, "Tɛ nɛnlaa nɔ ŋwɛnɛ ba kaa bwɛɛre aa bar bonɔ nɔ dɛ́ ka nyin kondikwaa ne chɔɔbɔra, dɛkalkɛ bonɔ ɛ kpɔg baah." 13Anee Yeesu ŋɔ o habɔteŋra la be ŋɔ, "Hé tɛɛ ba kwaa bá di." Waa ŋɔ gɛ la, ba chaŋo ŋɔ, "Paanoo anue ne pɛŋa anɛɛ ya dɔ. Nemenɛ ya la dɛ ka yawɛ kondikwaa ba tɛ nɛra nɔ bwa nɔ." 14Dɛ nɛra baa lɔ bela la, ba baala ɛɛ ɛ nɛra kagboŋa banuee. Asɛ Yeesu ŋɔ o habɔteŋra la be ŋɔ, "Hé ŋɔ ba be ŋɔ bá pɛɛge so fifraanunue." 15Anee o habɔteŋra la gel nɛra la pɛɛge dɛ so gɛ. 16Asɛ Yeesu kpɔ paanoo anue la ne pɛŋa anɛ la, dɛ ha sie dɛ nyiŋi nyundua dɛ jam Korowii, dɛ mɔne do o habɔteŋra la nɔɔra ta ŋɔ bá bɔne tɛ nɛra la. 17Baa bɔne paanoo la tɛ nɛra la la, ba bwa diu dɛ vagre, ane ka. O habɔteŋra la tɔɔ anɔ la baa dia ka la pɛ, asɛ a su wɛgrɛjena fi dɛ anɛ. 18Awola bɛl, dɛ Yeesu gbo lɔ bobɛl dɛɛ soŋe Korowii, asɛ o habɔteŋra la la o be. Anee o bɔɔ ba ŋɔ, "Nɛn besoo nɛra ɛɛ lii mɛ nɔ?" 19Anee ba ŋɔ, "Bane ŋɔ Jɔn o faa dɛ sɔ nɛra Korowii nee laanee hen. Bane ŋɔ Elaejaa hen, asɛ bane ge ŋɔ Korowii keamebena la bɛlee weera." 20Asɛ o bɔɔ ba ge ŋɔ, "Nɛn besoo he gee lii mɛ nɔ?" Anee Pita chaŋo ŋɔ, "Henee Kristo la Korowii aa ŋɔa wɛɛ tomɔɔ ó ba lɛ yaa la." 21Belaa Yeesu kah ba kohona ŋɔ ba bɛ gɛ nomɛlbwa be bol. 22Asɛ o berɛ ŋɔ, "Men Nɛn Bie la chɛ kɛŋɔ n na waa nomonome ne Sɔfonomonome ne Tɔn Jerema nɔn ta, asɛ ba vɛɛh mɛ, dɛ kpo mɛ, asɛ a tɔpetooro wee la, n ir seo ta." 23O berɛ ŋɔ ba bwa be ŋɔ, "Dɛ nomɛlbwa dɛ nyin kɛ o teŋɛ n nɛ aa, ó gel o tetookwaa nyina, dɛ kpɔ o te tɛ tɔpere bɛlbwa kɛ wɛɛ sɛh wahala nae ne seo bwaa, dɛ ba teŋɛ n nɛɛ kɛŋɔ nɛn waa kpɔ dagagre che bá ka kpaaro pɛl o ta la, 24dɛkalkɛ nomɛlbwa o sie aa swɛɛ harɛ nɔ ta kwaa ta la, wɛɛ paŋɛ o nyuu. Asɛ nomɛlbwa ge o sie aa wola harɛ nɔ ta silɛɛ kwaa ta lɛ la, wɛɛ dɔ o nyuu. 25Dɛ nɛn dɔ harɛ nɔ ta kwaa bwa dɛ paŋɛ o nyu aa, bɔkwa tɔnɔɔ o dɔɔ? 26Nomɛlbwa sihiih aa dɛ kpoo n ne n webagla nɔ ta la, awola men Nɛn Bie ne nyundua toromedɛɛga aa ba n Mɛɛ jirima ne la, maa naatee heeh awola tɔpere. 27Kasinteŋ, Korowii ɛɛ ba di o Kora harɛ nɔ taa, dɛ he bini bane ta soge le dɛ nao." 28Yeesu aa bol a gɛ waa nɔ la, a yawa nyoa la, o kpɔ Pita ne Jɔn ne Jems, o ne ba teeh bwe bɛl dɛ kaa o doa, dɛ ka soŋe Korowii. 29A gɛ saŋ Yeesu aa dɛ soŋe Korowii la, o sie bɔr begrɔ, asɛ o laala waa doa la to dɛɛ nyɛgle al-al ken. 30Ba ne ŋɔ ba nyiŋi, dɛ o ne nɛra banɛ dɛ bol wa. Dɛ Korowii keamebena Mosis ne Elaejaa. 31Baa bala dɛ Korowii jirima lɔ ba nɛ, baa bol gɛ Yeesu aa dɛ ba sewa Jerusalam ásɛ Korowii waa la ɛ kpela. 32Dɛ Pita ne o bala la dɛ chɔ doromi. Ba iro dɛ na Yeesu kɛŋɔ o laala aa toa dɛɛ nyɛgle al-al ken. Ba na nɛra banɛ la baa ja Yeesu nɛɛ la ge. 33Nɛra banɛ la aa le Yeesu be dɛɛ kaa la, Pita ŋɔ o be ŋɔ, "N Dɔɔ, a wer kɛŋɔ yaa lɔ bonɔ nɔ. Gel ya do kukure atoro, hé kpɔ bɛl, Mosis kpɔ bɛl, asɛ Elaeja ge kpɔ bɛl." Dɛ waa jemɛ waa waa dɛ bol. 34Pita taa dɛ bol waa nɔ la, bam bɛl denɔ ba tɔ ba nɛ, asɛ ɔmee lag ba kɛŋɔ bam la chunchule aa baa tɔ ba nɛɛ la. 35Belaa taa bɛl le bam la bini ŋɔ, "N Bie maa leo laanee la. Hé no o be!" 36Wobol la aa chiga la, dɛ a ka Yeesu gbo, asɛ o habɔteŋra la hel jeiih ken gɛ waa nɔ ta, ba ta nomɛlbwa be waa baa naa la bolɛ gɛ saŋ. 37Tɔ aa pera la, Yeesu ne o habɔteŋra batoro la le bwe la doa tu harɛ, asɛ nɛnlaa bane ba chemo. 38Belaa baa bɛl kpɔ takpeg bol waa nɛra la bini ŋɔ, "Nomoa! N dɛ soŋe, nyiŋi n bie nɔ nɛɛ tɛ mɛ. O gboo n bie. 39Kwaa dɛ ir o nɛ. A ir o nɛ aa, gɛɛ o pigri do lɔŋɔ, asɛ a won kpɔɔ go harɛ o beŋri chɔ, asɛ fufug ɛɛ le o nyoa. A dɛ ɛo hɔhɔrɔwa mɔɔ dɛ le o nɛ. 40N soŋe he habɔteŋra la ŋɔ bá doŋa o nɛɛ tɛ mɛ, kɛ ba ta wone." 41Anee Yeesu chaŋe ŋɔ, "Oo! Fini nɔ nɛra wechɔga aa lɔ he nɛɛ nɔ, he ta yarada dɔe! Tɔpera aŋwɛnɛɛ hɛɛ nyin kɛ n lawɛ bambile dɛ so he be mɔɔ he yarada Korowii ɔ? Maa tɔpere bɛl dii ba he be kpa oo! Kpɔ he bie la ba bonɔ." 42Bie la aa dɛ ba la, kwaa la goo harɛ dɛ gel o beŋri. Yeesu kɔr kwaa la, dɛ chah bie la, dɛ kpɔɔ tɛ o mɛɛ. 43Nɛra la bwa nyoa kpo Korowii kpegri la nɛ. Ba nyoa aa kpoa ba taa kooga la, Yeesu ŋɔ o habɔteŋra la be ŋɔ, 44"Hé cheg deŋne dɛ no waa nɔ maa dɛ ba he be bola nɔ, asɛ dɛ bɛ soh! Ba dɛ ba men Nɛn Bie lee do nɛra nɔn ta." 45O habɔteŋra la ta waa la mun noɛ, dɛkalkɛŋɔ Korowii kpɔɔ sɔɔh ba. Dɛ ba ge dɛ ɔmɛ, anomanta ba bɔɔro waa la mun kahonɛ. 46Wetɔŋla chole o habɔteŋra la baah ta, asɛ baa nyin ba jemɛ ba bini onɔ la waa ɛ ba bwa nomoa. 47Baa wola a ne baŋ leɛ mɔɔ la, dɛ Yeesu jemɛ waa baa dɛ lii. Belaa o lawɛ bechala bɛl ir che o jwɛh, 48dɛ ŋɔ ba be ŋɔ, "Nomɛlbwa waa koh n waa dɛ nyiŋi bie nɔ nɛɛ la, dɛ menee o nyiŋi la. Nomɛlbwa ge waa nyiŋi n nɛɛ la, dɛ naate waa tom mɛ laanee o nyiŋi la. Naate waa ɛ o te bechala he bini la, onee nomoa." 49Belaa Jɔn ŋɔ, "N Dɔɔ, ya na baa bɛl waa kpɔ he sɔn dɛɛ doŋi kwaa nɛra nɛ, asɛ ya kaoh ŋɔ ó gel, dɛkalkɛŋɔ o ta ya bini bɛl ɛɛ." 50Belaa Yeesu ŋɔ Jɔn ne o bala la be ŋɔ, "He bɛ on kah ŋɔ ó gel. Nomɛlbwa waa wola he nɛɛ chegɛ la, he somee on." 51Tɔpere aa dɛ tel kɛ Korowii kpɔ Yeesu kaa o be nyundua la, Yeesu kpɔ o te, dɛ den chig ŋwɛnɛ ta dɛ pa sie dɛɛ kaa Jerusalam. 52O tomɛ nɛra bane ŋɔ bá tɔ o sie dɛ la Samaria harɛ bwɛɛ bɛl ta dɛ́ ka nyin bɔr tɛo ó chog. 53O sie aa chagɛ Jerusalam la nomanta, bela tena ta on lɛɛ. 54Yeesu habɔteŋra Jems ne Jɔn aa na gɛ waa nɔ la, ba ŋɔ o be ŋɔ, "N Dɔɔ, he dɛ nyin kɛ ya gel nii le nyundua ba dɛ ba fuuh ba kɛɛ?" 55O habɔteŋra la aa ŋɔ gɛ la, o ta ban gelɛ. O laa o te berɛ dɛ do ba nee ba samɛ. 56Asɛ o ne o habɔteŋra la kaa ba sie bwɛɛ bɛl ta. 57Baa vala dɛɛ kaa la, baa bɛl ŋɔ Yeesu be ŋɔ, "Bobɛlbwa haa dɛ la la, mɛɛ teŋɛ he nɛɛ kaa." 58Anee Yeesu ŋɔ o be ŋɔ, "Manyajegre kwaraa dɔ bɔɔne dɛɛ chɔ a bini, asɛ jumbii aa dɛ gah nyundua ge dɔ a kɔne, kɛ n Nɛn Bie la te ta bobɛlbwa dɔe ń chɔ dɛ onɛ." 59Asɛ o berɛ ŋɔ baa bɛl ge be ŋɔ, "Teŋɛ n nɛ." Anee baa la ŋɔ, "N Dɔɔ, gel n la, asɛ n mɛɛ baa sewaa, ń hugo mɔɔ dɛ ba." 60Asɛ Yeesu chaŋo ŋɔ, "Gel nɛra baa wola Korowii mkpa dɔe la huge ba dɔŋa, asɛ hé ka bol Korowii Kora la bini waa bagle nɛra." 61Asɛ baa bɛl ge ŋɔ o be ja ŋɔ, "N Dɔɔ, mɛɛ teŋɛ he nɛ, kɛ gel n ka kal n haahna ne bii mɔɔ dɛ ba." 62Anee Yeesu ŋɔ o ge be ŋɔ, "Nomɛlbwa waa pa mun dɛɛ ba para dɛ ka kpɔ par, o nyu bini berɛ dɛɛ ɛo anɛnɛ la aa won parɛ a magre. Gɛɛ a do kɛŋɔ nomɛlbwa waa kpɔ o te kɛŋɔ wɛɛ ja Korowii Kora la taa la bɛ berɛ dɔ liire anɛ kpa."

will be added

X\